1-3. Biibilimik atuartarneq tamatuminngalu maleruaaneq qanoq iluaqutigisinnaavarput?

QATANNGUT arnaq utoqqaq ima oqarpoq: “Jehovap Biibilimik paasinninnissannut ikiortarmanga ullaat tamaasa qutsavigisarpara.” Biibili tamaat 40-nit amerlanerusunik atuarsimagaluarlugu suli atuartarpaa. Qatanngut arnaq inuusunnerusoq allappoq Biibilimik atuartarnini Jehovap ilumut piuneranik paasinninnissaminut taassumunngalu qanittumik attaveqarnissaminut iluaqutigisimallugu. Ima oqarpoq: “Inuuninni aatsaat taama pilluartigivunga!”

² Apustili Petrusi allappoq “oqaatsip immua minguitsoq” kajungerisariaqaripput. (1 Petr 2:2) Biibilimik atuaqqissaartarlutalu tamatumani ajoqersuutigineqartut maleruartarutsigit ilerasuuteqarata inuusinnaallutalu inuunitsinni siunertaqalersinnaavugut. Biibilimik atuaqqissaartarnerput allanik, Guutimik ilumoortumik asannittunik kiffartorfiginnittunillu, ikinnguteqarlualernissatsinnut iluaqutigisinnaavarput. Tamakku ‘Guutip inatsisaanik nuannarinninissatsinnut’ pissutissaalluarput. (Rom 7:22) Biibilimik atuaqqissaartarneq aamma qanoq iluaqutigisinnaavarput?

³ Jehova taassumalu ernera pillugu ilisimasaqarnerujartortillutit taakkuninnga inunnillu allanik asanninneruleraluttuinnassaatit. Biibilimilu ajoqersuutigineqarpoq inuit ajortut suujunnaarsinneqarpata inuit naapertuilluartut Guutimit qanoq annaanneqarnissaat. Oqaluussigaangavit nutaarsiassanik nuannersunik inunnut oqaluussissutiginnittarputit. Ilikkakkatillu pillugit inunnik allanik ilinniartitsigaangavit Jehovamit ikiorneqartarnissat qularutiginngilluinnarsinnaavat.

4. Biibilimik ‘nipikitsumik atuartarneq’ qanoq paasisariaqarpa?

⁴ Jehovap kissaatiginngilaa kiffani oqaatsiminik atuapallattassasut.  Josva ima oqarfigaa: “Inatsisit allassimaffiat taanna qarlunniitittuassavat; ullukkut unnuakkullu eqqarsaatigiuaannaruk [nipikitsumik atuartaruk, NW].” (Jos 1:8; Tuss 1:2) Tamanna isumaqarpa Biibili tamaat nipituumik atuartassalluguluunniit isussulluta atuartassagipput? Naamik. Isumaqarpoq atuakkavut eqqarsaatiginissaanut piffissaqarniassagatta sukkavallaanngitsumik atuartariaqartugut. Taamaaliornikkut allassimaffiit atorsinnaasatit qiimmaallaatigisinnaasatillu aallulluarnerusinnaassavatit. Oqariartaatsimik, allassimaffimmik oqaluttuamilluunniit qiimmaallannartumik atuaraangavit oqaatsit arriitsumik immaqalu allaat nipikitsumik atuartarsinnaavatit. Taamaalillutit atuakkatit uummammiliussinnaavatit. Sooq tamanna pingaaruteqarpa? Guutip najoqqutassiaanik paasinnilluarnerit taakkuninnga maleruaarusulissutigissagakku.

5-7. Guutip oqaasianik arriitsumik nipikitsumillu atuartarnerpit pissutsini makkunani qanoq iluaqutigisarpiuk (a) Guutip inatsisaanik maleruaanissamut; (b) allanut inussiarnersumik oqalunnissamut; (c) allaat ulluni annikilliorfiusuni Jehovamik tatiginninnissamut?

⁵ Biibilimi atuakkannik paasiuminaatsitannik arriitsumik nipikitsumillu atuarnerit atuakkannik paasinninnissannut iluaqutigisinnaavat. Assersuutigalugu qatanngut angut inuusuttoq Hoseap allagaanik atuaqqissaartoq eqqarsaatigiuk. Kapitali 4-mi versit 11-mit 13-imut atuareerlugit unippoq atuakkanilu eqqarsaatigilerlugit. (Atuakkit Hosea 4:11-13). * Sooq? Atuarfimmi kinguaassiuutitigut inuunerlunnissaminut ussernartorsioqqammersimavoq. Allassimaffiit atuakkani eqqarsaatigalugit imminut ima oqarfigivoq: ‘Inuit kisimiitillutik ajortuliaat Jehovap takusinnaavai. Ajuallatsikkusunngilara.’ Qatanngut aalajangerpoq Jehovap ileqqussatigut inatsisai maleruarniarlugit.

⁶ Assersuutit aappaat, qatanngut arnaq Joelip allagaanik atuaqqissaarnermini kapitali 2 versi 13-imut killittoq eqqarsaatigiuk. (Atuaruk Joeli 2:13). Allassimaffik atuaramiuk Jehova, ‘saammaasuusoq nallittuisuusorlu, kamajaatsuusoq ilumoorsusermillu peqangaartoq’, ilaartariaqarlugu paasivaa. Ilaannikkut uiminut allanullu ajuallannartumik kamappalullunilu oqaluttarnini pissutigalugu allannguiniarluni aalajangerpoq.

⁷ Assersuutit pingajuat, qatanngut angut nuliaqarlunilu qitornalik eqqarsaatigiuk. Suliffimminit soraarsitaasimanini pissutigalugu ilaquttaminik pilersuinissani isumakuluutigaa. Nahumip allagaanik atuaqqissaarpoq. Nahumi 1:7-imi Jehovap tatiginnitsiminik ilisimanninnera ‘ullumilu annikilliorfiusumi’ taakkuninnga sernissuisarnera pillugu atuarpoq. Atuakkani ilaquttanilu Jehovamit asaneqartutut isumakuluttariaqanngitsutullu misigilissutigaa. Taava kapitali 2 versi 1 atuaqqissaalerpaa. (Atuaruk Nahumi 2:1). Nutaarsiassaq nuannersoq pillugu, allaat ulluni annikilliorfiusuni, oqaluussisarnermigut Jehovamik tatiginninnini ersersissinnaallugu paasivaa. Taamaattumik suliffissarsiornermini sapaatip-akunnerata ingerlanerani oqaluussinerorusulerpoq.

8. Biibilimik atuartarninnit ilinniarsimasat naatsumik oqaluttuariuk.

⁸ Assersuutit iluaqutaasut eqqartoqqammikkavut Biibilip atuagartaaneersuupput inuit ilaannit paasiuminaatsinneqarsinnaasut. Allassimaffinnik qiimmaallannartunik atuaraangavit atuakkanik taakkuninnga atuarusussuseqarnerulertarputit. Tuppallersaatigisinnaallugillu siuneqassuseqalissutigisinnaavavut. Biibilip atuagartai tamaasa aamma taamatut iluaqutigisinnaavavut. Guutip oqaasia qaarusuliamut diamantilippassualimmut assersuunneqarsinnaavoq. Biibilimik atuartuartillutit “diamantinik”, imaluunniit siunnersuutinik allassimaffinnillu qiimmaallannartunik, ujarlertuassaatit!

9. Biibili paasilluarnerusinnaajumallugu susinnaavugut?

⁹ Ullut tamaasa Biibilimik atuartarnissaq  pingaaruteqarpoq. Atuakkavilli paasinissaat qulakkeertariaqarpat. Taamaattumik atuakkanni inuit, sumiiffiit pissutsillu allaatigineqartut paasisaqarfiginerujumallugit atuagassiaativut atuagaativullu Biibililersaarutit atorlugit misissuisarit. Biibilimi atuakkatit qanorpiaq maleruassanerlugit nalornissutigigukku utoqqaanertamut qatanngummulluunniit angummut arnamulluunniit inersimalluartumut ikioqqusinnaavutit. Kristumiu Biibilip allanneqarnerata nalaani inuusoq, Apollosimik atilik, sallusuissut eqqorluarnerusumik paasisinnaajumallugu ikiorneqartariaqarpoq.

10, 11. (a) Apollosi nutaarsiassaq nuannersoq pillugu oqaluussillaqqinnerulernissaminut qanoq ikiorneqarpa? (b) Apollosi pillugu oqaluttuaq qanoq ilinniarfigisinnaavarput? (Takuuk ungalusaq “Ajoqersuutitit eqqortuuppat?”)

¹⁰ Apollosi kristumiuuvoq juutinik nagguilik Allakkat pillugit ilisimasaqarluarlunilu oqaluussisartoq aallussilluartoq. Apustilit Suliaanni Apollosi pillugu ima allassimasoqarpoq: “Jiisusi pillugu sukumiisumik oqaluussivoq ajoqersuillunilu, naak Johannesip kuisissutaa kisiat nalunngikkaluarlugu.” Jiisusip kuisinneq pillugu allaanerusumik ilinniartitsisalersimanera Apollosip nalugamiuk eqqunngitsumik ilinniartitisarpoq. Priskillap Akvilallu, aappariit kristumiut, Apollosip Efesosimi ajoqersuinera tusarnaareerlugu ‘Guutip aqqutigeqqusaanik sukumiinerusumik nassuiaatilerpaat’. (ApS 18:24-26) Apollosip tamanna qanoq iluaqutigaa?

¹¹ Apollosi Efesosimi ajoqersuereerluni Akajamukarpoq. “Tassunga pigami uppertunut Guutip saammaanneragut iluaqutaangaalerpoq. Tamaasami tusaatillugit juutit oqaasissaarutitilluinnarpai Allakkallu tunngavigalugit uppernarsarlugu Jiisusi Kristusiusoq.” (ApS 18:27, 28) Maanna Apollosip kristumiutut kuisinnerup isumavia nassuiarsinnaanngorsimavaa. Paasisaqarnerusimagami ajoqersuganngorlaanik ikiuinermi “iluaqutaangaalerpoq”. Oqaluttuaq qanoq ilinniarfigisinnaavarput? Apollositut Biibilimi atuakkavut paasiniartuartarpavut. Sunniuteqarluarnerusumik  oqaluussisalernissatsinnut uppeqatitsinnit misilittagaqarluartumit siunnersorneqaraangatta maniguulluta qujamasullutalu siunnersuut malillugu iliuuseqarusuttarpugut, taamaaliornerpummi oqaluussillaqqinnerulissutigisaratsigu.

12, 13. Biibilimik atuaqqissaaqatigineqartartoq anersaakkut ineriartulernissaanut Biibili periaaserissumik qanoq atorneqarsinnaava?

¹² Priskillatut, Akvilatut Apollositullu allanik ikiuisinnaavugut. Soqutiginnittoq anersaakkut ineriartornissaminut ajoqutigisaminik qaangiinissaanut ikioraangakku qanoq misigisarpit? Imaluunniit utoqqaanertaaguit uppeqatippillu artornartorsiunermini Biibili tunngavigalugu siunnersuisimaninnut qutsavigigaangatit qanoq misigisarpit? Allat inuunerminnik allannguiniarneranni Biibili tunngavigalugu ikiuisinnaanerput nalerisimaarnangaarpoq. * Qanoq taamaaliorsinnaavit?

¹³ Eliap nalaani Israelikkorpassuit ilumoortumik pallorfiginninniarnerlutik eqqunngitsumilluunniit pallorfiginninniarnerlutik aalajangersimanngillat. Biibilimik atuaqqissaaqatigineqartartup Jehovamik kiffartorfiginninniarnerluni suli aalajangersimanngitsup Eliap Israelikkunnut taakkununnga oqaasii iluaqutigisinnaavai. (Atuaruk 1 Kunngit 18:21). Imaluunniit soqutiginnittup immaqa ikinngutiminit ilaquttaminilluunniit Biibilimik atuaqqissaartarnini pillugu isorineqarnissani annilaangatigaa. Esaja 51:12, 13-imi allassimasut atorlugit Jehovamik pallorfiginnilissanerluni aalajangerniarnerani ikiorsinnaavat. — Atuakkit.

14. Allanik ikiuininni Biibilimi allassimaffiit eqqaamanissaanut suut iluaqutigisinnaavigit?

¹⁴ Biibilimi qiimmaallaatigisinnaasatsinnik, naqqinneqassutigisinnaasatsinnik imaluunniit nakussatsissutigisinnaasatsinnik allassimaffippassuaqarpoq. Imaassinnaavorli allassimaffiit pisariaqartitatit sorliit atussanerlugit qanoq nalunngissinnaanerlugu eqqarsartutit. Ullut tamaasa Biibilimik atuartarit atuakkatillu eqqarsaatigeqqissaartarlugit. Taamaalioruit Biibili pillugu ilisimasaqarneruleriartulissallutillu tassani allassimasut eqqaamalluarsinnaaqqullugit Jehovap anersaaminik illernartumik tunissavaatit. — Mark 13:11; atuaruk Johannesi 14:26.

15. Guutip oqaasianik paasinninnerulernissannut suna iluaqutigisinnaaviuk?

¹⁵ Kunngitut Salomotut Jehova ilisimassusermik tuneqqullutit qinnuigiuk. Oqaluussininni ilagiinnilu kiffartorninni ilisimassuseq pisariaqartittarpat. (2 Nal 1:7-10) Jehova taassumalu piumasaa pillugu eqqorluartumik ilisimasaqalerumallutit pruffiitit ilaartarlugillu Guutip oqaasia ‘paasiniaqqissaartarlugulu eqqarsaatigeqqissaartaruk’. (1 Petr 1:10-12) Apustilip Paulusip Timotheusi oqarfigaa “uppernerup ajoqersuutillu ajunngitsup oqaasertai” atuaqqissaartaqqullugit. (1 Tim 4:6) Biibili atuaqqissaartarukku paasilluarsinnaanerulerlugulu allanik ikiuininni atorluarsinnaanerulissavat. Tamatumalu saniatigut uppernikkut nakussatsissaatit.

16. (a) Berøamiut ullut tamaasa Allakkanik atuartarnertik qanoq iluaqutigaat? (b) Sooq ullut tamaasa Biibilimik atuartarnissarput pingaaruteqarpa?

¹⁶ Juutit Berøamiut ullut tamaasa Allakkanik atuaqqissaartarput. Paulusimit oqaluussiffigineqaramik tusakkatik Allakkanut sanilliuttarpaat. Amerlasuut taassuma ajoqersuutaa sallusuissutaasoq paasivaat ‘uppertunngorlutillu’. (ApS 17:10-12) Tamatumannga ersersinneqarpoq ullut tamaasa Biibilimik atuartarnikkut Jehovamik upperinninnitta nakussatsinneqarsinnaanera. Guutip silarsuassaani nutaami inuulerusukkutta upperluartariaqarpugut. — Hebr 11:1.

17, 18. (a) Upperluarneq asanninnerlu uummatitsinnut assersuutaasumut qanoq illersuutaappat? (b) Neriuuterput qanoq illersuutigisarparput?

¹⁷ Paulusi allappoq uppertariaqarlutalu  asannittariaqarlutalu neriuttariaqartugut. Ima allappoq: “[Uagut] ullup pigimmatigut aalakoorniaqinata, uppernerli asanninnerlu saattuaasatut atiniartigit annaanneqarnissamillu neriuut niaqorortinnaveeqqutigalugu.” (1 Th 5:8) Sakkutooq akeqqaminit uummaterorneqaqqunani eqqornaveeqquteqartariaqarpoq. Taamatuttaaq kristumiup uummataa assersuutaasoq ajortip pissaaneranut illersorneqartariaqarpoq. Jehovamut kiffaasut Guutip neriorsuutaanik upperinnillutillu taassuminnga allanillu asanninneruleraangamik susoqartarpa? Kiffap taamaattup anersaakkut saattuaasaq pitsaanerpaaq atisarpaa. Sapinngisani tamaat Guutimit iluarisaaniartuassaaq.

¹⁸ Paulusip aamma niaqorortinnaveeqqut, ‘annaanneqarnissamik neriuut’, eqqaavaa. Biibilip allanneqarnerata nalaani sakkutuut niaqorortinnaveeqquteqanngikkunik akersuunnermi toqutaariaannaassapput. Pitsaasumilli niaqorornaveeqquteqaruni niaqorortikkuni ajoquserujussuarnanilu toqunavianngilaq. Jehovap uagutsinnik annaassisinnaaneranik upperinninnerput nakussatsikkutsigu uppernerput isummatsinnut illersuutigissavarput. Neriuuteqarnikkut tunussisunik taakkualu ‘isumaqanngitsunik oqalunneri’ nappaatitut ilagiinni siaruaassinnaasut akiorsinnaassavavut. (2 Tim 2:16-19) Neriuuteqarnikkut nukittusinnaallutalu ileqqorlunneq ingalassimasinnaavarput.

19, 20. Sooq Guutip oqaasia qujamasuutigingaarparput, tamatuminngalu qujamasuutiginninnerput qanoq ersersittarparput? (Takuuk ungalusaq “Jehovap pisariaqartitarluinnannik tunisarpaanga”)

¹⁹ Naggatissaq qanilliartortillugu Jehovap oqaasia tatigineruleraluttuinnartariaqarparput. Biibilimi allassimasut ileqqupalaaqarunnaarnissatsinnut ajortulioqqajaajunnaarnissatsinnullu iluaqutigissavavut. Tamatumani tuppallersaatit kajumissaarutillu Saatanimit taassumalu silarsuaanit misilinneqarnitsinni pinertusaarnissatsinnut iluaqutigissavavut. Maleruaqqusat Jehovap oqaasianiittut inuunerup aqqutaanik atuaajuarnissatsinnut iluaqutigissavavut.

²⁰ Guutip “piumasaraa inuit tamalaat annaanneqassasut”. Pineqartut tassaapput Guutip kiffai inuillu nutaarsiassamik nuannersumik ilinniartinniarlugit oqaluussiffigigaangatsigit tusarnaarnissaminnut kajumittut. Silarsuulli matuma ajortup naggatissaani aniguerusuttut tamarmik ‘eqqorluartumik ilisimasaqalertariaqarput’. (1 Tim 2:4, NW) Aniguerusukkutta Biibilimik atuartariaqarlutalu tamatumani maleruaqqusat naapertorlugit iliuuseqartariaqarpugut. Aap, ullut tamaasa Biibilimik atuartarnitsigut Jehovap oqaasia qanoq pingaartitsiginerlutigu ersersissavarput. — Joh 17:17.