مارقا 1:1—45
-
شومىلدىرۋ ٴراسىمىن جاساۋشى جاقيانىڭ ۋاعىزى (1—8)
-
يسانىڭ شومىلدىرۋ راسىمىنەن ٶتۋى (9—11)
-
شايتاننىڭ يسانى سىناۋى (12، 13)
-
يسانىڭ عاليلەيادا ۋاعىزداۋعا كىرىسۋى (14، 15)
-
العاشقى شاكىرتتەردىڭ شاقىرىلۋى (16—20)
-
جىندى قۋىپ شىعۋ (21—28)
-
يسانىڭ قاپارناۋمدا كوپتەگەن ناۋقاستى ساۋىقتىرۋى (29—34)
-
يسانىڭ وڭاشا جەردە دۇعا ەتۋى (35—39)
-
الاپەس كىسىنىڭ ايىعۋى (40—45)
1 بۇل — قۇدايدىڭ ۇلى* يسا ٴماسىح* تۋرالى ىزگى حاباردىڭ باسى.
2 يشايا پايعامبار بىلاي دەپ جازعان: «(مىنە، مەن سەنىڭ الدىڭدا حابارشىمدى جىبەرەمىن. ول ساعان جول دايىندايدى+.)*
3 ٴشول دالادا* بىرەۋ: —ەحوباعا* جول دايارلاڭدار، ونىڭ جولدارىن تەگىستەڭدەر!— دەپ جار سالىپ جاتىر+».
4 وسى سوزدەرگە ساي، شومىلدىرۋ ٴراسىمىن جاساۋشى جاقيا ٴشول دالادا بولىپ، جۇرتقا كۇنالارى كەشىرىلۋ ٷشىن، وكىنگەندەرىنىڭ بەلگىسى رەتىندە شومىلدىرۋ راسىمىنەن ٶتۋ كەرەكتىگىن ۋاعىزدادى+.
5 سوندا بۇكىل ياھۋدەيا ايماعى مەن يەرۋساليم تۇرعىندارىنىڭ ٴبارى كەلىپ، كۇناكار ەكەندەرىن مويىنداپ، جاقيانىڭ قولىنان يوردان وزەنىندە شومىلدىرۋ راسىمىنەن ٶتتى+.
6 ول تۇيە جۇنىنەن كيىم كيىپ، بەلىن قايىس بەلبەۋمەن بۋىپ جۇرەتىن+. ال ازىعى شەگىرتكە مەن جابايى ارانىڭ بالى ەدى+.
7 جاقيا بىلاي دەپ ۋاعىزدادى: «سوڭىمنان مەنەن قۇدىرەتتى بىرەۋ كەلە جاتىر. مەن ەڭكەيىپ، ونىڭ ساندالىنىڭ باۋىن شەشۋگە دە تاتىمايمىن+.
8 مەن سەندەردى سۋعا شومىلدىرسام، ول كيەلى رۋحقا شومىلدىرادى+».
9 سول كۇندەرى عاليلەياداعى نازارەت قالاسىنان يسا كەلىپ، جاقيا ونى يوردان وزەنىندە شومىلدىرۋ راسىمىنەن وتكىزدى+.
10 يسا سۋدان شىققان بويدا كوكتىڭ اشىلىپ، ٶزىنىڭ ۇستىنە كوگەرشىن ىسپەتتى كيەلى رۋحتىڭ ٴتۇسىپ كەلە جاتقانىن كوردى+.
11 كوكتەن: «سەن مەنىڭ سۇيىكتى ۇلىمسىڭ. مەن ساعان ريزامىن!»— دەگەن داۋىس شىقتى+.
12 سول زاماتتا رۋح ونى ٴشول دالاعا بارۋعا تالپىندىردى.
13 يسا جابايى اڭدار مەكەندەيتىن ٴشول دالادا 40 كۇن بولدى. ونى سول جەردە شايتان سىنادى+. سودان كەيىن وعان پەرىشتەلەر قىزمەت ەتتى+.
14 جاقيا تۇتقىنعا الىنعاننان كەيىن، يسا عاليلەياعا بارىپ+، قۇدايدىڭ ىزگى حابارىن ۋاعىزداپ+:
15 «بەلگىلەنگەن ۋاقىت جەتتى. قۇداي پاتشالىعى* جاقىنداپ قالدى. كۇنالارىڭا وكىنىپ+، ىزگى حابارعا سەنىڭدەر»،— دەپ ٴجۇردى.
16 عاليلەيا تەڭىزىنىڭ* جاعاسىمەن كەلە جاتىپ، يسا اۋ سالىپ جاتقان شيمون مەن ونىڭ باۋىرى ٵندىردى كوردى+. ولار بالىقشىلار ەدى+.
17 يسا ولارعا: «سوڭىمنان ەرىڭدەر، مەن سەندەردى ادام اۋلاۋشى ەتەمىن»،— دەدى+.
18 ولار اۋلارىن تاستاي سالا، ونىڭ سوڭىنان ەردى*+.
19 يسا تاعى كىشكەنە جۇرگەننەن كەيىن، قايىقتا اۋ جاماپ وتىرعان زەبەدەيدىڭ ۇلدارى جاقىپ پەن جوحاندى كوردى+.
20 يسا ولاردى بىردەن وزىنە شاقىردى. ەكەۋى اكەلەرى زەبەدەيدى جۇمىسشىلارىمەن بىرگە قايىقتا قالدىرىپ، ونىڭ سوڭىنان ەردى.
21 ٴسۇيتىپ، ٴبارى قاپارناۋمعا بەت الدى.
دەمالىس كۇنى* كەلىسىمەن-اق يسا ٴماجىلىسحاناعا* بارىپ، ٴتالىم بەرە باستادى+.
22 جۇرت ونىڭ قالاي ٴتالىم بەرەتىنىنە قايران قالدى، ويتكەنى ول ٴدىن مۇعالىمدەرى سياقتى ەمەس، بيلىگى بار ادامداي ٴتالىم بەردى+.
23 سول كەزدە ٴماجىلىسحانادا بويىن جىن بيلەپ العان ٴبىر كىسى بار ەدى. ول ايقايلاپ:
24 «نازارەتتىك يسا، بىزدە نەڭ بار+؟ ٴبىزدى قۇرتۋعا كەلدىڭ بە؟ مەن سەنىڭ كىم ەكەنىڭدى جاقسى بىلەمىن: سەن قۇدايدىڭ كيەلىسىسىڭ+!»— دەدى.
25 ٴبىراق يسا ونى: «ٷنىڭدى ٶشىر، شىق ونىڭ بويىنان!»— دەپ تىيىپ تاستادى.
26 سوندا جىن الگى كىسىنى قالشىلداتىپ، بار داۋسىمەن ايقايلاپ، ونىڭ بويىنان شىعىپ كەتتى.
27 جۇرتتىڭ ٴبارى قاتتى تاڭىرقاپ، ٶزارا: «بۇل نە؟ ٴبىر جاڭا ٸلىم* عوي! ونىڭ ٴتىپتى جىندارعا بۇيىرۋعا بيلىگى بار ەكەن، ولار وعان باعىنىپ جاتىر!»— دەي باستادى.
28 يسا تۋرالى اڭگىمە بۇكىل عاليلەيا ايماعىنا تەز تاراپ كەتتى.
29 ٴماجىلىسحانادان شىعىپ، ولار جاقىپپەن جانە جوحانمەن بىرگە شيمون مەن ٵندىردىڭ ۇيىنە باردى+.
30 شيموننىڭ قايىن ەنەسى+ ىستىعى كوتەرىلىپ، اۋىرىپ جاتىر ەكەن. ولار مۇنى دەرەۋ يساعا ايتتى.
31 يسا ايەلدىڭ قاسىنا بارىپ، قولىنان ۇستاپ تۇرعىزدى. سوندا ونىڭ ىستىعى باسىلىپ، ولارعا اس ازىرلەي باستادى.
32 كۇن باتىپ، كەش تۇسكەندە جۇرت ناۋقاس جانە جىن بۋعان ادامداردىڭ ٴبارىن يساعا اكەلە باستادى+.
33 بۇكىل قالا ەسىك الدىنا جينالدى.
34 ول ٴتۇرلى اۋرۋمەن كەلگەن تالاي ناۋقاستى ايىقتىردى+ جانە كوپ جىندى قۋىپ شىعاردى. ٴبىراق ولارعا سويلەۋگە تيىم سالدى، ويتكەنى جىندار ونىڭ ٴماسىح ەكەنىن بىلەتىن*.
35 يسا تاڭ اتپاي ورنىنان تۇرىپ، وڭاشا ٴبىر جەرگە بارىپ، دۇعا ەتە باستادى+.
36 الايدا شيمون مەن قاسىنداعىلار ونى ىزدەپ شىعىپ،
37 تاۋىپ الدى دا، وعان: «جۇرتتىڭ ٴبارى ٴسىزدى ىزدەپ ٴجۇر»،— دەدى.
38 ٴبىراق يسا ولارعا: «باسقا جەرلەرگە، جاقىن ماڭايداعى ەلدى مەكەندەرگە بارايىق. سول جەرلەردە دە ۋاعىزدايىن، سەبەبى مەن سول ٷشىن كەلدىم»،— دەدى+.
39 ٴسۇيتىپ، ول بۇكىل عاليلەيا ايماعىن ارالاپ، ٴماجىلىسحانالاردا ۋاعىز ايتتى جانە جىنداردى قۋىپ شىعاردى+.
40 بىردە وعان الاپەسپەن اۋىراتىن ٴبىر كىسى كەلىپ، تىزە بۇگىپ: «قالاساڭىز بولعانى، مەنى ايىقتىرىپ تازارتا الاسىز»،— دەپ جالبارىندى+.
41 سوندا وعان جانى اشىعان يسا قولىن سوزىپ، ونىڭ دەنەسىنە تيگىزدى دە: «قالايمىن، تازار!»— دەدى+.
42 سول ساتتە ول الاپەسىنەن تازاردى.
43 سوسىن يسا ونى بىردەن ٶز جونىنە جىبەرىپ، بىلاي دەپ قاتاڭ ەسكەرتتى:
44 «بايقا، بۇل تۋرالى ەشكىمگە ٴتىس جارما! ٴبىراق بارىپ، ٴدىني قىزمەتكەرگە قارال دا، تازارعانىڭ ٷشىن مۇسا بۇيىرعان سي-تارتۋدى ۇسىن+. بۇل ولارعا كۋالىك بولسىن»+.
45 الايدا سول ماڭنان كەتىسىمەن، الگى كىسى بولعان جايتتى بارلىق جەردە ايتىپ، تاراتا باستادى. سول سەبەپتى يسا قالاعا اشىق كىرە الماي، وقشاۋ جەرلەردە ٴجۇردى. سويتسە دە وعان ادامدار جان-جاقتان اعىلىپ كەلىپ جاتتى+.
سىلتەمەلەر
^ تۇسىندىرمەنى قاراڭىز.
^ تۇسىندىرمەنى قاراڭىز.
^ بۇل ٷزىندى ملح 3:1 دەن كەلتىرىلگەن.
^ تۇسىندىرمەنى قاراڭىز.
^ بۇل — قۇدايدىڭ ەسىمى. تۇسىندىرمەنى قاراڭىز.
^ تۇسىندىرمەنى قاراڭىز.
^ «گەنەسارەت كولى»، «كينەرەت تەڭىزى»، «تيبەريا تەڭىزى» دەپ تە اتالادى.
^ مۇندا «سوڭىنان ەرۋ» دەگەن تىركەس يسانىڭ ٸزباسارى بولۋ ماعىناسىندا قولدانىلعان.
^ تۇسىندىرمەنى قاراڭىز.
^ تۇسىندىرمەنى قاراڭىز.
^ نەمەسە «ٴتالىم بەرۋدىڭ جاڭا جولى عوي!»
^ مۇمكىن: «ونىڭ كىم ەكەنىن بىلەتىن».