جاڭا قاۋىمعا ٴسىڭىسىپ كەتۋ ٷشىن نە ىستەۋگە بولادى؟
جاڭا قاۋىمعا اۋىسىپ كورگەنسىز بە؟ سولاي بولسا، دجون-ٴچارلزدىڭ سوزدەرىمەن كەلىسەتىن بولارسىز. ول بىلاي دەيدى: «جاڭا قاۋىمعا ۇيرەنىسىپ كەتۋ، سويتە ٴجۇرىپ وتباسىنداعى ٵربىر ادامنىڭ رۋحاني كۇيىن ساقتاۋ وڭاي ەمەس». جاڭا جەرگە كوشكەندە، جۇمىسىڭ دا، باسپاناڭ دا، بالالاردىڭ مەكتەبى دە اۋىسادى. بۇعان قوسا، سول جەردىڭ مادەنيەتىنە، اۋا رايىنا جانە ۋاعىزدايتىن اۋماعىنا ۇيرەنۋ كەرەك بولۋى مۇمكىن.
جاڭا قاۋىمعا اۋىسقاندار تاعى ٴبىر قيىندىققا كەزىگەدى. فرانسيا فيليالىنىڭ تاعايىنداۋىمەن جاڭا قاۋىمعا اۋىسقان نيكولاس پەن سەلەن بىلاي دەيدى: «العاشىندا قۋانىپ كوشىپ بارعانىمىزبەن، كەيىن دوستارىمىزدى ساعىنا باستادىق. ويتكەنى جاڭا قاۋىمداعى باۋىرلاستاردى ٵلى جاقسى تانىمايتىن ەدىك» a. قيىندىقتارعا قاراماستان جاڭا قاۋىمعا تاستاي باتىپ، سۋداي سىڭۋگە نە كومەكتەسەدى؟ بۇل جاعىنان باسقالار سىزگە قالاي كومەكتەسە الادى؟ جاڭا قاۋىمدا قانداي باتالارعا كەنەلۋىڭىز مۇمكىن جانە قاۋىم ٷشىن ٴسىز نە ىستەي الاسىز؟
جاڭا قاۋىمعا ۇيرەنۋگە كومەكتەسەتىن ٴتورت كەڭەس
ەحوباعا ارقا سۇيەڭىز
1. ەحوباعا ارقا سۇيەڭىز (ٴزاب. 37:5). جاپونيادا تۇراتىن كازۋمي باۋىرلاسقا، كۇيەۋىنىڭ جۇمىسى باسقا جاققا اۋىسقاندىقتان، 20 جىل قىزمەت ەتكەن قاۋىمىن اۋىستىرۋعا تۋرا كەلدى. سول كەزدە ول «جولىڭدى ەحوباعا تاپسىر» دەگەن سوزدەرگە ساي ارەكەت ەتتى. ول بىلاي دەيدى: «بويىمدى ۇرەي، ۋايىم مەڭدەپ، جالعىزدىق سەزىنگەندە، ەحوباعا بار جۇرەگىمدى اقتارىپ، قايتا-قايتا دۇعا ەتتىم. ەحوبا دۇعالارىما ٵردايىم جاۋاپ بەرىپ، مەنى نىعايتىپ وتىردى».
ەحوباعا كوبىرەك ارقا سۇيەۋ ٷشىن نە ىستەۋىڭىز قاجەت؟ وسىمدىك ٶسۋ ٷشىن ونى سۋعارىپ، نارلەندىرۋ كەرەك، سول سياقتى سەنىمىمىز ٶسۋ ٷشىن دە ونى نارلەندىرىپ وتىرۋىمىز كەرەك. جوعارىدا ايتىلىپ كەتكەن نيكولاس ەحوبانىڭ ەركىن ورىنداۋ ٷشىن كوپتەگەن قۇرباندىقتارعا بارعان ىبىرايىم، يسا، پاۋىل جايلى وي جۇگىرتكەن. سونىڭ ارقاسىندا ەحوبا كومەككە كەلەتىن قۇداي ەكەنىنە كوزى جەتكەن. جۇيەلى تۇردە كيەلى كىتاپتى زەرتتەسەڭىز، كەز كەلگەن وزگەرىستەرگە بەيىمدەلە الاسىز. بۇعان قوسا، جاڭا قاۋىمداعى باۋىرلاستارىڭىزبەن بولىسەتىن رۋحاني سيلارىڭىز دا بولادى.
سالىستىرماڭىز
2. سالىستىرماڭىز (ۋاع. 7:10). جۋل ەسىمدى باۋىرلاس بەنيننەن قۇراما شتاتتارعا كوشكەندە، وعان مۇلدەم باسقا مادەنيەتكە ۇيرەنۋگە تۋرا كەلدى. «مەن قاۋىمداعى ٵربىر ادامعا ٶزىم جايلى ايتا بەرۋدەن شارشاپ كەتتىم. بۇل ماعان جات نارسە بولعاندىقتان، باۋىرلاستاردان قاشقاقتاي باستادىم. ٴبىراق كەيىن ولاردى جاقىننان تاني كەلە، ويىمدى وزگەرتتىم. دۇنيەنىڭ قاي بۇرىشىندا تۇرسا دا، ادامداردىڭ ٴبارى بىردەي ەكەنىن ٴتۇسىندىم. ولار جاي عانا ٴبىر-بىرىنەن وزگەشە بولۋى مۇمكىن. ادامداردى قالاي بار، سولاي قابىلداۋ وتە ماڭىزدى»،— دەيدى جۋل. جاڭا قاۋىمىڭىزدى بۇرىنعىسىمەن سالىستىرماڭىز. اننا-ليز ەسىمدى ٸزاشار باۋىرلاس: «مەن بۇل قاۋىمعا ٴبارى بۇرىنعىداي بولادى دەپ ەمەس، جاڭا نارسەلەردى بىلۋگە كەلدىم»،— دەيدى.
اقساقالدار دا جاڭا قاۋىمىن بۇرىنعى قاۋىمىمەن سالىستىرماعانى ٴجون. جاڭا قاۋىمداعى باۋىرلاستاردىڭ قانداي دا ٴبىر نارسەنى باسقاشا ىستەگەنى ولاردىكى قاتە دەگەندى بىلدىرمەيدى. ۇسىنىس ايتپاس بۇرىن، جەرگىلىكتى جاعدايدى جاقسى ٴبىلىپ العانىڭىز دانالىققا جاتادى (ۋاع. 3:1، 7ا). باسقالارعا ٶز ويىڭىزدى تىقپىشتاعاننان گورى، ٸس-ارەكەتىڭىزبەن ۇلگى بولعانىڭىز جاقسى (قور. 2-ح. 1:24).
قاۋىممەن بىتە قايناسىڭىز
3. قاۋىممەن بىتە قايناسىڭىز (ٴفىلىپ. 1:27). ٴبىر جەرگە كوشۋ كوپ ۋاقىت پەن كۇشتى الادى. ٴبىراق سوعان قاراماستان، قاۋىم كەزدەسۋىنە بىردەن بارا باستاڭىز. مۇمكىن بولسا، ونلاين ەمەس، جۇزبە-ٴجۇز قاتىسىڭىز. جاڭا قاۋىمىڭىزداعى باۋىرلاستار ٴسىزدى مۇلدەم كورمەسە نە اندا-ساندا عانا كورسە، سىزگە قالاي كومەكتەسپەك؟! ەكى قىزىمەن وڭتۇستىك افريكانىڭ ۇلكەن قالاسىنا كوشىپ بارعان ليۋسيندا باۋىرلاس بىلاي دەيدى: «دوستارىم ماعان جاڭا قاۋىمعا بىردەن كىرىسىپ، باۋىرلاستارمەن ارالاس-قۇرالاس بولۋعا كەڭەس بەردى. ٴبىز ولارعا قۇلاق اسىپ، باۋىرلاستارمەن قىزمەتكە شىقتىق جانە قاۋىم كەزدەسۋلەرىندە تۇسىنىكتەمە بەردىك. سونداي-اق ٴبىز باۋىرلاستارعا ٷيىمىزدى ۋاعىزعا ارنالعان كەزدەسۋ وتكىزۋگە ۇسىندىق».
قاۋىمنىڭ ىستەرىن باۋىرلاستارمەن يىق تىرەسە اتقارساڭىز، ٶزىڭىزدى دە، ولاردى دا نىعايتاسىز. اقساقالدار جوعارىدا ايتىلعان اننا-ليز باۋىرلاستى بارلىق باۋىرلاستارمەن قىزمەتكە شىعۋعا تالپىندىرىپتى. «قاۋىمعا ٴسىڭىسىپ كەتۋدىڭ ەڭ جاقسى جولى وسى ەكەن»،— دەيدى اننا-ليز. سونداي-اق پاتشالىق سارايىن تازالاۋ، جوندەۋ جۇمىستارىنا دا اتسالىسىڭىز. وسىلاي جاڭا قاۋىمدى ٶز قاۋىمىڭىز دەپ سانايتىنىڭىزدى كورسەتەسىز. قاۋىمنىڭ ىستەرىنە كوبىرەك ارالاسساڭىز، باۋىرلاستار دا سىزگە تەزىرەك ۇيرەنەدى. ٴسۇيتىپ، جاڭا قاۋىمىڭىز سىزگە وتباسىڭىزداي بولىپ كەتەدى.
جاڭا دوستار تابىڭىز
4. جاڭا دوستار تابىڭىز (قور. 2-ح. 6:11—13). دوستار تابۋدىڭ ەڭ جاقسى جولى — ادامعا كوڭىل ٴبولۋ. باۋىرلاستارمەن تانىسۋعا جەتكىلىكتى ۋاقىت بولۋ ٷشىن، قاۋىمعا ەرتەرەك كەلىڭىز جانە ارتىنان بىردەن كەتىپ قالماڭىز. باۋىرلاستاردىڭ ەسىمىن جاتتاۋعا كۇش سالىڭىز. ولاردىڭ ەسىمىن بىلسەڭىز جانە ٶزىڭىز جاقىنداپ، جىلى شىراي تانىتساڭىز، ولار دا سىزگە تارتىلادى. وسىلاي تاماشا دوستىققا باستاما بەرەسىز.
وزگەلەرگە جاعىنامىن دەپ، ٶزىڭىزدى باسقاشا ۇستاماڭىز. باۋىرلاستار ٴسىزدى قالاي بار، سولاي تانىعانى ٴجون. ٴسىز دە ليۋسيندا باۋىرلاس سياقتى ىستەپ كورىڭىز. ول بىلاي دەيدى: «ٴبىز كوپ باۋىرلاستاردى قوناققا شاقىردىق. سونىڭ ارقاسىندا ولارمەن جاقىن دوس بولىپ كەتتىك».
«ٴبىر-ٴبىرىڭدى قابىلداڭدار»
تانىمايتىن ادامدارعا تولى جاڭا قاۋىمعا بارۋ كەيبىرەۋلەر ٷشىن وڭاي ەمەس. قاۋىمىمىزعا جاڭادان كەلگەندەر وزدەرىن ەركىن سەزىنە الۋلارى ٷشىن ٴبىز نە ىستەسەك بولادى؟ ەلشى پاۋىل: «ٴماسىح ٴبىزدى قالاي قابىلداعان بولسا، سەندەر دە ٴبىر-ٴبىرىڭدى سولاي قابىلداڭدار»،— دەگەن (ريم. 15:7). ماسىحكە ەلىكتەپ، اقساقالدار جاڭادان كەلگەن باۋىرلاستاردى جىلى قارسى الىپ، وزدەرىن جايلى سەزىنۋلەرىنە جاعداي جاساي الادى (« جاڭا جەرگە تاستاي باتىپ، سۋداي ٴسىڭۋ ٷشىن» دەگەن قورشاۋدى قاراڭىز). ٴبىراق تەك اقساقالدار عانا ەمەس، قاۋىمدا ٴبارىمىز دە، ٴتىپتى بالالار دا بۇعان ۇلەس قوسا الادى.
ٴبىر-ٴبىرىمىزدى قابىلداۋعا باۋىرلاستاردى قوناققا شاقىرۋ جانە ٸس جۇزىندە كومەك كورسەتۋ جاتادى. مىسالى، ٴبىر ايەل باۋىرلاس التىن ۋاقىتىن اياماي، جاڭادان كوشىپ كەلگەن باۋىرلاسقا قالانى كورسەتكەن جانە قوعامدىق كولىكتەردىڭ قالاي جۇرەتىنىن تۇسىندىرگەن. بۇنداي كومەككە ريزا بولعان جاڭادان كەلگەن باۋىرلاس قاۋىمعا تەز-اق ٴسىڭىسىپ كەتتى.
رۋحاني ٶسۋدىڭ مۇمكىندىگى
شەگىرتكە ۇشاتىن قاناتى پايدا بولعانعا دەيىن بىرنەشە رەت تەرىسىن تاستايدى. تۋرا سولاي، جاڭا قاۋىمعا اۋىسقاندا سىزگە دە ەحوباعا قاناتىڭىزدى كەڭ جايىپ، قىزمەت ەتۋگە كەدەرگى بولاتىن جايتتاردان ارىلۋعا تۋرا كەلەدى. نيكولاس پەن سەلەن بىلاي دەيدى: «جاڭا جەرگە كوشۋدى وزىندىك ٴبىر مەكتەپ دەۋگە بولادى. ويتكەنى جاڭا ادامدار مەن جاڭا ورتاعا ۇيرەنىسۋ ٷشىن جاڭا قاسيەتتەردى تانىتۋدى ۇيرەنەسىڭ. كىرىسپە ابزاستا ايتىلعان دجون-چارلز باۋىرلاس باسقا قاۋىمعا كوشكەندەرى وتباسىنا جاقسى ىقپال ەتكەنىن ايتتى. ول بىلاي دەيدى: «جاڭا قاۋىمدا بالالارىمىز اشىلىپ، گۇلدەي جاينادى. بىرنەشە ايدان كەيىن قىزىمىز اپتا ىشىندەگى كەزدەسۋدە تاپسىرمامەن شىقتى. ال ۇلىمىز شومىلدىرۋ راسىمىنەن وتپەگەن جاريالاۋشى بولدى».
ال ەگەر باسقا جاققا، مىسالى، قاجەتتىلىك بار جەرگە كوشىپ بارۋعا مۇمكىندىگىڭىز بولماسا، نە ىستەسەڭىز بولادى؟ وسى ماقالاداعى كەڭەستەردى نەگە ٶز قاۋىمىڭىزدا قولدانىپ كورمەسكە؟! ەحوباعا ارقا سۇيەپ، قاۋىم ىستەرىنە بارىنشا اتسالىسىڭىز. مىسالى، قاۋىمداعى باۋىرلاستارمەن قىزمەتكە شىعىڭىز. جاڭا دوستار تابىڭىز. بار دوستارىڭىزبەن اراقاتىناستارىڭىزدى جاقسارتا بەرىڭىز. بالكىم، جاڭادان كەلگەندەرگە نە مۇقتاجدىق كورىپ جۇرگەن باۋىرلاستارعا ٸس جۇزىندە قانداي دا ٴبىر كومەك كورسەتە الارسىز. وزگەلەرگە سۇيىسپەنشىلىك تانىتىپ، ولارعا كومەكتەسسەڭىز، بۇل رۋحاني وسۋىڭىزگە سەپتىگىن تيگىزەدى. ويتكەنى سۇيىسپەنشىلىكتى شىنايى ماسىحشىلەر عانا تانىتادى (جوح. 13:35). سونداي-اق «مۇنداي قۇرباندىقتار قۇدايعا ۇنامدى» ەكەنىنە سەنىمدى بولىڭىز (ەۆر. 13:16).
قيىندىقتارعا قاراماستان كوپتەگەن باۋىرلاستار جاڭا قاۋىمدارىنا تاستاي باتىپ، سۋداي سىڭگەن. بۇل ٴسىزدىڭ دە قولىڭىزدان كەلەدى! «قاۋىمىمدى اۋىستىرعانىم جۇرەگىمدى ايقارا اشۋعا كومەكتەستى»،— دەيدى اننا-ليز. ال كازۋمي باسقا جاققا كوشكەننىڭ ارقاسىندا ەحوبانىڭ قولداۋىن باسقا قىرىنان كورگەن. ال جۋل بىلاي دەيدى: «دوستارىمنىڭ ارقاسىندا قازىر ٶزىمدى بوتەن سەزىنبەيمىن، قاۋىمدا ٶز ورنىم بار. ەندى مەن بۇل قاۋىمدى دا قيمايتىن سياقتىمىن».
a جاڭا جەردە جالعىزدىق سەزىنگەندە كومەك بولاتىن ويلاردى 1994-جىلعى، 15-مامىر ايىنداعى «كۇزەت مۇناراسىنىڭ» «كاك بىت پروپوۆەدنيكۋ، كوگدا توميت نوستالگيا» (حانزۇشا) دەگەن ماقالاسىنان قاراڭىز.
