Ndaakũrĩire taũni-inĩ ya Los Angeles, California, U.S.A., kũndũ kwoĩkaine mũno nĩ ũndũ wa ikundi cia ũkora na ndawa cia kũrebia. Twaciarĩtwo tũrĩ atandatũ, na ndaarĩ wa kerĩ.

Twarereiruo kanitha wa evangelical nĩ mami. O na kũrĩ ũguo, ndĩ tinĩnja ndaikaraga mũtũũrĩre wa ũhinga. Mũthenya wa Kiumia ndainaga na kwaya ya kanitha, no thikũ ici ingĩ cia kiumia, ndaathingataga ikeno, ngahũthĩra ndawa cia kũrebia, na mĩtugo mĩũru ya ngomanio.

Nĩ ndahiũkagĩrũo na ngarakara ũru mũno. Gũtirĩ kĩndũ itangĩahũthĩrire nĩguo hingie wendi wakwa. Maũndũ marĩa ndeerutaga kanitha matiandeithagia. Ndoigaga ũũ: “Kũrĩhanĩria nĩ kwa Mwathani—na nĩ niĩ ahũthagĩra!” Rĩrĩa ndaarĩ sekondarĩ mũthia-inĩ wa mĩaka ya 1960, nĩ ndagucĩrĩirio nĩ gĩkũndi kĩa ũteti kĩeĩtaga Black Panthers, kĩrĩa kĩahũthagĩra gĩthũri gũtetera ihooto cia ũmũndũ. Ngĩtuĩka memba wa gĩkundi kĩa arutwo kĩrĩa kĩarũagĩrĩra ihooto cia ũmũndũ cia arutwo. Nĩ twatongoririe mĩgomo maita maigana ũna, na o twagoma cukuru ĩkahingwo kwa ihinda.

Ĩndĩ nĩ ũndũ wa ũmũndũ wakwa wa kwenda maũndũ ma ũhinya, ndiaiguaga ngĩiganĩra no kũgoma na kũrũrũngana tu. Nĩ ũndũ ũcio ngĩambĩrĩria kwĩingĩrania na wĩki naĩ ũtongoretio nĩ mũthutũkanio wa kĩĩrũrĩrĩ. Kwa ngerekano, hĩndĩ ĩmwe twĩ na arata akwa nĩ tweroreire thenema cionanagia ũrĩa ngombo cia kuuma Afrika cianyamaragio tene thĩinĩ wa Amerika (U.S). Waagi ũcio wa kĩhooto watũmire twakanwo nĩ marakara, ũũ atĩ twatharĩkĩire mwanake ũmwe mũthũngũ o rĩo, tũrĩ o kũu tweroragĩra thenema. Thutha ũcio tũgĩthiĩ matũũra-inĩ marĩa maaikaragwo nĩ athũngũ, gwetha athũngũ angĩ nĩguo tũmahũũre.

Ngĩkinyia mĩaka hakuhĩ mĩrongo ĩrĩ, twĩ na ariũ a maitũ nĩ twekaga maũndũ maingĩ mũno moru na ma ũhinya. Nĩ twahĩngĩcanaga na borithi kaingĩ. Ũmwe wa ariũ a maitũ arĩa anyinyi, aarĩ mũmemba wa gĩkundi kĩarĩ kĩũru mũno, na nĩ ndaanyitanagĩra na kĩo. Ũtũũro wakwa wathiaga ũgĩthũkaga o gũthũka.

Aciari a mũrata ũmwe wakwa maarĩ Aira a Jehova. Nĩ maanyitire ũgeni thiĩ gĩthomo-inĩ kĩao, na niĩ ngĩtĩkĩra. Kuuma o kĩambĩrĩria nĩ ndonire ũrĩa Aira a Jehova marĩ ngũrani na andũ arĩa angĩ. O ũmwe wao aarĩ na Bibilia na nĩ aamĩhũthagĩra gĩthomo-inĩ. Nginya andũ ethĩ  maarĩ na icunjĩ thĩinĩ wa programu! Nĩ ndaakenire mũno kũmenya atĩ Ngai nĩ arĩ rĩĩtwa, Jehova, na kũigua rĩkĩhũthĩrũo. (Thaburi 83:18) Aira acio a Jehova maarĩ andũ a kuuma mabũrũri matiganĩte, no matiarĩ na mũthutũkanio wa kĩĩrũrĩrĩ o na hanini.

Kĩambĩrĩria-inĩ, ndiendaga kwĩruta Bibilia na Aira a Jehova, no nĩ ndaakenaga gũthiĩ gĩthomo-inĩ kĩao. Hwaĩ-inĩ ũmwe, ndĩ gĩthomo-inĩ kĩa Aira a Jehova, gĩkundi kĩa arata akwa nĩ maathire kũndũ kwainagwo makerorere. Marĩ kũu, nĩ maahũrire tinĩnja ũmwe nginya agĩkua nĩ ũndũ wa kũrega kũmanengera igooti rĩake rĩa goro. Mũthenya ũyũ ũngĩ, meeganaga mũno nĩ ũndũ wa kũũragana. O na marĩ igooti-nĩ magĩciirithio, mationaga ta kũrĩ ũndũ mũnene mekĩte. Aingĩ ao moohirũo maisha. Hatarĩ nganja nĩ ndaiguire ndakena mũno nĩ gũkorũo ndiarĩ hamwe nao ũtukũ ũcio. Ngĩtua itua rĩa kũgarũrĩra mũtũũrĩre wakwa na ngĩambĩrĩria kwĩruta Bibilia.

Nĩ ũndũ wa gũkorũo ndĩyoneire mũthutũkanio wa kĩĩrũrĩrĩ, nĩ ndonire maũndũ maangegirie gatagatĩ-inĩ ka Aira a Jehova. Kwa ngerekano, rĩrĩa Mũira ũmwe wa Jehova mũthũngũ aabatarire gũthiĩ thabarĩ, aatigĩire famĩlĩ ya andũ airũ ciana ciake mamũroragĩre. Ningĩ, famĩlĩ ĩmwe ya athũngũ, nĩ mooire mwanake ũtaarĩ mũthũngũ, wabataraga handũ ha gũikara. Ngĩgĩa na ũũma biũ atĩ Aira a Jehova nĩo mahingagia ciugo ici cia Jesu ciandĩkĩtwo thĩinĩ wa Johana 13:35: “Nĩ ũguo andũ othe marĩmenyaga mũrĩ arutwo akwa—mwatũũra mwendaine.” Ngĩmenya nĩ ndagĩa na aarĩ na ariũ a Ithe witũ a ma.

Kuumana na kwĩruta Bibilia, nĩ ndaambĩrĩirie kuona nĩ njagĩrĩire gũcenjia mwĩcirĩrie wakwa. Ngĩtua itua rĩa kwerũhia meciria makwa nĩguo ndigatuĩke o mũndũ wa kũiga thayũ tu, no nyone ũndũ ũcio ũrĩ guo njĩra ĩrĩa njega ya ũtũũro. (Aroma 12:2) Kahora kahora ngĩka mogarũrũku. Ngĩbatithio Janũarĩ mwaka wa 1974, ngĩtuĩka Mũira wa Jehova.

No o na thutha wa kũbatithio, no ndabataraga gũthiĩ na mbere kũniina marakara makwa. Kwa ngerekano, hĩndĩ ĩmwe ngĩhunjia nyũmba kwa nyũmba, nĩ ndaingatithirie mũici waiyĩte redio kuuma ngaari-inĩ yakwa. Ndĩ hakuhĩ kũmũkinyĩra-rĩ, akĩrekia redio na akĩũra. Rĩrĩa ndataarĩirie arĩa twarĩ nao ũrĩa ndeka nĩguo njokerio redio yakwa, mũthuri ũmwe wa kĩũngano akĩnjũria ũũ: “Stephen, korũo nĩ wanyita mũndũ ũcio ũngĩamwĩka atĩa?” Kĩũria kĩu nĩ gĩatũmire ndĩcũranie, na gĩgĩtũma nyende mũno kwĩrutanĩria gũtuĩka mũndũ wa kũiga thayũ.

Mwaka-inĩ wa 1974 mweri wa Oktomba, nĩ ndambĩrĩirie gũtungata ndĩ mũhunjia wa hĩndĩ ciothe, o mweri ngahũthĩra mathaa 100 ngĩthomithia andũ Bibilia. Thutha-inĩ, nĩ ndagĩire na mweke wa kwĩrutĩra gũtungata wabici-inĩ nene ya Aira a Jehova ĩrĩa ĩkoragwo Brooklyn, New York. Mwaka-inĩ wa 1978, ngĩcoka Los Angeles gũtumberia mami tondũ arĩ mũrwaru. Mĩaka ĩrĩ thutha ũcio ngĩhikia Aarhonda, mũtumia wakwa nyendete mũno. Aarĩ ũteithio mũnene mũno harĩ niĩ rĩrĩa twatumberagia mami nginya rĩrĩa Mami aakuire. Thutha wa ihinda, twĩ na Aarhonda nĩ twathire Cukuru ya Bibilia ya Gileadi na tũgĩtũmwo Panama, kũrĩa tũtungataga tũrĩ amishonarĩ.

Kuuma ndabatithio, nĩ njemanĩtie na maũndũ maingĩ mangĩtũma njinwo nĩ marakara. Nĩ ndĩrutĩte kweheragĩra andũ arĩa marageria kũndakaria kana ngageria kũhooreria ũndũ ũcio na njĩra ingĩ. Andũ aingĩ, o hamwe na mũtumia wakwa nĩ manangathĩrĩria nĩ ũrĩa hotete kũhiũrania na maũndũ macio. Rĩmwe o na ndiĩtĩkagia atĩ nĩ niĩ! Ndingiuga atĩ nĩ niĩ hotete kwĩgarũra. Handũ ha ũguo, njĩtĩkĩtie atĩ mogarũrũku macio nĩ ũira wa atĩ Bibilia nĩ ĩrĩ ũhoti wa kũgarũra mũndũ.—Ahibirania 4:12.

Bibilia nĩ ĩndeithĩtie kũgĩa na ũtũũro ũrĩ na muoroto na ngahota kũiga thayũ. Rĩu ndihũũraga andũ, ithenya rĩa ũguo, ndĩmateithagia kũgunĩka kĩĩroho. O na nĩ hotete kwĩruta Bibilia na mũndũ ũmwe twarĩ ũthũ nake twĩ cukuru! Na abatithio tũgĩikara nyũmba ĩmwe nake kwa ihinda. O na nginya ũmũthĩ, tũkoragwo tũrĩ arata a hakuhĩ. Gũkinyĩria rĩu, twĩ na mũtumia wakwa nĩ tũteithĩtie andũ 80 matuĩke Aira a Jehova na njĩra ya kwĩruta Bibilia nao.

Nĩ njokagĩria Jehova ngatho ngenete mũno nĩ ũndũ wa kũũhe ũtũũro ũrĩ na muoroto na gĩkeno, gatagatĩ-inĩ ka ũrũmwe wa aarĩ na ariũ a ithe witũ a ma.