Baba aathamire kuuma Njĩrĩmani agĩthiĩ Australia mwaka-inĩ wa 1949. Aathire gũcaria wĩra kware na iganda-inĩ cia gũthondeka thitima na agĩtuĩka mũikari gĩcagi-inĩ kĩmwe mwena wa Victoria. Kũu nĩkuo maahikanĩirie na mami, na niĩ ngĩciarũo mwaka wa 1953.

Mĩaka mĩnini thutha ũcio, mami nĩ aambĩrĩirie kwĩruta Bibilia na Aira a Jehova na kwoguo nĩ ndaamenyire morutani ma Bibilia ndĩ o mũnini. O na kũrĩ ũguo, baba ndeendaga kũigua ũhoro wa ndini ĩrĩkũ kana ĩrĩkũ. Aambĩrĩirie kũhũthagĩra ũhinya na kũrũa mbaara ya heho, na ũndũ ũcio ũgĩtũma mami amwĩtigĩre mũno. Mami nĩ aathire na mbere kwĩruta Bibilia na hitho na akĩenda morutani mayo mũno. Rĩrĩa baba atarĩ kuo, nĩ aatũrutaga maũndũ marĩa eerutĩte tũrĩ na mwarĩ wa maitũ. Nĩ aatwĩraga ũhoro wa rĩrĩa thĩ ĩgaatuĩka paradiso na ũrĩa tũngĩkorũo na gĩkeno twarũmĩrĩra ithimi cia Bibilia ciĩgiĩ mĩtugo.—Thaburi 37:10, 29; Isaia 48:17.

Ndakinyia mĩaka 18, nĩ ndoimire mũciĩ nĩ ũndũ wa baba kũhũthĩra ũhinya. O na gũtuĩka nĩ ndetĩkĩtie maũndũ ma Bibilia marĩa mami aandutĩte, ndiamoire na ũritũ. Kwoguo ndiamarũmĩrĩire. Nĩ ndambĩrĩirie kũruta wĩra wa thitima na ndakinyia mĩaka 20 ngĩhikania. Mĩaka ĩtatũ thutha ũcio, nĩ twagĩire na kairĩtu gaitũ ka mbere na ngĩambĩrĩria gwĩciria ũhoro wa ũtũũro wakwa. Nĩ ndamenyaga atĩ Bibilia nĩ ĩngĩateithirie famĩlĩ yakwa, na kwoguo ngĩambĩrĩria kwĩruta Bibilia na Aira a Jehova. Ĩndĩ mũtumia wakwa ndeendaga ũhoro wao o na hanini. Hĩndĩ ĩmwe ndathiĩ mĩcemanio ya Aira a Jehova, aanjĩrire maũndũ nĩ merĩ—ndige kwĩruta Bibilia kana tuumanwo. Nĩ ndaarigirũo ũrĩa ngwĩka na kwoguo ngĩtiga kwĩruta Bibilia. Ndacokire kwĩrira thutha ũcio nĩ ũndũ wa kwaga kũrũmĩrĩra ũndũ ũrĩa ndoĩ nĩguo wagĩrĩire.

Hĩndĩ ĩmwe andũ arĩa twarutaga wĩra nao nĩ maambĩrĩirie kũnyonia mbica cia ũũra-thoni. Ndaiguaga ikĩngucĩrĩria no ngona irĩ njũru mũno, na nĩ ciatũmaga njigue hĩtĩtie mũno. Ndaririkana maũndũ ma Bibilia marĩa nderutĩte, nĩ ndonaga biũ no mũhaka Ngai angĩaherithirie. Ĩndĩ o ũrĩa ndaakĩragĩrĩria kwĩrorera mbica icio, noguo muonere wakwa harĩ mbica cia ũũra-thoni wacenjirie. Ndiaikarire itatuĩkĩte ngombo ya cio.

Mĩaka 20 ĩrĩa yarũmĩrĩire, mũtũũrĩre wakwa wathiaga ũraihanĩrĩirie biũ na maũndũ ma Bibilia marĩa mami aandutĩte. Ciĩko ciakwa  cionanagia maũndũ marĩa ndaingĩragia meciria-inĩ makwa. Ndahũthagĩra mĩario mĩũru na ngakorũo na itherũ ihunyũku rĩa maũndũ ma ũũra-thoni. Nĩ ndaakũririe muonere mũhĩtanu wĩgiĩ ngomanio. O na gũtuĩka ndaarĩ na mũtumia, nĩ ndatumaga ndũgũ na atumia angĩ. Mũthenya ũmwe nĩ nderorire gĩcicio-inĩ ngĩigua ndemena mũno. Ndaiguaga ĩtarĩ kĩene.

Kĩhiko gĩakwa nĩ kĩaharaganire na ũtũũro wakwa ũgĩthũka biũ. Nĩ ndaitũrũrĩire Jehova ngoro yakwa. Ngĩcokerera kwĩruta Bibilia o na gũtuĩka mĩaka mĩrongo ĩĩrĩ nĩ yahĩtũkĩte. Gũkinyĩria hĩndĩ ĩyo baba nĩ aakuĩte, nake mami nĩ aabatithĩtio agatuĩka Mũira wa Jehova.

Mũtũũrĩre wakwa warĩ na ngũrani nene mũno na ũrĩa Bibilia ĩrutanaga. No rĩu nĩ ndatuĩte itua rĩa kũgĩa na thayũ wa meciria ũrĩa Bibilia ĩranĩire. Nĩ ndeigĩire muoroto wa kwaragia mĩario mĩtheru na gũtiga marakara. O na ningĩ nĩ ndatuire itua rĩa gũikaraga na mĩtugo mĩtheru, ngĩtiga gũũtha kamarĩ, kũnyua gũkĩria gĩthimi, na kũiya ũrĩa wanyandĩkĩte.

Andũ arĩa twarutithanagia wĩra nao matiataũkagĩrũo nĩ kĩrĩa gĩatũmaga nyende gwĩka mogarũrũku manene ũguo. Kwa ihinda rĩa mĩaka ĩtatũ, nĩ maaikaraga makĩndindĩkagĩrĩria njokerere mĩtugo yakwa ya hau kabere. Ingĩahĩtanirie ndakare kana njuge kiugo kĩmwe tu kĩũru, moigagĩrĩria makenete makoiga: “Ĩĩni! Ũyũ nĩwe Joe ũrĩa tũĩ!” Ciugo icio cianduuraga mũno. Ndonaga ta gũtarĩ hĩndĩ ngahota kwĩhanda.

Wĩra-inĩ kwaiyũire mbica cia ũũra-thoni, ti kompiuta-inĩ, ti mabuku-inĩ, kana kũndũ kũngĩ. Kaingĩ arĩa twarutaga wĩra nao nĩ maamenyerete gũtũmanagĩra mbica njũru kũgerera kompiuta, o ta ũrĩa o na niĩ ndekaga mbere ĩyo. Nĩ ndeerutanagĩria mũno gwĩthema mbica njũru, ĩndĩ nĩ mehotorete gũtigĩrĩra atĩ nĩ ndagũa. Ndathiire gũcaria ũteithio kũrĩ ũrĩa wandutaga Bibilia. Nĩ aathikĩrĩirie arĩ na wetereri ngĩmũitũrũrĩra ngoro. Aahũthĩrire Maandĩko marĩa maaringanaga na thĩna wakwa, akĩnyonia ũrĩa ingĩka nĩguo ndĩũtoorie, na akĩnjĩkĩra ngoro njarie ũteithio wa Jehova na njĩra ya kũhoyaga kaingĩ.​—Thaburi 119:37.

Mũthenya ũmwe nĩ ndaabangire mũcemanio hamwe na arĩa twarutithanagia wĩra nao. Twacemania ngiuga atĩ andũ erĩ arĩa moĩkaine nĩ merutanagĩria gũtiga njohi maheo mũcuba. Andũ othe makĩregana na ũndũ ũcio makiuga: “Aca tũtingĩka ũguo! Athuri aya marakĩgeria kũrũa na njohi!” Ngĩmera o na niĩ noguo ndĩrageria kũrũa na mbica cia ũũra-thoni. Kuuma mũthenya ũcio, nĩ maataũkĩirũo ũrĩa nderutanagĩria kuuma ũkombo-inĩ wa mbica cia ũũra-thoni na matiacokire kũndindĩkĩrĩria rĩngĩ njokerere mĩtugo yakwa ya hau kabere.

Thutha wa ihinda nĩ ndahotire kwĩhanda, ngĩĩmunya ũkombo-inĩ ũcio kũgerera ũteithio mũnene wa Jehova. Nĩ ndaabatithirio mwaka wa 1999 ngĩtuĩka Mũira wa Jehova, na nĩ ngenaga mũno nĩ ũndũ wa kũheo mweke wa kerĩ wa gũkorũo na mũtũũrĩre mwega na ũrĩ na gĩkeno.

Rĩu nĩ ndaũkagĩrũo nĩ kĩĩ gĩtũmaga Jehova athũũre maũndũ marĩa ndeendete. Arĩ Ithe witũ ũrĩ wendo, nĩ kũngitĩra aangitagĩra kuumana na moimĩrĩro moru ma mbica cia ũũra-thoni. Nĩ nyonete ũũma wa ciugo cia Thimo 3:5, 6. Ciugaga ũũ: “Ĩhokage Jehova na ngoro yaku yothe, ũtigage gwĩtiirania na mbuguĩro yaku mwene; Mwĩtĩkagĩre o we mĩthiĩre-inĩ yaku yothe, nacio njĩra ciaku nĩarĩkũrũngagĩra.” Ithimi cia Bibilia nĩ itũgitagĩra na makĩria igatũma tũgaacĩre.—Thaburi 1:1-3.

Tene nĩ ndaiguaga ndĩmenete mũno, no rĩu ndĩ na thayũ wa meciria na nĩ ndĩheete gĩtĩo. Njikaraga mũtũũrĩre mũtheru na ndirĩ na nganja atĩ Jehova nĩ andekeire na akandeithia. Mwaka-inĩ wa 2000, nĩ ndaahikirie mwarĩ wa Ithe witũ ũmwe mũthaka wĩtagwo Karolin, na nĩ endete Jehova o ta niĩ. Mũciĩ witũ ũkoragwo ũiyũire thayũ. Tũiguaga tũrĩ na gĩtĩo kĩa mwanya gũkorũo tũrĩ gĩcunjĩ kĩa ũrũmwe wa aarĩ na ariũ a Ithe witũ thĩinĩ wa thĩ yothe arĩa makoragwo na wendo na maikaraga mũtũũrĩre mũtheru.