Nicolas na Céline nĩ maacemanirie na ũritũ ngũrani. Nĩ mooririo mathamĩre kĩũngano-inĩ kĩngĩ nĩ wabici ya rũhonge ya Faranja na magĩtĩkĩra. Maaugire ũũ: “Kĩambĩrĩria-inĩ nĩ twakenire, no thutha-inĩ nĩ twaiguire twagĩte arata aitũ mũno. Tũtiakoretwo tũgĩte na ũrata wa hakuhĩ na aarĩ na ariũ a Ithe witũ a kĩũngano kĩu twathamĩire.” a Nĩ ũndũ wa moritũ ta macio-rĩ, ũngĩhota atĩa gũtũũria gĩkeno na gũthiĩ na mbere gũkũra kĩĩroho rĩrĩa wathamĩra kĩũngano-inĩ kĩerũ? Andũ arĩa angĩ mangĩteithĩrĩria atĩa? Na ũngĩgĩa na irathimo irĩkũ cia kĩĩroho na ũtuĩke kĩrathimo harĩ kĩũngano kĩu ũthamĩire?

MAŨNDŨ MANA MANGĨGŨTEITHIA KŨHIŨRANIA NA MORITŨ MACIO

1. Wĩhokage Jehova. (Thab. 37:5) Mwarĩ wa Ithe witũ ũmwe wĩtagwo Kazumi, kuuma bũrũri-inĩ wa Japan, nĩ aathamire kĩũngano aaikarĩte kwa ihinda rĩa mĩaka 20 rĩrĩa mũthuri wake aathamirio kũrĩa aarutaga wĩra. ‘Aarekereirie njĩra yake harĩ Jehova’ atĩa? Aaugire ũũ: “Ndaitũrũragĩra Jehova ngoro yakwa, ngamũmenyithia ũhoro wĩgiĩ guoya ũrĩa ndarĩ naguo, ihooru, na mĩtangĩko yakwa. Rĩrĩa rĩothe ndeekaga ũguo, nĩ aaheaga hinya ũrĩa ndabataraga.”

Nĩ kĩĩ kĩngĩgũteithia kwĩhoka Jehova o na makĩria? O ta ũrĩa mũmera ũbataraga maĩ na tĩri mũnoru nĩgetha ũkũre, no taguo wĩtĩkio witũ ũbataraga indo cia kũwĩkĩra hinya. Nicolas ũcio wagwetwo kĩambĩrĩria-inĩ, nĩ oonire atĩ gwĩcũrania kĩonereria kĩa Iburahimu, Jesu, na Paulo—arĩa meeimire mũno nĩguo meke wendi wa Ngai—nĩ gwatũmire akorũo na ma biũ atĩ Jehova nĩ angĩamũteithirie.  Kwĩruta Bibilia ũtegũtĩrĩria nĩ kũrĩgũteithagia kũhiũrania na mogarũrũku o mothe ũngĩcemania namo ũtũũro-inĩ, na wĩrute maũndũ ũngĩhũthĩra gwĩkĩra ngoro arĩa angĩ kĩũngano-inĩ kĩu ũthamĩire.

2. Wĩtheme kũringithania maũndũ. (Koh. 7:10) Mũrũ wa Ithe witũ Jules kuuma Benin nĩ aaritũhĩirũo rĩrĩa aathamĩire Amerika (US), tondũ ũndũire wa kũu warĩ ngũrani na wa kũrĩa aaumĩte. Aaugire: “Ndaiguaga ta ndĩrabatara gũtaarĩria mũndũ o wothe twacemania nake maũndũ mothe manjĩgiĩ.” Tondũ ndaamenyerete gwĩka ũguo, nĩ aambĩrĩirie kwĩyamũrania na kĩũngano. No thutha wa kũmenya wega aarĩ na ariũ a Ithe witũ a kĩũngano kĩu, nĩ aagarũrĩire muonere wake. Aaugire: “Rĩu nĩ menyete atĩ andũ othe nĩ mahaanaine kũndũ guothe thĩinĩ wa thĩ, no mĩĩkĩre yao ya maũndũ nĩyo ngũrani. Nĩ ũndũ wa bata kũmetĩkĩra ũrĩa mahaana.” Kwoguo wĩtheme kũringithania kĩũngano kĩrĩa ũrĩ na kĩrĩa ũrarĩ. Mwarĩ wa Ithe witũ ũmwe painia wĩtagwo Anne-Lise aaugire: “Ndiathamire kĩũngano ngĩrĩgĩrĩra atĩ maũndũ megwĩkwo o ũrĩa ndĩramenyerete. Ndathamire ndĩ na wendi wa kwĩruta maũndũ merũ.”

O na athuri a kĩũngano nĩ magĩrĩirũo gwĩthema kũringithania kĩũngano kĩrĩa mathamĩire na kĩrĩa mararĩ. Gũkorũo atĩ ariũ a Ithe witũ a kĩũngano kĩrĩa ũthamĩire mareka maũndũ na njĩra ngũrani, ti kuuga atĩ no nginya akorũo nĩ marahĩtia. Ũtanaruta mawoni, nĩ ũndũ wa ũũgĩ kwamba kũmenya ũrĩa maũndũ ma kũu mahaana. (Koh. 3:​1, 7b) Nĩ kaba kũmaigĩra kĩonereria handũ ha kũmatindĩkĩrĩria marũmĩrĩre mawoni maku.—2 Kor. 1:24.

3. Nyitanagĩra na arĩa angĩ kĩũngano-inĩ. (Afil. 1:27) Gũthama nĩ kũbataraga mahinda na hinya mũingĩ, no nĩ ũndũ wa bata wambĩrĩrie gũthiaga mĩcemanio o na ihenya wathama o ũguo, na kũngĩhoteka ũthiage ĩmwe kwa ĩmwe. Gĩtũmi nĩ tondũ angĩkorũo aarĩ na ariũ a Ithe witũ a kĩũngano kĩrĩa ũthamĩire matikuonaga kana makuonaga rĩmwe na rĩmwe, no maremwo gũgũteithia. Mwarĩ wa Ithe witũ ũmwe wĩtagwo Lucinda, ũrĩa wathamĩire taũni-inĩ nene thĩinĩ wa South Africa arĩ hamwe na airĩtu ake erĩ, aaugire ũũ: “Twekĩrirũo ngoro tũnyitanagĩre biũ na kĩũngano, tũgathiĩ kũhunjia hamwe na andũ matiganĩte na tũkaruta macokio mĩcemanio-inĩ. Ningĩ nĩ twaheanire mũciĩ witũ ũhũthĩrũo gwĩkĩra mũcemanio wa ũtungata.”

Tũngĩnyitanagĩra na aarĩ na ariũ a Ithe witũ mawĩra-inĩ ma kĩũngano ‘tũrĩ na ũrũmwe,’ nĩ tũrĩkĩraga hinya wĩtĩkio witũ o hamwe na wao. Anne-Lise ũrĩa ũkũgwetetwo nĩ eekĩrirũo ngoro nĩ athuri a kĩũngano kĩrĩa aathamĩire erutanĩrie kũhunjagia na andũ othe kĩũngano-inĩ. Maumĩrĩro maarĩ marĩkũ? Aaugire: “O rĩo nĩ ndamenyire atĩ ũcio nĩ ũndũ wa bata ũngĩteithia mũndũ kũigua aiganĩire kĩũngano-inĩ kĩerũ.” Ningĩ rĩrĩa wateithĩrĩria mawĩra-inĩ ta gũthambia na kũmenyerera Nyũmba ya Ũthamaki, nĩ wonanagia atĩ rĩu nĩ ũrona kĩu kĩrĩ kĩũngano kĩanyu. O ũrĩa ũkũnyitanĩra na kĩũngano kĩu kĩerũ, noguo ũkũingĩrana na ihenya na aarĩ na ariũ a Ithe witũ a kĩũngano kĩu na wĩigue ũrĩ wa famĩlĩ ĩyo ya kĩĩroho.

 4. Caria arata kĩũngano-inĩ kĩu wathamĩra. (2 Kor. 6:​11-13) Njĩra ĩrĩa njega ya gũtua andũ arata nĩ kũmonia atĩ nĩ ũramarũmbũiya, kwoguo tigagĩrĩra atĩ ũrĩ na ihinda rĩiganu mbere na thutha wa mĩcemanio nĩguo waranĩrie nao na ũmamenye wega. Wĩrutanĩrie kũnyita marĩĩtwa mao. Kũririkana marĩĩtwa mao, kũmonia wendo, na gũkorũo tũrĩ andũ mangĩkinyĩrĩka, no gũtũme mende gũtuĩka arata aitũ.

Ndũgetue ũrĩa ũtarĩ atĩ nĩguo wĩtĩkĩrĩke nĩ aarĩ na ariũ a Ithe witũ a kĩũngano kĩu ũthamĩire, no reke makũmenye ũrĩa ũtariĩ kũna. Wĩgerekanie na Lucinda. Aaugire ũũ: “Rĩu nĩ tũgĩte na arata a hakuhĩ tondũ nĩ tuooire ikinya rĩa kũnyitana ũgeni gwitũ mũciĩ.”

“NYITANAGAI ŨGENI”

Andũ amwe no maritũhĩrũo gũkorũo kĩũngano-inĩ kĩrĩ na andũ matoyaine nao. Kwoguo-rĩ, ũngĩka atĩa nĩguo ũteithĩrĩrie andũ arĩa mathamĩire kĩũngano-inĩ kĩanyu kũigua maiganĩire? Mũtũmwo Paulo aaugire ũũ: “Nyitanagai ũgeni, o ta ũrĩa Kristo o nake aamũnyitire ũgeni.” (Rom. 15:7) Athuri a kĩũngano no megerekanie na Kristo, na njĩra ya gũteithĩrĩria arĩa mathamĩire kĩũngano-inĩ kĩao kũigua marĩ anyite ũgeni. (Rora gathandũkũ “ Maũndũ Mangĩgũteithia Rĩrĩa Ũrathama.”) O na kũrĩ ũguo, andũ othe thĩinĩ wa kĩũngano, nginya ciana, no mateithĩrĩrie arĩa mathamĩire kĩũngano-inĩ kĩao.

Makĩria ma kũmanyita ũgeni mĩciĩ-inĩ itũ, no tũmateithĩrĩrie na njĩra ingĩ. Kwa ngerekano, mwarĩ wa Ithe witũ ũmwe nĩ eerutĩire gũteithĩrĩria mwarĩ wa Ithe witũ ũngĩ wathamĩire gĩcigo-inĩ kĩao, na njĩra ya kũmũceerangia taũni-inĩ yao na kũmuonia kũrĩa angĩoera ngaari cia mũingĩ. Mwarĩ wa Ithe witũ ũcio nĩ aahutirio mũno nĩ gĩĩko kĩu, na ũndũ ũcio ũkĩmũteithia kũigua arĩ mũciĩ.

MWEKE WA GŨKŨRA KĨĨROHO MAKĨRIA

Ta wĩcirie ngerekano ĩno. Gĩtono gĩkĩneneha, ngothi yakĩo nĩ ĩĩyũnũraga maita maigana ũna nĩguo kĩhote kũmbũka. Na njĩra o ta ĩyo, rĩrĩa wathamĩra kĩũngano-inĩ kĩngĩ, nĩ wagĩrĩirũo kweheria  ũndũ o wothe ũngĩkũgirĩrĩria kũmbũka na njĩra ya mũhaano kana gũkũra kĩĩroho. Nicolas na Céline maaugire ũũ: “Gũthamĩra kĩũngano-inĩ kĩngĩ nĩ gũtũrutĩte maũndũ maingĩ. Nĩ twabatarire gũkũria ngumo ingĩ nĩguo tũhote kũingĩrana na andũ arĩa twakorire kũu, na kũmenyera gĩcigo kĩu kĩerũ.” Jean-Charles ũrĩa ũkũgwetetwo aaugire ũũ agĩtaarĩria ũrĩa famĩlĩ yake ĩgunĩkĩte: “Gũthamĩra kĩũngano kĩngĩ nĩ gũteithĩtie ciana citũ gũkũra kĩĩroho. Thutha wa mĩeri mĩnini tu, kairĩtu gaitũ nĩ kaambĩrĩirie kũheo tũcunjĩ mũcemanio-inĩ wa gatagatĩ ga kiumia, na kamwana gaitũ gagĩtuĩka mũhunjia ũtarĩ mũbatithie.”

Ĩ angĩkorũo maũndũ maku matingĩgwĩtĩkĩria gũthamĩra kũndũ kũngĩ, ta hihi kũrĩa kũrĩ na bata mũnene wa ahunjia? No ũkenere makĩria ũrĩ o kĩũngano-inĩ kĩu ũrĩ, ũngĩhũthĩra maũndũ macio twarĩrĩria gĩcunjĩ-inĩ gĩkĩ. Wĩhokage Jehova na ũnyitanagĩre biũ na kĩũngano kĩanyu, na njĩra ya kũhunjagia hamwe nao, na kuongerera arata kana gũtuĩka mũrata mwega makĩria. Ningĩ no wĩrutĩre gũteithĩrĩria arĩa mathamĩire kĩũngano-inĩ kĩanyu, kana arĩa marĩ na ũbataro. Na tondũ wendo nĩguo wonanagia atĩ tũrĩ Akristiano a ma, gũteithĩrĩria andũ arĩa angĩ na njĩra ta icio nĩ kũrĩgũteithagia gũkũra kĩĩroho. (Joh. 13:35) Korũo na ma atĩ “Ngai nĩ akenagio mũno nĩ magongona ta macio.”—Ahib. 13:16.

O na kũrĩ na moritũ ta macio, Akristiano aingĩ arĩa mathamĩire kĩũngano kĩngĩ nĩ magĩte na gĩkeno na magakũra kĩĩroho, na o nawe no ũhote. Anne-Lise aaugire ũũ: “Gũthamĩra ciũngano ingĩ nĩ kũndeithĩtie kũgĩa na arata aingĩ.” Nake Kazumi rĩu nĩ akoragwo na ma atĩ gũthamĩra kĩũngano kĩngĩ no gũkũhe mweke wa “kuona Jehova agĩgũteithia na njĩra ũtarĩ weyonera mbere ĩyo.” Jules nake aaugire ũũ: “Arata arĩa ngĩte nao nĩ mandeithĩtie kũigua njiganĩire. Rĩu nyonaga kĩu kĩrĩ kĩũngano gitũ, na no nditũhĩrũo mũno ingĩthama.”