Ta wĩcirie ũndũ ũyũ: Julia erora gĩcicio-inĩ eyonaga arĩ mũtungu. Akeĩra ũũ: “Nĩ ndĩrabatara gũcekacekeha,” o na gũtuĩka aciari na arata ake mamwĩraga atĩ nĩ mũceke mũno.

Ica ikuhĩ Julia nĩ ecirĩtie kuoya makinya nĩguo ate kilo nini. Ageciria kwaga kũrĩa thikũ cigana ũna . . .

Ũngĩka atĩa ũngĩkorũo na mawoni ta ma Julia?

Ti ũũru gũtangĩka nĩ ũrĩa ũkoragwo ũhaana. O na Bibilia nĩ ĩgwetete athuri na atumia maarĩ athaka ta Sara, Rakeli, Abigaili, Jusufu na Daudi. Bibilia yugaga atĩ mũirĩtu wetagwo Abishagi aarĩ “mũthaka mũno.”—1 Athamaki 1:4.

O na kũrĩ ũguo, andũ aingĩ ethĩ nĩ mathumbũkaga mũno nĩ ũrĩa mahaana. Ũndũ ũcio no ũrehe mathĩna manene mũno. Ta wĩcirie:

• Ũtuĩria ũmwe wonanirie atĩ gĩcunjĩ kĩa 58 harĩ 100 kĩa airĩtu nĩ moigaga atĩ maarĩ atungu mũno, no ma nĩ atĩ no gĩcunjĩ gĩa 17 maarĩ atungu mũno.

• Ũtuĩria ũngĩ wonanirie atĩ gĩcunjĩ gĩa 45 harĩ 100 gĩa atumia nĩ meeciragia atĩ maarĩ atungu, no maarĩ na kilo nini mũno.

• Andũ amwe ethĩ nĩ magũaga mũtego-inĩ wa kwaga kũrĩa wega magĩtigĩra gũtunguha.

 Ũngĩkorũo nĩ ũgwĩte mũtego-inĩ ũcio, caria ũteithio. Ambĩrĩria na kwaria na mũciari ũhoro ũcio kana mũndũ ũngĩ mũgima wĩhokete. Bibilia yugaga ũũ: “Mũrata wa mũndũ amwendaga o hingo ciothe; aciaragwo atuĩke mũrũ wa nyina hingo ya mĩnyamaro.”—Thimo 17:17.

Mũndũ wa na thĩinĩ nĩwe ũtũmaga mũndũ agucĩrĩrie kana age. Ta wĩcirie ũhoro wa Abisalomu, mũrũ wa Mũthamaki Daudi. Bibilia yugaga ũũ:

“Gũtiarĩ mũndũ ũngĩ o na ũmwe waganagwo gũthakara. . . . Hatirĩ handũ o na hamwe haarĩ ũcuke.”—2 Samueli 14:25.

O na kũrĩ ũguo, mwanake ũcio aarĩ mwĩtĩi, eendete ũnene, na aarĩ na waara. Nĩ ũndũ ũcio, Bibilia ndĩmwaragĩrĩria na njĩra njega tondũ yonanagia ndaarĩ mwĩhokeku na aarĩ na rũmena rũingĩ.

Nĩkĩo Bibilia ĩtũheaga ũtaaro ũyũ:

“Mwĩhumbe ũmũndũ mwerũ.”—Akolosai 3:10.

“Mũtikareke kwĩgemia kwanyu gũkoragwo kũrĩ o kwa na igũrũ . . . , no gemagiai mũndũ wa hitho ũrĩa wa ngoro thĩinĩ.”—1 Petero 3:3, 4.

O na gũtuĩka kwenda gũkorũo tũrĩ athaka ti ũndũ mũru, ũndũ ũrĩa wa bata makĩria nĩ ngumo ciaku. Ngumo ciaku njega nĩ irĩtũmaga andũ arĩa angĩ magucĩrĩrio nĩwe makĩria gũkĩra ũthaka kana ũrĩa mwĩrĩ waku ũhaana. Mũirĩtu ũmwe wĩtagwo Peris oigire ũũ: “Ũthaka waku no ũgucĩrĩrie andũ na ihenya, ĩndĩ ũrĩa ũtariĩ na thĩinĩ na ngumo ciaku njega nĩcio ĩrĩririkanagwo mũno.”

Hihi kaingĩ nĩ ũiguaga ũũru nĩ ũrĩa ũhaana?

Hihi kũrĩ hĩndĩ wanaga kũrĩa wega nĩguo ũcenjie ũrĩa ũtariĩ?

Nĩ maũndũ marĩkũ ũngĩcenjia megiĩ ũrĩa ũhaana angĩkorũo no ũhote? (Thiũrũrũkĩria marĩa ũngĩcenjia.)

• ŨRAIHU

• KILO

• NJUĨRĨ

• MWĨRĨ WAKU

• ŨTHIŨ

• RANGI WA NGOTHI YAKU

Angĩkorũo wacokia ĩĩ harĩ ciũria cia mbere igĩrĩ, na wathiũrũrũkĩria maũndũ matatũ kana makĩria harĩ kĩũria gĩa gatatũ, kũrĩ na ũhotekeku mũnene atĩ andũ arĩa angĩ matikuonaga na njĩra njũru ta ũrĩa wĩyonaga. Nĩ ũndũ mũhũthũ kũgeria gwĩka maũndũ maingĩ na gũtangĩka na gĩkĩro kĩnene nĩ ũndũ wa ũrĩa ũhaana.—1 Samueli 16:7.