Lynnong 01

Kumno ka Baibl ka Lah ban Ïarap Ïa Phi?

TEM

Jan baroh na ngi, ngi don ki jingkylli shaphang ka jingim, ka jingjynjar, ka jingiap bad ka lawei. Ngi khuslai ruh ïa ka jingim kaba man la ka sngi, kum ïa ka kamai kajih bad kumno ban ïoh ïa ka ïing ka sem kaba suk kaba kmen. Bun ki shem ba ka Baibl ka jubab ym tang ïa ki jingkylli ba kongsan jong ka jingim, hynrei ka hikai ruh kumno ban im man la ka sngi. Ka Baibl ka lah ban ïarap ïa ngi baroh.

1. Kum kiei ki jingkylli kiba ka Baibl ka jubab?

Ka Baibl ka jubab ïa kum kine ki jingkylli: Balei U Blei u la thaw ïa ngi? Balei ki briew kiba bha ki jynjar? Jia aïu ynda u briew u ïap? Lada baroh ki kwah jingsuk, balei pat don shibun ki thma? Ka pyrthei kan long kumno ha ka lawei? Ka Baibl ka pynshlur ïa ngi ban wad ïa ki jubab jong kum kine ki jingkylli, bad bun ki sngewhun ïa ki jubab ba ki ïoh.

2. Kumno ka Baibl ka lah ban ïarap ïa ngi ban long kiba kmen man la ka sngi?

Ka Baibl ka hikai ïa ngi kumno ban pynlong ïa la ka ïing ka sem kaba kmen. Ka ai jingmut ruh kumno ban leh haba ngi khuslai ne haba don jingeh ha jaka trei. Haba ngi ïa pule lang ïa kane ka kot, phin sa sngewthuh ïa kaei ba ka Baibl ka ong shaphang kine ki phang, bad kiwei de. Phin sa mynjur ba “ka jingthoh baroh [ha ka Baibl] ka long kaba . . . myntoi.”—2 Timothi 3:16.

Kane ka kot kan hikai ïa phi shaphang ka Baibl; bad ka pynshlur ïa phi ban peit bniah ïa ka Baibl da lade hi. Te ngi kyntu ïa phi ban pule ïa ki dkhot Baibl ba la thoh ha kane ka kot bad ban ïanujor ïa ki bad kaei kaba phi pule.

WAD SHUH SHUH

Pyrkhat kumno ka Baibl ka la ïarap ïa ki briew, kumno phi lah ban sngewtynnad ban pule ïa ka bad balei ka bha ban ïoh jingïarap ban sngewthuh ïa ka.

3. Ka Baibl ka lah ban ïalam lynti ïa ngi

Ka Baibl ka long kum ka jingshai kaba khlaiñ. Ka lah ban ïarap ïa ngi kumno ban shim ïa ki rai kiba biang bad ban tip ïa kaei kaban sa jia ha ka lawei.

Pule Salm 119:105, bad nangta sa ïa peit lang ïa kine ki jingkylli harum:

Kumno u nongthoh jong kane ka salm u sngew shaphang ka Baibl?
Kumno phi sngew shaphang ka Baibl?

4. Ka Baibl ka lah ban jubab ïa ki jingkylli jong ngi

Iwei i kynthei i la ïoh ïa ki jubab na ka Baibl shaphang ki jingkylli kiba la pynkulmar jingmut ïa i da ki snem. Peit ïa ka VIDEO, bad nangta sa ïa peit lang ïa kine ki jingkylli harum:

VIDEO: Wat Ju Duh Jingkyrmen! (1:48) (Phareng)

Ha kane ka video, kum kiei ki jingkylli ine i kynthei i don?
Kumno ka jingïapule Baibl ka la ïarap ïa i?

Ka Baibl ka pynshlur ïa ngi ban kylli jingkylli. Pule Mathaïos 7:7, bad nangta sa ïa peit lang ïa kane ka jingkylli harum:

Ki jingkylli aïu phi don ba ka Baibl ka lah ban jubab?

5. Phi lah ban sngewtynnad ban pule ïa ka Baibl

Bun ki briew ki sngewtynnad ban pule ïa ka Baibl bad ki ïoh jingmyntoi ruh na ka. Peit ïa ka VIDEO, bad nangta sa ïa peit lang ïa kine ki jingkylli harum:

VIDEO: Ka Jingpule Baibl (2:05) (Phareng)

Ha kane ka video, kumno ki khynnah samla ki sngew haba ki pule kot?
Balei mynta pat ki sngew da kumwei haba ki pule Baibl?

Ka Baibl ka lah ban ai ki jinghikai kiba pyntngen bad kiba ai jingkyrmen ïa ngi. Pule Rom 15:4, bad nangta sa ïa peit lang ïa kane ka jingkylli harum:

Hato ki jingkular jong ka Baibl shaphang ka jingpyntngen bad ka jingkyrmen ka pynsngewtynnad ïa phi?

6. Kiwei ki lah ban ïarap ïa ngi ban sngewthuh ïa ka Baibl

Wat la ki briew ki pule hi da lade ïa ka Baibl, bun ki shem ba ka jingiasyllok lang bad kiwei ka ïarap bha. Pule Kam 8:26-31, bad nangta sa ïa peit lang ïa kane ka jingkylli harum:

Kumno ngi lah ban sngewthuh ïa ka Baibl?—Peit ka dkhot ba 30 bad 31.

U nong Ithiopia u donkam jingïarap ban sngewthuh ïa ki Jingthoh Bakhuid. Bun ki briew mynta ki ïoh jingmyntoi haba ki ïasyllok lang ïa ka Baibl bad kiwei

DON KIBA ONG: “Kam myntoi ban pule Baibl.”