Biblia ke tuba nde: “Yehowa ta buya ve kupesa konso kima yina ya mbote na bantu yina ke tambulaka na kwikama.” (Nkunga 84:11) Bangogo “kutambula na kwikama” ke tendula nki? Yo ke tendula kuzinga na mutindu yina ke monisa nde, beto ke yibuka mambu yina beto songaka Yehowa ntangu beto kudipesaka na yandi. (Longi 5:4, 5) Inki mutindu nge lenda landa kukangama na Yehowa na nima ya mbotika na nge?

Na disolo yai

•  Landa kukanga ntima na bampasi

•  Landa kutelamina mambu ya ke meka nge

•  Landa kuvanda kikesa

 Verse ya mfunu: “Beto fwete kota na Kimfumu ya Nzambi na nzila ya bampasi mingi.”—Bisalu 14:22.

 Mambu yina yo ke tendula: Na kutuba masonga, Bakristu yonso ta kutana ti bampasi na luzingu na bo. Na kati ya bampasi yina nge ta kutana ti yo, bampasi ya nkaka mu mbandu, bantu ke seka nge to bo ke telamina nge, kele bampasi yina nge ta kutana ti yo sambu nge kele Mukristu. Kansi bampasi ya nkaka mu mbandu, bampasi ya mbongo to maladi, kele bampasi yina bantu yonso ke kutana ti yo.

 Mambu yina lenda kumina nge: Bantangu ya nkaka, luzingu na nge lenda soba mpi yo lenda sala nde nge zinga diaka ve mbote. Biblia ke tuba nde mambu ya mbi lenda kumina konso muntu, yo vanda yandi kele Mukristu to ve.—Longi 9:11.

 Mambu yina nge lenda sala: Mutindu nge me zaba nde nge ta kutana ti bampasi, nge lenda kudibongisa sambu na kukangila yo ntima. Baka yo bonso mabaku ya kukumisa lukwikilu na nge ngolo na Yehowa mpi ya kutudila yandi diaka ntima mingi. (Yakobo 1:2, 3) Na nima ya ntangu, nge lenda tuba mpi bonso ntumwa Polo nde: “Sambu na mambu yonso, mono kele ti ngolo na nzila ya muntu yina ke pesaka mono ngolo.”—Bafilipi 4:13.

 Ndongisila: Sosa kuzaba Yozefi mbote-mbote. Nge lenda tanga disolo ya luzingu na yandi na Kuyantika kapu 37 mpi 39 tii na 41. Kudiyula nde: Inki bampasi ya kukonda kukana yandi kutanaka ti yo, mpi nki mutindu yandi kangaka ntima? Inki mutindu Yehowa sadisaka Yozefi?

 Mambu ya nkaka ya kusala:

•   Tanga:

   “Inki Mono Lenda Sala Kana Diambu ya Mawa Me Kumina Mono?”

   “Keti Mono Ke Kukaka Kukanga Ntima na Bampasi?”

   “Comment faire face aux changements”

•   Baka na Internet:

   “Un de mes parents est malade”

 Verse ya mfunu: “Konso muntu ke mekamaka kana yandi ke bika nde nzala na yandi mosi kubenda yandi mpi kupukumuna yandi.”—Yakobo 1:14.

 Mambu yina yo ke tendula: Bantangu ya nkaka, banzala yina beto ke vandaka ti yo ke mekaka beto yonso mpi kana beto yala yo ve, yo lenda pusa beto na kusala mambu ya mbi.

 Mambu yina lenda kumina nge: Na nima ya mbotika, nge ta waka kaka “banzala ya nitu.” (2 Piere 2:18) Nkutu, nge lenda wa nzala ya kuvukisa nitu na ntwala nde nge kwela.

 Mambu yina nge lenda sala: Banda sesepi, baka lukanu ya kubika ve nde banzala ya nitu kupusa nge na kubaka balukanu ya mbi. Baka lukanu yango na ntwala nde nge mekama. Kuvila ve nde Yezu tubaka nde: “Muntu mosi ve lenda sala bonso mpika sambu na bamfumu zole.” (Matayo 6:24) Nge lenda pona nani ta vanda mfumu na nge. Pona Yehowa. Yo vanda nzala ya mbi kele ngolo inki mutindu, nge lenda baka lukanu ya kubika ve nde yo nata nge.—Bagalatia 5:16.

 Ndongisila: Sosa kuzaba bisika ya nge ke vandaka ngolo mpi bisika ya nge vandaka ve ngolo. Pona banduku yina ta sadisa nge na kumona bikalulu ya mbote yina nge ke vandaka ti yo. Tina bantu, bisika mpi mambu yina ke salaka nde nge kuka ve kusala mambu ya mbote.—Nkunga 26:4, 5.

 Mambu ya nkaka ya kusala:

•   Tanga:

   “Inki Mono Lenda Sala Sambu Mono Bwa Ve na Mpukumuna?”

   “Inki Mutindu Mono Lenda Katula Ngindu ya Kuvukisa Nitu?”

   “Comment résister à la pression du groupe?”

   “Keti Nge Ke Vandaka ti Mabanza Bonso ya Yehowa?”

 Verse ya mfunu: ‘Monisa kikesa tii na nsuka, sambu nge kuma ve molo.’—Baebreo 6:11, 12.

 Mambu yina yo ke tendula: Kana muntu ke tula ve dikebi na kisalu yina yandi ke sala, yandi lenda kuma kusala yo kukonda kikesa mpi kukuma molo kukonda mpasi.

 Mambu yina lenda kumina nge: Ntembe kele ve nde nge vandaka na kiese mingi mpi kikesa na nima ya mbotika na nge. Nge vandaka kuzola Yehowa mingi kibeni. Kansi mutindu ntangu ke luta, mbala ya nkaka nge ke kuka ve kulanda kuzitisa Yehowa na mambu yonso. Yo lenda lembisa nge nitu mpi kusala nde nge vanda diaka ve kikesa mutindu nge vandaka ntete.—Bagalatia 5:7.

 Mambu yina nge lenda sala: Landa kusala mambu ya mbote ata na ntangu mosi buna nge kele ve ti nzala ya kusala yo. (1 Bakorinto 9:27) Na ntangu yina, sosa kuzaba mbote-mbote Tata na nge ya zulu mpi solulaka mbala na mbala ti yandi na kisambu, mpidina nge ta kwenda pene-pene na yandi. Diaka, landa kusala kinduku ya ngolo ti bantu yina ke zolaka kusadila Yehowa.

 Ndongisila: Kuvila ve nde Yehowa ke zolaka nge mingi mpi nde yandi kele ya kuyilama sambu na kusadisa nge. Kana na ntangu mosi buna nge kele ve ti kikesa, kuditubila ve nde yandi ke sepela diaka ve ti nge. Biblia ke tubaka nde: “Yandi ke pesaka ngolo na muntu yina me lemba mpi ngolo ya mingi na bantu yina me konda kikesa.” (Yezaya 40:29) Na nima ya ntangu, Yehowa ta sakumuna bikesa yina nge ke sala sambu na kukuma diaka kikesa.

 Mambu ya nkaka ya kusala:

•   Tanga:

   “Baleke, Beno Landa Kusala Ngolo Sambu na Luguluku na Beno Mosi”

   “Comment trouver du plaisir à adorer Dieu?”

•   Tala:

   Mambu Yina Banduku na Nge Ke Tubaka—Luzingu ya Kuluta Mbote

 Bangogo ya nsuka: Kana nge ke kuditambusa na kwikama, nge ta sepedisa ntima ya Yehowa. (Bingana 27:11) Yandi ta vanda na kiese mutindu nge me pona na kuvanda na lweka na yandi mpi yandi ta pesa nge yonso yina nge kele na yo mfunu sambu nge bwa ve ntangu Satana ke nwanisa nge.