Toko mosi na zina ya Will ke tuba nde: “Nge lenda wa boma ya kutanga Biblia kana nge ke zaba ve mutindu ya mbote ya kutanga yo.”

 Keti nge ta zola kuzaba mambu ya mfunu yina nge fwete sala sambu na kutanga Biblia ti kiese? Disolo yai ta sadisa nge.

•  Mona na Mabanza Mutindu Mambu Vandaka Kusalama

•  Longuka na Mudindu!

•  Mambu yina baleke ya nkaka ke tuba

 Kudikotisa na kati ya disolo yina nge ke tanga. Nge lenda sadila bametode yai:

1.   Pona disolo mosi ya Biblia yina nge ta sepela kutanga. Nge lenda pona disolo mosi ya Biblia to baverse ya evanzile mosi to nge lenda pona disolo mosi na kati ya badrame ya lutangu ya Biblia ya kele na jw.org.

2.   Tanga disolo yango. Nge lenda tanga yo nge mosi to ti banduku na nge to bantu ya dibuta na beno. Muntu mosi lenda tanga bangogo ya muntu ya ke ta disolo mpi bantu ya nkaka lenda tanga bangogo ya bantu ya nkaka yina kele na disolo yango.

3.   Sadila ngindu mosi to bangindu mingi na kati ya bangindu yai:

   •   Sala bifwanisu ya ke monisa disolo yango. To sala tablo mosi ya disolo disongidila bifwanisu ya fioti-fioti ya ke monisa ndonga ya mambu mutindu yo salamaka. Na lweka ya konso kifwanisu, sonika ntendula na yo.

   •   Ntangu nge ke tanga disolo ya muntu mosi ya kwikama, sonika bikalulu mpi mambu yina yandi vandaka kusala mpi balusakumunu yina yandi bakaka.

   •   Sala bonso nde disolo ya nge ke tanga ke salama bubu yai. Sonika disolo yango na kutadila bangindu ya bantu ya nkaka mpi sala bonso nde nge ke “yula” muntu ya ke na disolo ya nge ke tanga mpi bantu ya nkaka yina vandaka pana.

   •   Kana muntu mosi ya ke na kati ya disolo ya nge ke tanga bakaka lukanu ya mbi, yindula mutindu yo zolaka kuvanda kana yandi bakaka lukanu ya mbote. Mu mbandu, tadila mutindu Piere wanganaka Yezu. (Marko 14:66-72) Mpi kudiyula nde: Inki Piere zolaka kusala sambu yandi wangana ve Yezu?

   •  1● Kana nge ke zolaka kusonika mingi, nge lenda sonika drame ya me katuka na disolo mosi ya Biblia na bangogo na nge mosi. Sonika mpi malongi yina nge lenda baka na disolo yango.—Baroma 15:4.

 Kana nge ke tadila mambu ya fioti-fioti ya disolo mosi, nge lenda bakisa malongi ya mfunu ya me bumbana na disolo yango. Bantangu ya nkaka, kaka ngogo mosi to bangogo zole ya kele na disolo mosi ya Biblia lenda sadisa nge na kuzaba mambu mingi.

 Mu mbandu, fwanisa Matayo 28:7 ti Marko 16:7.

•    Sambu na nki Marko yikaka nde ntama ve Yezu ta kutana ti balongoki na yandi “mpi Piere”?

•  Kima ya ke sadisa na kuzwa mvutu: Marko vandaka ve ntangu mambu yina salamaka. Yo ke monana nde, Piere muntu songaka yandi mambu yango.

•  Malongi ya mfunu ya me bumbana: Sambu na nki Piere bwisaka ntima ntangu bo songaka yandi nde Yezu vandaka kusosa kukutana ti yandi? (Marko 14:66-72) Inki mutindu Yezu monisaka nde yandi vandaka nduku ya masonga ya Piere? Inki mutindu nge lenda landa mbandu ya Yezu mpi kuvanda nduku ya masonga ya bantu ya nkaka?

 Kana nge ke mona na mabanza mambu yina nge ke tanga mpi nge ke longuka yo na mudindu, lutangu ya Biblia ta kuma kupesa nge kiese mingi!