Modi ki nu ta mostra amor pa kunpanheru
Nos tudu é disendentis di kel primeru ómi Adon, pur isu nos tudu é un família. Famílias debe ama i ruspeta kunpanheru, má é ka kel-li ki nu sta odja oji. Pesoas ka sta mostra amor pa kunpanheru. É ka kel-li ki nos Deus di amor kreba pa tudu algen.
KUZÊ KI SKRITURAS SAGRADU TA FLA SOBRI AMOR?
‘Ama bu prósimu sima bu ta ama bu kabésa.’ — LEVÍTICO 19:18.
‘Nhos kontinua ta ama nhos inimigus’. — MATEUS 5:44.
KUZÊ KI SIGINIFIKA AMA KUNPANHERU?
Odja kuzê ki Deus ta fla sobri amor na se Palavra, na 1 Coríntios 13:4-7 :
‘Amor ten paxénxa i el é bon.’
Pensa na kel-li: Modi ki bu ta xinti óras ki otus algen ta ten paxénxa ku bo i es ka ta xatia óras ki bu faze algun kuza mariadu?
‘Amor é ka siumentu.’
Pensa na kel-li: Modi ki bu ta xinti óras ki otus algen ta ten invéja di bo i es ta krê prujudika-u?
Amor ‘ka ta djobe sô ses interesi’.
Pensa na kel-li: Modi ki bu ta xinti óras ki otus algen ta ruspeta bu manera di pensa envês di insisti na ses opinion?
Amor ‘ka ta liga mal ki fazedu.’
Pensa na kel-li: Deus sta sénpri prontu pa púrdua kes algen ki faze algun kuza mariadu i ki rapende. ‘El ka ta da-nu reprenson sen para, nen el ka ta guarda rankor pa tudu ténpu.’ (Salmo 103:9 ) Nos tudu nu ta fika kontenti óras ki un algen ta purdua-nu. Pur isu, nu debe sta sénpri prontu pa púrdua otus óras ki es magua-nu. — Salmo 86:5.
Amor ‘ka ta fika kontenti ku injustisa’.
Pensa na kel-li: Óras ki kontise algun kuza mariadu ku nos, nu ka ta krê pa otus fika kontenti ku kel-li. Pur isu, nu ka debe fika kontenti óras ki otus algen ta sufri, mésmu ki es faze algun kuza kóntra nos.
Si nu krê ten bensons di Deus, nu ten ki mostra kel tipu di amor li pa otus algen, ka ta nporta ken ki es é. Un bon manera di faze kel-li, é óras ki nu ta djuda kes algen ki meste.
