LISON 4
Ken ki é Jizus Kristu?
1. Modi ki vida di Jizus kumesa?
Pamodi ki tudu algen, ku mininus ku tudu, gostaba di pâpia ku Jizus? — MATEUS 11:29; MARCOS 10:13-16.
Jizus é ka sima nos pamodi antis di el nase na Téra, el éra un pesoa spritual ki ta viveba na Séu. (João 8:23 ) El é primeru kuza ki Deus faze, dipôs el djuda Deus faze tudu kes otu kuza. É sô el ki Jeová faze ku se mô, pur isu, el ta txomadu Fidju ‘unijénitu’ di Deus. (João 1:14 ) Jizus sirbi di Porta-Vós di Deus, pamodi kel-li, tanbê el ta txomadu di ‘Palavra’. — Lé Provérbios 8:22, 23, 30; Colossenses 1:15, 16.
2. Pamodi ki Jizus ben pa Téra?
Pa manda se Fidju pa Téra, Deus panha vida di Jizus na Séu el poi na bariga di un mudjer vírjen, di Israel, ki txomaba Maria. Nton, pai di Jizus ka éra sima nos. (Lúkas 1:30-35, BPK ) Jizus ben pa Téra pa (1) inxina verdadi di Deus, (2) da-nu izénplu di modi ki nu pode faze vontadi di Deus mésmu óras ki nu sta pasa difikuldadi i (3) da se vida sen pekadu pa paga ‘resgati’. — Lé Mateus 20:28.
3. Di kuzê ki Jizus liberta-nu?
Resgati é présu ki ta pagadu pa libra un algen di mórti. (Êxodo 21:29, 30 ) Désdi komésu, Deus ka kreba pa nu bira bédju nen pa nu móre. Modi ki nu sabe? Deus fla primeru ómi, Adon, ma si el fazeba kel ki Bíblia ta txoma di ‘pekadu’, el ta moreba. Nton, si Adon ka pekaba, nunka el ka ta moreba. (Génesis 2:16, 17; 5:5 ) Bíblia ta fla ma é pamodi Adon ki mórti ‘entra’ na mundu. Nton, Adon pasa pekadu i kastigu di pekadu, ki é mórti, pa tudu se fidjus. Nu meste di resgati pa libra-nu di mórti ki Adon dexa-nu. — Lé Romanos 5:12; 6:23.
Ken ki pode pagaba resgati pa libra-nu di mórti? Nu ta móre pamodi nos pekadu. Nton, nu ka pode paga resgati pa ningen pamodi nos tudu é pekador. — Lé Salmo 49:7-9.
4. Pamodi ki Jizus móre?
Jizus é ka sima nos pamodi el ka tinha pekadu. Pur isu, el ka mesteba móre pa se pekadu, nunka el ka peka. Jizus móre pa pekadu di otus algen. Deus mostra grandi amor pa mundu kantu el manda se Fidju pa móre pa nos. Jizus tanbê mostra-nu amor kantu el obi ku se Pai i el da se vida pa nos pekadu. — Lé João 3:16; Romanos 5:18, 19.
Odja vídiu Pamodi ki Jizus móre?
5. Kuzê ki Jizus sta ta faze gósi?
Kantu el staba na Téra, Jizus kura duentis, el resusita mortus i el branda dór di pesoas. Kel-li ta mostra kuzê ki el ta ben faze na futuru pa tudu algen ki obi ku el. (Mateus 15:30, 31; João 5:28 ) Dipôs ki Jizus móre, Deus resusita-l ku korpu spritual. (1 Pedro 3:18 ) Nton, Jizus fika ta spéra na ladu direita di Deus, ti ki Jeová da-l puder pa ser Rei pa governa Téra interu. (Hebreus 10:12, 13 ) Gósi, el sta ta governa na Séu i se sigidoris sta ta prega notísias sábi na mundu interu. — Lé Daniel 7:13, 14; Mateus 24:14.
Ka ta dura, Jizus ta ben uza se puder di Rei pa kaba ku tudu sufrimentu i ku kes algen ki ta poi otus sufri. Tudu kes algen ki obi ku Jizus, ta mostra ma es ten fé na el i es ta ben goza vida na paraízu na Téra. — Lé Salmo 37:9-11.
