Filiipi mba 4:1-23
4 Pʋyɔɔ lɛ, mon-koobiya, mɩ mba mɔnsɔɔlɩ-mɩ nɛ me-liu wɛɛ pɩŋŋ se mana-mɩ yɔ, mɩ mba ɩkɛ man-taa leleŋ nɛ ma-wabɩtʋ hulaɣ yɔ,+ man-kʋsɔɔlaa, ɩɖɔkɩ kpam+ mbʋ Kɩbaɣlʋ taa.
2 Menseɣtiɣ Evoodii nɛ menseɣtiɣ Sɛntiisi se pɛwɛɛnɩ maɣzɩm kʋɖʋmʋm Kɩbaɣlʋ taa.+
3 Ɛɛɛ, mentendiɣ-ŋ ɖɔɖɔ, ña weyi ŋkɛ tʋmɩyɛ taa taabalʋ kɩbanʋ yɔ, se ŋwɛɛ nɛ ŋsɩɣnɩ halaa mba, mba ma nɛ wɛ ɖɩñaɣ pana* tɔm kɩbandʋ yɔɔ yɔ, pa nɛ Klemaɣ nɛ lalaa mba ma nɛ wɛ ɖɩlakɩ tʋmɩyɛ yɔ, mba pa-hɩla wɛ wezuu takayaɣ taa yɔ.+
4 Paa ɛzɩmtaa lɛ, ɩwɛɛ laŋhʋlʋmɩyɛ taa Kɩbaɣlʋ taa. Mantasɩɣ cuuzuu se: Ɩwɛɛ laŋhʋlʋmɩyɛ taa!+
5 Iyele nɛ ɛyaa tɩŋa tɩlɩ se ɩkɛ mba panɩɣ tɔm taa yɔ.+ Kɩbaɣlʋ ñɔtaa.
6 Ɩtaanɩɣzɩ nabʋyʋ yɔɔ,+ ɛlɛ paa mbʋ pɩ-taa lɛ, ɩtɩŋnɩ adɩma nɛ tenduu yɔɔ, pɩkpɛndɩnɩ sɛtʋ nɛ iyele nɛ Ɛsɔ tɩlɩ mbʋ ɩpɔzʋʋ yɔ;+
7 nɛ Ɛsɔ tɛ laŋhɛzɩyɛ+ nɖɩ ɖɩcɛzɩ tɔm taa nɩʋ lɛɣtʋ* tɩŋa yɔ, ɖɩkaɣ tɩŋnʋʋ Krɩstʋ Yesu yɔɔ nɛ ɖɩɖaŋ mɩ-laŋa yɔɔ+ nɛ mɩ-maɣzɩm yɔɔ.
8 Kɛdɛzaɣ ɖeɖe lɛ, koobiya, mbʋ payɩ pɩkɛ toovenim yɔ, mbʋ payɩ pɩmʋnɩ ñamtʋ yɔ, mbʋ payɩ pɩwɛ siɣsiɣ yɔ, mbʋ payɩ pɩwɛ kele kele yɔ, mbʋ payɩ pɩmʋnaa se pɔsɔɔlɩ-pʋ yɔ, mbʋ payɩ pɩ-yɔɔ pɔyɔɔdʋʋ tɔm kɩbandʋ yɔ, mbʋ payɩ pɩkɛ kɩbam yɔ, nɛ mbʋ payɩ pɩmʋnɩ samtʋ yɔ, iwolo pɩ-yɔɔ nɛ ɩmaɣzɩ pɩ-yɔɔ.+
9 Tɔm ndʋ ɩkpɛlɩkaa nɛ itisi tɩ-yɔɔ, nɛ ɩnɩɩ nɛ ɩna mɔn-cɔlɔ yɔ, ɩɖɔ tɩ-yɔɔ;+ nɛ laŋhɛzɩyɛ tɛ Ɛsɔ kaɣ wɛʋ mɩ-cɔlɔ.
10 Mɛwɛ laŋhʋlʋmɩyɛ taa siŋŋ Kɩbaɣlʋ taa se lɛɛlɛɛyɔ lɛ, ɩɖaɣnɩ paɣzʋʋ maɣzʋʋ mɔ-yɔɔ.+ Paa ɩmaɣzaɣ mɔ-yɔɔ yɔ, itaahiɣ waɖɛ se ɩwɩlɩ-m se ɩmaɣzaɣ mɔ-yɔɔ.
11 Pɩtɩkɛ se mɛwɛ kɩcɛyɩm taa yɔɔ mɔyɔɔdʋʋ mbʋ, mbʋ pʋyɔɔ yɔ, mɛnkpɛlɩkɩ ɛzɩma me-liu ɛsɩbɩnɩ mbʋ mɛwɛna yɔ paa wɛtʋ ndʋ lɛ tɩ-taa yɔ.+
12 Mansɩm ɛzɩma ɛyʋ tɛɖɩɣ nabʋyʋ+ nɛ ɛzɩma ɛyʋ wɛɣnɩ wondu sakɩyɛ yɔ. Paa mbʋ pɩ-taa nɛ wɛtʋ tɩŋa taa lɛ, mɛnkpɛlɩkɩ mbʋ ɛyaa pazɩ yem sɩma yɔ: ɛzɩma mɛwɛɛ haɣnaɣ taa nɛ ɛzɩma mɛwɛɛ ñɔɔsɩ taa yɔ, ɛzɩma mɛwɛɛnɩ wondu sakɩyɛ nɛ ɛzɩma mɛwɛɛ kɛdɛɖaɣ taa yɔ.
13 Pɩtɩŋa payɩ pɩ-taa lɛ, mɛwɛnɩ ɖoŋ pɩtɩŋnɩ weyi ɛhaɣ-m ɖoŋ yɔ ɛ-yɔɔ.+
14 Paa mbʋ yɔ, ɩlabɩ camɩyɛ se ɩsɩnɩ-m man-kʋñɔŋ taa.
15 Toovenim taa lɛ, mɩ Filiipi mba, ɩsɩm mbʋ ɖɔɖɔ se ɩnɩ tɔm kɩbandʋ nɛ mankʋyɩ Masedonii lɛ, ɛgbɛyɛ naɖɩyɛ taasɔɔlɩ se ɖɩsɩnɩ-m ɛzɩ maasɩnʋʋ-ɖɩ yɔ nɛ pɩtasɩnɩ mɩ-ɛgbɛyɛ;*+
16 mbʋ pʋyɔɔ yɔ alɩwaatʋ ndʋ maawɛ Tesalooniiki yɔ, itiyini-m nabʋyʋ se mɔncɔnɩnɩ man-kɩcɛyɩm ɖeɖe, pɩtɩkɛ tam kʋɖʋm ɖeke ɛlɛ tam nabʋlɛ.
17 Pɩtɩkɛ se kʋjɔʋ nakʋyʋ mɛwɛɛ nɛ mañɩnɩɣ, ɛlɛ piye nɖɩ ɖɩkɔŋnɩ-mɩ kɛzɛɣa nɛ pɩkɩlɩ yɔ nɖɩ mañɩnɩɣ.
18 Ɛlɛ, mɛwɛnɩ mbʋ payɩ pɩpɔzʋʋ-m yɔ nɛ halɩ pɩɖɛlɩsɩ. Mɛwɛnɩ wondu sakɩyɛ; mbʋ pʋyɔɔ yɔ lɛɛlɛɛyɔ, mamʋ Epafrodiiti+ cɔlɔ mbʋ itiyinaa yɔ, pɩkɛ sɔzɩŋ tɩlaaɖɩ;+ kɩlaʋ ŋgʋ Ɛsɔ mʋ-kʋ nɛ kɩkɛdɩnɩ-ɩ siŋŋ yɔ.
19 Mɛ-Ɛsɔ ɖɔɖɔ kaɣ cɔnʋʋ mɩ-kɩcɛyɩm tɩŋa ɖeɖe camɩyɛ+ ɛzɩ ɛ-ñɩm sɔsɔm pɔzʋʋ yɔ, pɩtɩŋnɩ Krɩstʋ Yesu yɔɔ.
20 Lɛɛlɛɛyɔ lɛ, pasa ɖa-Caa Ɛsɔ tam. Amɛn.
21 Ɩcɛlɩ mɛn-sɛtʋ ɛyaa kiɖeɖema tɩŋa mba pa nɛ Krɩstʋ Yesu pɛwɛ nɔɔ kʋɖʋmaɣ yɔ. Koobiya mba pɛwɛ mɔn-cɔlɔ yɔ, petiyiɣni-mɩ pɛ-sɛtʋ.
22 Ɛyaa kiɖeɖema tɩŋa tiyiɣni-mɩ pɛ-sɛtʋ; kɔzɩ kɔzɩ lɛ, Sezaarɩ ɖɩɣa taa mba.+
23 Kɩbaɣlʋ Yesu Krɩstʋ lootiye ɛwɛɛ fezuu ŋgʋ ɩlɩzɩɣ nɛ ɩwɩlɩɣ yɔ kɩ-cɔlɔ.
Pɩ-tɛɛ tɔm
^ Yaa «mba ma nɛ wɛ ɖɩlʋbɩ siŋŋ.»
^ Yaa «ɖɩcɛzɩ mbʋ pɩ-taa ɛyaa pɩzɩɣ nɛ panɩɩ yɔ.»
^ Piye piye, «ma nɛ ɛgbɛyɛ naɖɩyɛ ɖɩtɩkaa nabʋyʋ haʋ nɛ mʋʋ pɔ-hɔɔlʋʋ taa, ɛlɛ mi-ɖeke.»
