Ebree mba 10:1-39
-
Kpɩna kɩlaŋ fɛyɩnɩ wazaɣ (1-4)
-
Paɣtʋ kɛnɩ kɩlɛmʋʋ (1)
-
-
Krɩstʋ la ɛ-tɩ tam kʋɖʋm nɛ pɩkpaɣ pɩɖɛɛ (5-18)
-
Nʋmɔʋ kɩfalʋʋ ŋgʋ kɩwɛ wezuu yɔ, ŋgʋ patɩŋɩɣna nɛ pasʋʋ yɔ (19-25)
-
Ðitaayeki ɖama kpeɣluu (24, 25)
-
-
Ɛpaɣ-wɛ se pakpa pa-tɩ nɛ kɩwɛɛkɩm labʋ faɖaɖa (26-31)
-
Lidaʋ nɛ tisuu pasɩɣnɩ ɛyʋ se ɛwɛɛnɩ laŋɩyɛ ɖɔkʋʋ (32-39)
10 Mbʋ pʋyɔɔ yɔ Paɣtʋ kɛnɩ wondu kɩbandʋ ndʋ tɩkaɣ kɔm yɔ+ tɩ-kɩlɛmʋʋ,+ ɛlɛ pɩtɩkɛ wondu ndʋ tɩ-maɣmaɣ; pʋyɔɔ lɛ, tɩɩpɩzɩɣ* kpa nɛ tɩtɩŋnɩ kɩlaŋ kʋɖʋmɩŋ ɛnɩ, weyi palaɣ tam paa pɩnaɣ ŋga yɔ ɩ-yɔɔ nɛ tiyele nɛ mba pɔñɔtʋʋnɩ Ɛsɔ yɔ patalɩ pilim.+
2 Ye pɩtaakɛ mbʋ yɔ, pataayele kɩlaŋ laʋ yaa we? Mbʋ pʋyɔɔ yɔ, pɩɩwɩlaa se mba palakɩ tʋmɩyɛ kiɖeɖeye yɔ pɛtɛŋ-wɛ pɩsʋʋ kele kele lɛ, paatasɩɣ ɖiɣzinuu pa-kɩwɛɛkɩm.
3 Ɛlɛ kɩlaŋ ɛnɩ, ɩtɔzʋʋ ɛyaa pa-kɩwɛɛkɩm yɔɔ paa pɩnaɣ ŋga,+
4 mbʋ pʋyɔɔ yɔ naŋ abalɩñɩŋ nɛ pʋŋ calɩm ɛɛpɩzɩɣ nɛ pɩlɩzɩ kɩwɛɛkɩm.
5 Pʋyɔɔ alɩwaatʋ ndʋ ɛkɔm ɛjaɖɛ yɔɔ yɔ, ɛyɔɔdaa se: «“Ŋtɩsɔɔlɩ kɩlaʋ nɛ haɖɛ, ɛlɛ ŋñɔɔzɩ-m tomnaɣ.
6 Kɩlaŋ kɩñaɣzɩŋ* nɛ kɩwɛɛkɩm yɔɔ kɩlaŋ tɩkɛdɩnɩ-ŋ.”+
7 Ðɩnɛ ɛlɛ mɔyɔɔdɩ se: “Na! Mɔnkɔma (pama mɔn-tɔm takayaɣ kikpiyaɣ taa) se mala ñɔ-sɔɔlɩm, hayɩ Ɛsɔ.”»+
8 Ɛcalɩ yɔɔdʋʋ se: «Ŋtɩsɔɔlɩ kɩlaŋ nɛ haɖɛ nɛ kɩlaŋ kɩñaɣzɩŋ nɛ kɩwɛɛkɩm yɔɔ kɩlaŋ, nɛ ɩtɩkɛdɩnɩ-ŋ ɖɔɖɔ»—kɩlaŋ weyi palaɣaɣ ɛzɩ Paɣtʋ pɔzʋʋ yɔ—,
9 pʋwayɩ lɛ ɛyɔɔdɩ se: «Na! Mɔnkɔma se mala ñɔ-sɔɔlɩm.»+ Eyeki se kajalaɣ ɖʋtʋ ɛsɩɩ tɩnaɣ se pɩsa nɛ ɛɖʋ 2 ñɩndʋ.
10 «Sɔɔlɩm»+ mbʋ pɩ-yɔɔ lɛ, patɩŋnɩ ɛzɩma Yesu Krɩstʋ la e-tomnaɣ tam kʋɖʋm nɛ pɩkpaɣ pɩɖɛɛ yɔ pɩ-yɔɔ nɛ papɩsɩ-ɖʋ kiɖeɖema.+
11 Pɩtasɩ lɛ, paa cɔjɔ weyi lɛ, ɛsɩŋɩɣ e-lone taa paa kɩyakʋ ŋgʋ nɛ ɛlakɩ tʋmɩyɛ kiɖeɖeye*+ nɛ ɛlaɣ kɩlaŋ kʋɖʋmɩŋ ɛnɩ ɖoŋ ɖoŋ,+ kɩlaŋ weyi ɩɩpɩzɩɣ kpa nɛ ɩhɩzɩ kɩwɛɛkɩm caɣ caɣ yɔ.+
12 Ɛlɛ ɛyʋ ɛnʋ ɛla kɩlaʋ kʋɖʋmʋʋ kɩwɛɛkɩm yɔɔ tam nɛ ɛcaɣ Ɛsɔ nesi kɩbanzɩ yɔɔ;+
13 kpaɣnɩ mbʋ lɛ, ɛɖaŋaa se pɩkɔɔ nɛ pɩtalɩ alɩwaatʋ ndʋ pasɩɣ e-koyindinaa nɛ pɛkɛ ɛ-nɩŋgbanzɩ ɖɩzɩyɛ yɔ.+
14 Mbʋ pʋyɔɔ yɔ kɩlaʋ haɖɛ kʋɖʋmɖɩyɛ yɔɔ ɛtɩŋnaa nɛ eyele nɛ mba peɖiɣni-wɛ pɩsʋʋ kiɖeɖema yɔ, patalɩ pilim+ tam.
15 Pɩtasɩ lɛ, fezuu kiɖeɖeu ɖɔɖɔ lɩzɩɣ-ɖʋ aseɣɖe, mbʋ pʋyɔɔ yɔ kajalaɣ lɛ, kɩyɔɔdaa se:
16 «Ɛgbɛyɛ ɖɩnɛ mankaɣ-wɛ ɖʋnʋʋ kɩyakɩŋ ɛnɩ ɩ-wayɩ. Mankaɣ ɖʋʋ man-paɣtʋ pa-laŋa taa, nɛ mankaɣ-tʋ maʋ pa-maɣzɩm taa; Yehowa* yɔɔdʋʋna.»+
17 Pʋwayɩ lɛ kɩyɔɔdɩ se: «Nɛ maakaɣ tasʋʋ tɔzʋʋ pa-kɩwɛɛkɩm nɛ pa-kaañamtʋ lakasɩ yɔɔ.»+
18 Nɛ ɖenɖe pekpeɣu pɩtɩŋa mbʋ yɔ yɔ, pɩtɩtasɩ cɛyʋʋ se palaa kɩlaʋ kɩwɛɛkɩm yɔɔ.
19 Ye mbʋ koobiya, Yesu calɩm yeba nɛ ɖa-taa tɛmnɩ nʋmɔʋ ŋgʋ kiwokini lone kiɖeɖeye taa yɔ,*+
20 ŋgʋ ɛtʋlɩ-ɖʋ ɛzɩ nʋmɔʋ kɩfalʋʋ ŋgʋ kɩwɛ wezuu yɔ alɩwaatʋ ndʋ ɛtɩŋnɩ pɩsaʋ kikenduu+ ŋgʋ kɩkɛ e-tomnaɣ yɔ kɩ-wayɩ yɔ,
21 nɛ ɖɩwɛnɩ cɔjɔ sɔsɔ nɔɔyʋ, weyi ɛcɔŋnɩ Ɛsɔ ɖɩɣa yɔɔ yɔ; pʋyɔɔ lɛ,+
22 iyele nɛ ɖɩñɔtɩnɩ-ɩ nɛ laŋa toovenim ñɩna nɛ tisuu kiya; mbʋ pʋyɔɔ yɔ papɩsɩ ɖa-laŋa kele kele* se ataatasɩ wɛnʋʋ ɛhʋyɛ kɩdɛkɛdɩyɛ,+ nɛ pɔsɔ ɖo-tomnasɩ lɩm mbʋ pɩwɛ kele kele yɔ.+
23 Iyele nɛ ɖɩɖɔkɩ tɔm ndʋ ɖisusuu kaɣlaa ɖe-lidaʋ yɔɔ yɔ kpam nɛ ɖitaaciɣdi,+ mbʋ pʋyɔɔ yɔ weyi ɛlabɩ tamaɣ ŋga yɔ ɛwɛ siɣsiɣ.
24 Iyele nɛ ɖɩmaɣzɩ* ɖama yɔɔ nɛ ɖiseɣti ɖama* nɛ ɖɩwɛɛnɩ sɔɔlɩm nɛ ɖɩla tʋma kɩbana,+
25 ɖitaayeki ɖama kpeɣluu+ ɛzɩ nabɛyɛ lakʋʋ yɔ; ɛlɛ ɖɩkpazɩɣ ɖama ɖoŋ,+ nɛ ɖɩla mbʋ nɛ pɩkɩlɩ, mbʋ pʋyɔɔ yɔ ɩnaɣ se kɩyakʋ ɖiɣni ñɔtʋʋ.+
26 Mbʋ pʋyɔɔ yɔ, ye ɖɩlakɩ kɩwɛɛkɩm faɖaɖa alɩwaatʋ ndʋ ɖɩtɛm sɩm toovenim camɩyɛ yɔ,*+ kɩlaʋ nakʋyʋ tɩtasɩ wɛʋ kɩwɛɛkɩm yɔɔ;+
27 ɛlɛ ɖɩɖaŋɩɣnɩ sɔɔndʋ tɔm hʋʋ nɛ miŋ pana wena akaɣ ñaɣʋ mba pakaɖɩɣnɩ Ɛsɔ yɔ.+
28 Nɔɔyʋ ɛtɩɖɔ Moyizi Paɣtʋ yɔɔ yɔ, aseɣɖe tɩnaa 2 yaa 3 tɔm yɔɔ lɛ,+ ɛsɩkɩ paanaɣ ɛ-pʋtɔdɩyɛ.
29 Weyi ɛmɩtɩ Ɛsɔ Pɩyalʋ nɛ ɛtɩkpaɣ ɛgbɛyɛ ɖʋʋ calɩm+ mbʋ papɩsɩnɩ-ɩ kiɖeɖeu yɔ nɛ ɛyaa pʋyʋ nɛ eni lootiye fezuu nɛ ɛɖʋ-kʋ ɖɩwɩzɩyɛ sɔsɔɖɛ yɔ, ɩɩmaɣzɩɣ se ɛkaɣ mʋnʋʋ nɩŋgbaŋʋʋ hɔm sɔsɔm nɛ pɩkɩlɩ yaa we?+
30 Mbʋ pʋyɔɔ yɔ ɖɩsɩm Weyi ɛyɔɔdaa se: «Matɩnɩ kɩmɩyɛ kpaʋ; makaɣnɩ hɛyʋʋ pi-lone taa» yɔ. Nɛ ɖɔɖɔ se: «Yehowa* kaɣ tɔm hʋnʋʋ ɛ-samaɣ.»+
31 Pɩkɛ sɔɔndʋ tɔm se ɛyʋ ɛtɔlɩ Ɛsɔ ɛsadʋ nesi tɛɛ.
32 Ɛlɛ pɩwɛɛ se ɩwɛɛ nɛ ɩtɔzʋʋ kajalaɣ kɩyakɩŋ yɔɔ, weyi ɩ-taa ñalɩmɩyɛ ñandɩ mɩ-yɔɔ nɛ pɩtɛ lɛ,+ ɩɖɔkɩ mɩ-laŋa lʋbɩyɛ sɔsɔɖɛ taa nɛ kʋñɔmɩŋ taa yɔ.
33 Nabʋyʋ taa lɛ, patʋ-mɩ nɛ paɖʋ-mɩ kʋñɔmɩŋ ɛyaa ɛsɩndaa kaɣlaa;* nɛ nabʋyʋ taa lɛ mba pakataɣ wɛtʋ ndʋ yɔ, mɩ nɛ wɛ ɩka pe-siziŋ.
34 Mbʋ pʋyɔɔ yɔ, ɩnɩ salaka tɩnaa siziŋ nɛ itisini taa leleŋ se palazɩ mbʋ ɩwɛna yɔ,+ mbʋ pʋyɔɔ yɔ ɩnawa se ɩwɛnɩ ñɩm mbʋ pɩkɩlɩ ɖeu nɛ pileɖiɣ yɔ.+
35 Pʋyɔɔ lɛ, itaalesi mɩ-abalɩtʋ* ndʋ tɩ-yɔɔ ɩkaɣ mʋʋ kɩhɛyʋʋ sɔsɔʋ yɔ.+
36 Mbʋ pʋyɔɔ yɔ pɩpɔzʋʋ-mɩ laŋɩyɛ ɖɔkʋʋ,+ se pɩsa nɛ ɩtɛŋ Ɛsɔ sɔɔlɩm labʋ lɛ, ɩmʋ mbʋ pɩ-tamaɣ ɛɛlaba yɔ.
37 Mbʋ pʋyɔɔ yɔ pɩkazɩ «alɩwaatʋ pazɩ yem,»+ nɛ «weyi ɛkɔŋ yɔ ɛkaɣ talʋʋ nɛ ɛɛkaɣ caɣʋ wayɩ.»+
38 «Ɛlɛ mɛ-ɛyʋ siɣsiɣ tʋ kaɣ wɛʋ wezuu e-tisuu yɔɔ,»+ nɛ «ye ɛpɩsɩɣnɩ wayɩ yɔ, man-taa* ɛɛlakɩ-ɩ nɛ leleŋ.»+
39 Ŋgʋ ɖɩtɩkɛ mba papɩsɩɣnɩ wayɩ se paɖɩzɩ-wɛ yɔ,+ ɛlɛ ɖɩkɛ mba pɛwɛnɩ tisuu se paya pe-weziŋ* ñʋʋ yɔ.
Pɩ-tɛɛ tɔm
^ Pɩpɩzɩɣ pɩkɛ, «ɛyaa ɩɩpɩzɩɣ.»
^ Yaa «Kɩlaŋ weyi pañaɣzɩɣ i-kpeekpe yɔ.»
^ Yaa «samaɣ tʋmɩyɛ.»
^ Cɔnɩ Tɔm kɩsɔzɩtʋ A5.
^ Yaa «nɛ ɖɩwɛɛ abalɩtʋ se ɖɩlabɩnɩ tʋmɩyɛ nʋmɔʋ ŋgʋ kiwokini lone kiɖeɖeye taa yɔ.»
^ Piye piye, «pamɩzɩ ɖa-laŋa yɔɔ nɛ awɛɛ kele kele,» pʋ-tɔbʋʋ se pamɩzɩ Yesu calɩm ɖa-laŋa yɔɔ.
^ Yaa «ɖikemsini.»
^ Yaa «nɛ ɖɩɖʋ ɖama hʋnʋm.»
^ Yaa «ɖɩtɛm wɛnʋʋ toovenim sɩmtʋ siŋŋ yɔ.»
^ Cɔnɩ Tɔm kɩsɔzɩtʋ A5.
^ Piye piye, «kʋñɔmɩŋ nɛ ɛyaa na-mɩ kaɣlaa ɛzɩ ɛyʋ lɩɣʋ aleɣya ɖɩlaɖɛ taa yɔ.»
^ Piye piye, «mɩ-tɔm yɔɔdʋʋ kaalɛyɩtʋ.»
^ Yaa «man-kalɩzaɣ taa.»
^ Yaa «pa-kalɩzasɩ.»