Timootee takayaɣ naalɛ ñɩŋga 3:1-17
3 Ɛlɛ tɩlɩ tɔm tʋnɛ: kɛdɛzaɣ kɩyakɩŋ taa lɛ,+ alɩwaatʋ kaɖɛ ñɩndʋ kaɣ wɛʋ nɛ tɩ-lʋbɩnʋʋ kaɣ wɛʋ kaɖɛ.
2 Mbʋ pʋyɔɔ yɔ, ɛyaa kaɣ pa-tɩ sɔɔlʋʋ, pakaɣ liidiye sɔɔlʋʋ, pakaɣ wɛnʋʋ agʋnda, pakaɣ pa-tɩ kpazʋʋ, pakaɣ kɛʋ Ɛsɔ yɔɔ tɔm kɩdɛkɛdɩtʋ yɔɔdɩyaa, paakaɣ pa-lʋlɩyaa ñam, paakaɣ wɛnʋʋ ɛsɩmɩyɛ, paakaɣ wɛʋ siɣsiɣ,
3 paakaɣ wɛnʋʋ sɔɔlɩm, paakaɣ tisuu se pa nɛ lalaa panɩɩnɩ ɖama, pakaɣ kɛʋ kɔlɔmɔtʋ tɩnaa, paakaɣ wɛnʋʋ tɩ ɖɔkʋʋ, pakaɣ wɛʋ ñaŋ, paakaɣ kɩbandʋ sɔɔlʋʋ,
4 pakaɣ kɛʋ ɛyaa wayɩ lɩyaa, pakaɣ kɛʋ ñʋʋ taa ɖoŋ tɩnaa, tɩ kpazʋʋ kaɣ suu pa-taa, mbʋ ɛzɩ paasɔɔlɩ Ɛsɔ lɛ, pakaɣ sɔɔlʋʋ leleŋ nɩʋ na,
5 pɩkaɣ naʋ ɛsa yɔɔ yem se pɛwɛnɩ Ɛsɔ sɔɔndʋ seu, ɛlɛ pekiziɣ pi-ɖoŋ;+ ha ɛyaa mba siɣye.
6 Pa-taa nabɛyɛ sʋʋ ɖɩsɩ taa mɛsaɣ tɛɛ nɛ papɩsɩɣ halaa mba pɛwɛnɩ ɛjandʋ nɛ kɩwɛɛkɩm wɛɛnɩ ɖoŋ pɔ-yɔɔ, nɛ kɔɖɛyɩ ndɩ ndɩ ɖiyiɣ-wɛ yɔ yomaa;
7 halaa mba pɛkpɛlɩkɩɣ paa ɛzɩmtaa, ɛlɛ paapɩzɩɣ kpa se patɩlɩ toovenim tɛ sɩmtʋ siŋŋ.
8 Nɛ ɛzɩma Yaanɛɛsɩ nɛ Yambrɛɛsɩ paakaɖɩnɩ Moyizi yɔ, mbʋ ɖɔɖɔ ɛyaa mba, powoki pɩ-yɔɔ nɛ pakaɖɩɣnɩ toovenim. Ɛyaa mba, pa-lɩmaɣza wɛɛkɩ caɣ caɣ, nɛ tisuu hɔɔlʋʋ taa lɛ, pɔ-tɔm tɩkɛdɩnɩ Ɛsɔ.
9 Paa mbʋ yɔ, paakaɣ tasʋʋ wobinuu ɛsɩndaa, mbʋ pʋyɔɔ yɔ pa-kpaanzɩyɩtʋ* yɔɔ kaɣ kuluu kaɣlaa ɛyaa tɩŋa ɛsɩndaa, ɛzɩ ɛyaa 2 mba pa-kpaanzɩyɩtʋ yɔɔ kaakuluu yɔ.+
10 Ɛlɛ ña lɛ, ŋtɩŋ ɖeyi ɖeyi ma-wɩlɩtʋ, me-wezuu caɣʋ,+ man-kaɖʋwa, men-tisuu, mon-suuɖu, mɔn-sɔɔlɩm, ma-laŋɩyɛ ɖɔkʋʋ;
11 nɛ ŋsɩm nazɩm nɛ kʋñɔmɩŋ weyi mankatɩ Antɩyɔɔsɩ,+ Ikoniyɔm,+ nɛ Lisɩtrɩ yɔ.+ Mɔnɖɔkɩ ma-laŋɩyɛ nazɩm mbʋ pɩ-taa, nɛ Kɩbaɣlʋ holi-m pɩtɩŋa pɩ-taa.+
12 Toovenim taa lɛ, mba payɩ pɔsɔɔlaa se pɔñɔɔnɩ Ɛsɔ pe-wezuu caɣʋ taa pa nɛ Krɩstʋ Yesu pɔ-nɔɔ kʋɖʋmaɣ labʋ taa yɔ, pakaɣ-wɛ nazʋʋ ɖɔɖɔ.+
13 Ɛlɛ kañatʋ laɖaa nɛ cɛtɩyaa pakaɣ kpaʋ ɖoŋ tam kɩdɛkɛdɩm labʋ taa, pepeɣziɣ ɛyaa nɛ ɛyaa peɣziɣ-wɛ ɖɔɖɔ.+
14 Ɛlɛ ña lɛ, ɖɔkɩ tɔm ndʋ ŋkpɛlɩkaa nɛ peseɣti-ŋ se ŋtisi tɩ-yɔɔ yɔ,+ nɛ ŋsɩm mba pɔ-cɔlɔ ŋkpɛlɩkɩ-tʋ yɔ
15 nɛ ŋsɩm ɖɔɖɔ se ɖooo pɩjatʋ taa+ ŋsɩm takayɩsɩ kiɖeɖesi,+ nzɩ sɩpɩzɩɣ siyele nɛ ŋwɛɛ lɔŋ se pɩsa nɛ ŋhiɣ ñʋʋ yabʋ pɩtɩŋnɩ tisuu mbʋ ŋwɛnɩ Krɩstʋ Yesu yɔɔ yɔ pɩ-yɔɔ.+
16 Ɛsɔ fezuu ɖiyina nɛ pama Masɩ kpeekpe+ nɛ sɩwazɩɣ se pawɩlɩ tɔm,+ pikizini tɔm, pasɩnzɩ* wondu, nɛ pasɩɣzɩ lɔŋ siɣsiɣ wɛtʋ taa,+
17 se pɩsa nɛ Ɛsɔ tɛ ɛyʋ mʋnɩ camɩyɛ, pɔñɔɔzɩ-ɩ camɩyɛ se ɛpɩzɩ nɛ ɛla paa tʋmɩyɛ kɩbanɖɛ nɖɩ.
