Yehowa Sakse ni gaw tinang hte kaga ni a kun dinghku hpe gawgap na matu shakut ma ai. Dinghku hpe shawng nnan Gawde Ya Ai Madu hku nna Karai Kasang hpe anhte hkungga ga ai. (Ningpawt 2:​21-​24; Ehpesu 3:​14, 15) Chyum Laika hta lawm ai Karai Kasang a lam matsun ni gaw, dinghku hpe ngwi pyaw shangun nna makyit sumri ngang kang shangun ai.

 Chyum Laika lam matsun ni gaw kaja ai dinghku la, dinghku num hte kaja ai kanu kawa byin hkra karum ya ai majaw, dai lam matsun ni hte maren dan lu ai daram anhte shakut nna hkan sa ga ai. (Ga Shagawp 31:10-​31; Ehpesu 5:22–​6:4; 1 Timohti 5:8) Nta masha ni hte makam masham n bung yang pyi, ngwi pyaw lu hkra Chyum Laika lam matsun ni gaw karum ya lu ai. (1 Petru 3:​1, 2) Yehowa Sakse n re ai ningrum ningtau ni tsun ai ga ni hpe yu yu ga:

•   “An a dinghku prat 6 ning hta ga law hkat ai, masin pawt ai hte sha aten ni lai mat ai. Nye madu jan Ivati gaw Yehowa Sakse langai byin wa ai shaloi, grau tsawra chye wa nna myit galu wa ai. Shi galai shai wa ai majaw an a dinghku ngang kang wa ai re.”​—Brazil mungdan kaw nna Kalawya.

•   “Yehowa Sakse ni hte nye madu wa Chyanse Chyum Laika hkaja ai hpe ngai hkum pat wa ai. Shanhte gaw dinghku hpe jahten sharun ya na ngu shadu ai majaw re. Hpang hta, Chyum Laika gaw an a dinghku hpe teng sha karum ya lu ai lam chye na wa ai.”​​—Zambia mungdan kaw nna Enet.

 Chyum Laika kaw lawm ai hpaji jaw ga ni gaw, lawu na masa lam ni hta gara hku karum ya lu ai lam hpe hkaw tsun magam hta anhte tsun dan ga ai:

•   Ningrum ningtau hpe hpaji rawng ai hku lata ai lam

•   Dinghku nnan de ai shaning hpe awn dang hkra tawt lai ai lam

•   Mayu dama lahkawng maga hte kanawn mazum ai lam

•   Gumhpraw hpe hpaji rawng ai hku jailang na lam

•   N ga law hkat hkra galaw mai na lam

•   Mara gara hku raw ya na lam

•   Ma ni hpe gara hku sharin achyin ya na lam

 Kalang lang gaw manghkang ni byin chye ai. Ga shadawn, 1998 Sohparet (Sofres) company a sawk sagawn ai shiga hku nga yang, kun dinghku 20 hta 1 gaw ningrum ningtau langai Sakse Hkam byin mat ai majaw manghkang kaba byin ai hpe chye lu ai.

 Chyum Laika lam matsun ai hpe hkan sa ai ni gaw, kalang lang dinghku kata hta manghkang byin chye ai lam Yesu tau hkrau tsun da ai. (Mahte 10:32-​36) Roma Hkawseng Mungdan uphkang ai aten hta “Hkristan ni gaw kun dinghku hpe jahten sharun hkra galaw ai ni re nga nna mara shagun wa ai” a ngu Labau ka sara Will Durant tsun wa ai. Dai ni aten hta mung, Yehowa Sakse nkau mi gaw, dai zawn tsun hkrum nga ai. Dai hku mara shagun hkrum ai majaw, Sakse Hkam ni gaw dinghku hpe jahten sharun nga ai ni kun?

 Yehowa Sakse ni gaw kun dinghku hpe jahten sharun nga ai ni ngu nna mara shagun dawdan ya ai hpe Masha Ahkaw Ahkang Hte Seng Ai Urawpa Tara Rung (European Court of Human Rights) gaw ndai hku tsun ai: “Sakse Hkam byin mat ai nta masha a nawku htung hte seng nna lata na ahkang hte nawku na ahkang hpe, ngam ai nta masha ni gaw n hkap la, n hkungga ya ai majaw manghkang ni byin wa ai re.” Ndai hku mung tsun ai: “Yehowa Sakse byin ai majaw sha, dai manghkang ni byin ai n re. Dai zawn manghkang ni gaw, makam masham n bung ai dinghku ni hta galoi mung byin chye ai.” b Yehowa Sakse ni gaw makam masham hte seng nna manghkang ni hkrum wa yang, “N kaja ai majaw, n kaja ai hku kadai hpe mung hkum tai mu, . .  Nanhte rai lu myit dai daram, masha nlang hte hte myit hkrum nna hkau chyap nga mu” ngu ai Chyum Laika lam matsun hpe hkan sa na matu shakut ga ai.​​—Roma 12:17, 18.

 “Karai Wa hpe dum ai hte sha,” hkungran u ngu ai Chyum Laika lam matsun hpe Sakse Hkam ni hkan sa ai majaw, makam masham bung ai shada da hte sha dinghku de ma ai. (1 Korinhtu 7:​39) Ndai hpyi shawn ga gaw Chyum Laika ga hte hkrak sha rai nna, tatut re ai lam mung re. Ga shadawn, 2010 hta shapraw ai laika buk langai (Journal of Marriage and Family) a sumhpa langai hta ndai hku tsun da ai: “Makam masham bung ai yanla ni gaw nawku daw jau ai lam hta arau shang lawm lu nna, tsun jahta lu ai majaw” dinghku makyit sumri grau ngang kang ma ai. c

 Yehowa Sakse ni gaw, shanhte a hpunau nauna ni hpe Sakse Hkam n re ai ningrum ningtau hte garan nga na matu n-gun n jaw ai. Chyum Laika ndai hku tsun ai: “Hpunau langai ngai n kam n sham ai madu jan lu dam ti mung, dai numsha shi hte rau nga nga mayu a yang gaw, shi hpe n jahka kau u ga. Numsha mung n kam n sham ai madu wa lu dam ti mung, shi hte rau nga nga mayu a yang gaw, dai la wa hpe n jahka kau u ga.” (1 Korinhtu 7:​12, 13) Yehowa Sakse ni gaw dai Chyum Laika lam matsun hpe hkan sa ga ai.