Dinghku hpe n nan gaw de ya ai Yehowa gaw, kashu kasha ni hpe uphkang na matu kanu kawa ni hpe lit jaw da ai. (Kolose 3:20) Tinang a ma ni, Yehowa hpe tsawra wa hkra, lit la chye ai ni tai wa hkra, kanu kawa ni gaw shanhte hpe sharin achyin ya ra ai. (2 Timohti 1:5; 3:15) Dai hta n ga, ma ni a salum hta hpa nga ai hpe mung, chye hkra galaw ra ai. Nanhte a akyang lailen ni gaw, grai ahkyak ai. Yehowa a mungga ni hpe, nanhte a salum hta shawng bang da yang, kaja ai hpe sharin ya lu na re.​—⁠Shakawn 40:8.

CHYUM LAIKA TSUN AI LAM: “Na la na matu lawan nga u ga; ga tsun na matu hkum tin nga u ga.” (Yaku 1:19) Kanu kawa hpe hpa mung tsun mai ai lam, ma ni hpe chye shangun da ra ai. Ma ni tsun shaga mayu ai aten hta, madat ya na matu, nang jin jin rai nga ai hpe shanhte chye da ra ai. Ma ni tsun wa hkra, nang lam hpaw da yang she, shanhte tsun wa na re. (Yaku 3:18) Nang ga shaga mazut ai (sh) mara tam chye ai nga yang, ma ni gaw nang hpe dan dan leng leng, tsun gwi sana n re. Dai majaw, ma ni a ntsa myit galu nna, nang kade daram tsawra ai hpe chyahkring hkring tsun dan u.​—⁠Mahte 3:17; 1 Korinhtu 8:1.

NANG GALAW MAI AI LAM:

• Ma ni ga shaga mayu ai shaloi, madat ya na matu, jin jin rai u

• Manghkang byin jang she, ma ni hte shaga ai n re ai sha, ayan ga shaga ya u

CHYUM LAIKA TSUN AI LAM: “Masha a myit hta hpaji daw ai gaw, sung ai hka hte bung ti mung, nyan rawng ai wa mahtang ja la lu na ra ai.” (Ga Shagawp 20:5) Kalang lang, ma ni teng sha hkam sha ai hpe chye na matu, shanhte tsun ai ga si hpe n re ai sha, tsun mayu ai lachyum hpe chye hkra shakut ra ai. Hpa majaw nga yang, ramma nkau mi gaw lai lai jan jan chye tsun ai (sh) n myit yu ai sha shaga chye ai majaw re. “Naw n sagawn yu ai, ga htan ai wa gaw, angawk ai mara hte kaya kahpa hkrum na ra ai.” (Ga Shagawp 18:13) Dai majaw, ma ni hpe pawt hkum lawan.​—⁠Ga Shagawp 19:11.

NANG GALAW MAI AI LAM:

• Ma ni shaga ai shaloi, htum hkra n madat ai sha, ahkre dat ai baw n mai galaw ai

• Tinang mung shanhte zawn, asak kaji ai aten hta, gara hku hkam sha wa ai, gara hpe ahkyak shatai wa ai hpe bai myit yu u

CHYUM LAIKA TSUN AI LAM: “Ngai sha e, wa a sharin achyin ai ga madat mara u; Nnu a tara hpe mung, hkum gang kau et.” (Ga Shagawp 1:8) Ma ni hpe uphkang na matu, kanu yan kawa hpe Yehowa lit jaw da ai. Dai majaw, nanhte hpe ma ni hkungga nna, madat mara na matu sharin ya ra ai. (Ehpesu 6:1-3) Kanu kawa ni “myit mang langai sha” n rai yang, dai hpe ma ni aloi sha chye lu ai. (1 Korinhtu 1:10) Dai majaw, nan myit n hkrum ai lam nga yang pyi, dai hpe ma ni n chye hkra nga u. Rai yang she, nan hpe matut hkungga na re.

NANG GALAW MAI AI LAM:

• Ma ni hpe gara hku sharin shaga na hpe, nan bawng ban nna, myit hkrum da u

• Ma ni hpe sharin shaga ai hte seng nna, mu mada lam n bung yang, ningrum ningtau a ningmu hpe chye na hkra shakut u

CHYUM LAIKA TSUN AI LAM: “Ma kaji hpe, shi hkan mai ai lam hta sharin u.” (Ga Shagawp 22:6) Na a ma ni gaw, shi hkrai myitsu wa na n re. Dai majaw, masing jahkrat nna sharin shaga ra ai. (Shakawn 127:4; Ga Shagawp 29:17) Sharin shaga ai ngu ai hta, masat da ai tara ni hpe, hpa majaw hkan sa ra ai hpe, chye na hkra tsun dan ai ni mung lawm ai. (Ga Shagawp 28:7) Dai hta n ga, Yehowa a mungga ni hpe tsawra wa hkra, Chyum Laika tara ni hpe chye na wa hkra, sharin ya u. (Shakawn 1:2) Shaloi she, ma ni a kaja n kaja chye ginhka ai nyan, galu kaba wa na re.​—⁠Hebre 5:14.

NANG GALAW MAI AI LAM:

• Karai Kasang gaw, kam hpa ging ai wa re ai hpe, ma ni chye na hkra, sharin ya u

• Internet hte social network ni hta mu lu ai, akyang hten chye ai ni hpe koi gam chye na matu, ma ni hpe tsun dan u. Hkum shan roi rip ai ni a hpyen kaw nna, gara hku koi ra na hpe mung chye na hkra tsun dan u