Ndai laika buk hpe hti ngut ai hpang, Chyum ga matsun ni gaw, dinghku hte na a matu akyu nga ai lam mu lu na. Yehowa gaw, nang hpe ngwi pyaw shangun mayu ai. Nawku daw jau lam shawng tawn yang, “dai nlang nanhte hpe kahtap jaw na” ngu shi ga sadi jaw da ai. (Mahte 6:33) Shi nang hte hku hkau mayu ai. Nang mung, shi hte hku hkau na matu, dang di lu ai daram shakut ra ai. Ndai gaw, laksan ahkaw ahkang langai mung re.​—⁠Mahte 22:37, 38.

CHYUM LAIKA TSUN AI LAM: “Nanhte a Kawa ngai tai na nngai rai nna, nanhte gaw nye a shadang sha ni hte shayi sha ni tai na marin dai” ngu Yehowa tsun ai. (2 Korinhtu 6:18) Karai Kasang gaw, shi hte grai hkau shangun mayu ai. Akyu hpyi nna hku hkau mai ai. Dai majaw, “n sim n sa akyu hpyi nga” na matu, Yehowa n-gun jaw da ai. (1 Htesaloni 5:17) Na a kraw kata hkam sha ai hte, myit tsang lam ni hpe shi grai madat mayu ai. (Hpilipi 4:6) Nta masha ni hte nang rau akyu hpyi ai shaloi, Karai Kasang hte nang kade daram hku hkau ai hpe shanhte mu wa na.

Karai Kasang hpe akyu hpyi ai sha n ga, shi tsun ai hpe mung madat ra ai. Chyum Laika hte Chyum Laika hte seng ai, laili laika ni hpe hkaja ai gaw, shi a ga madat ai hte bung ai. (Shakawn 1:1, 2) Nang sharin la ai ni hpe bai sumru u. (Shakawn 77:11, 12) Karai Kasang a ga madat na matu, nawku zuphpawng mung ayan lung ra ai.​—⁠Shakawn 122:1-4.

Yehowa hte hku hkau mai ai lam langai gaw, masha ni hpe shi a lam tsun dan ai re. Masha ni hpe tsun dan magang, shi hte grau hku hkau magang re.​—⁠Mahte 28:19, 20.

NANG GALAW MAI AI LAM:

• Shani shagu aten la nna, Chyum Laika hti u, akyu hpyi u

• Myit shalan ai lam hte ban sa ai lam ni hta na, makam masham lam hta dinghku nawng shang lawm u

CHYUM LAIKA TSUN AI LAM: “Karai Kasang hpang de sit sa wa mu; shaloi shi nanhte hpang de sit wa na ra ai.” (Yaku 4:8) Lamang galaw da ai hte maren, dinghku nawku a hpe ayan galaw ra ai. (Ningpawt 18:19) Dai hta n ga, na prat hta Karai Kasang hpe shani shagu dum let asak hkrung ra ai. Karai Kasang hte na dinghku grau hku hkau na matu, “nta e dung nga let mung, lam e hkawm sa let mung, taw nga rawt wa let mung” shi a lam tsun dan ra ai. (Tara Jahprang 6:6, 7) “Ngai hte nye a nta masha ni chyawm gaw Yehowa hpe jaw jau na” ngu tsun wa ai Yawshu zawn, nang mung bandung tawn mai ai.​—⁠Yawshu 24:15.

NANG GALAW MAI AI LAM:

• Dinghku nawku hpe ayan galaw nna, nta masha langai hpra a ra rawng ai ni hpe, shaman shakyang ya u