Hkungran ai gaw, dinghku nnan de hpang ai re. Kanu kawa hpe tsawra nna, hkungga ra tim, ya gaw na a matu ningrum ningtau gaw, ahkyak htum rai mat sai. Dai hpe, jinghku jingyu nkau mi hkap la yak na. Dinghku nnan hpe gawgap let, jinghku ni hte rap rap ra ra nga na matu, Chyum ga matsun ni gaw, nang hpe karum ya lu ai.

CHYUM LAIKA TSUN AI LAM: “Na nnu yan nwa hpe hkungga lara di mu.” (Ehpesu 6:2) Na asak kade raitim, kanu kawa hpe matut hkungga ra na re. Na ningrum ningtau mung kasha langai re ai majaw, shi kanu kawa hpe mung hkungga ra ai. “Tsaw ra ai myit gaw manawn masham n nga ai” majaw, shanhte hte kanawn mazum ai hpe nang myit n pyaw hkum rai.​—⁠1 Korinhtu 13:4; Galati 5:26.

NANG GALAW MAI AI LAM:

• “Na nta masha ni gaw ngai hpe galoi mung yu kaji ai” “Na nu gaw ngai hpe galoi mung kaja n tsun ai” ngu ai ga ni hkum tsun

• Ningrum ningtau hpang maga hku nna mu chye hkra shakut u

CHYUM LAIKA TSUN AI LAM: “Lasha gaw tinang a kanu kawa hpe kau da nhtawm shi a madu jan hte manoi nga na rai nna, shan lahkawng gaw hkum shan langai sha tai lu na ma ra ai.” (Ningpawt 2:24) Nang dinghku de mat tim, na nu yan wa gaw, nang hpe matut nna lanu lahku ra ai ngu hkam la na re. Dai majaw, ra ai hta na, grau shang lawm mayu ai mung rai na re.

Lahkawng maga na kanu kawa ni hpe, na dinghku a gara lam ni hta sha karum na hpe, nan daw dan nna shanhte hpe hkungga let tsun dan u. Si mani let dan dan leng leng tsun u. (Ga Shagawp 15:1) Myit nem ai, sumnung ai hte myit galu na nga yang, jinghku ni hte simsa nna, “tsaw ra” myit mung matut madun lu na re.​—⁠1 Korinhtu 13:4, 7.

NANG GALAW MAI AI LAM:

• Dinghku lam hta, jinghku ni a majaw myit n pyaw lam ni byin wa yang, myit zim ai aten hta ningrum ningtau hte bawng ban u

• Dai hpe gara hku hparan na ngu ai lam rau daw dan da u