“Jahpawt shagu ngai mahkawn hpaw ai. Mawdaw ntsa hta mung mahkawn hpaw ai. Hkring sa nga ai aten, nta jasan jaseng galaw ai aten, laika hti ai aten hta pyi mahkawn hpaw tawn da ai. Aten tup mahkawn madat byin ai.”​—Kare.

Nang mung Kare zawn yungwi hpe grai ra sharawng ai kun? Ra sharawng ai rai yang, yungwi kaw na akyu hkamsha lu na matu, yungwi a shoihpa kaw na koi lu na matu, yungwi hpe hpaji rawng ai hku lata lu na matu, ndai sumhpa gaw nang hpe karum ya na re.

•  Akyu ni

•  Shoihpa ni

•  Ramma shada tsun ai lam

Mahkawn madat ai hpe lu sha sha ai hte shingdaw mai ai. Htap htuk ai amyu hpan, htap htuk ai shadang rai yang she, nang hpe akyu jaw na re. Myit yu u:

• Yungwi gaw myit sharawt ya nna shalan shabran ya ai.

  “Myit ru ai aten ni hta, ngai ra ai mahkawn hpe madat dat ai hte kalang ta myit bai hkyam sa wa ai.”​—Mak.

• Yungwi gaw moi na aten ni hpe bai myit dum shangun ai.

  “Mahkawn nkau gaw, moi na lam ni hpe bai myit dum wa shangun chye ai. Dai mahkawn hpe na shagu, grai pyaw ai.”​—Shila.

• Yungwi gaw kahkyin gumding lam mung byin shangun ai.

  “Yehowa Sakse Ni a mungdan ga daga zuphpawng kaba a hpang jahtum mahkawn hpe, yawng mahkawn ai shaloi myi prwi si ni hkrat wa ai. Amyu ga n bung tim, mahkawn hpe gaw yawng maren sha lu mahkawn ai majaw le.”​—Temi.

• Yungwi gaw kaja ai atsam ningja ni nga hkra karum ya lu ai.

  “Madum sumpyi langai hpe chye dum hkra sharin la ai gaw, shaman shakyang chye ai akyang nga hkra, myit galu hkra karum ya ai. Alawan chye mat ai baw n re ai sha, shaman shakyang nga yang she chye wa ai baw re ai majaw le.”​—Ena.

Nang chye ai kun? Chyum Laika hta galu dik htum laika re ai Shakawn Kungdawn laika hta mahkawn 150 ting lawm ai.

Mahkawn nkau gaw, tsu taw ai lu sha hte bung nna, shoihpa byin shangun lu ai. Hpa majaw ngu ai hpe yu yu u:

• Mahkawn nkau hta ngang hte seng nna pra pra mu shangun ai ga si ni lawm ai.

  “Mying kaba ai mahkawn yawng ngu na daram gaw, ngang hte seng ai lam ni sha re. Dai lam hte seng na asan pra pra nan mahkawn da ma ai.”​—Hanna.

  Chyum Laika tsun ai lam: “Hpye ai amu, n san n seng ai yawng hte hte, nammak lawhpa ai hpe nanhte hta e ga hte pyi n shamying u ga; dai lam gaw chyoi pra ai ni a matu sut nga ai.” (Ehpesu 5:3) Tinang hkum tinang ndai hku san u, ‘Ngai madat ai mahkawn ni gaw ndai chyum ga hte nhtan shai nga ai kun?’

• Mahkawn nkau gaw grau nna myit n pyaw mat shangun ai.

  “Shana maga yupra hta kaleng na mahkawn madat ai shaloi, myit kaji shangun ai lam ni hpe myit wa nna, dai zawn myit ai kaw na n lu jahkring mat ai. Dum shingran ai mahkawn ni gaw, grau myitru shangun ai myit ni sha byin wa shangun ai.”​—Temi.

  Chyum Laika tsun ai lam: “Myit masin gaw asak a npawt nhpang rai nga ai majaw, Dai hpe tsam mari bau sin nga u.” (Ga Shagawp 4:23) Tinang hkum tinang ndai hku san u, ‘Ngai madat nga ai mahkawn ni gaw n kaja ai ningmu hku sha myit wa shangun ai kun?’

• Mahkawn nkau mi gaw masin shapawt ya ai.

  “Masin pawt, tinang hkum tinang myit n dik, nju ndawng ai lam ni lawm ai mahkawn ni hpe madat ai shaloi, ngai mung arau masin pawt wa ai. Dai zawn re ai mahkawn ni hpe madat ngut ai hpang, ngai na myit ni gaw moi na hte n bung mat ai hpe sadi hkrup ai. Nta masha ni mung dai hpe sadi hkrup ai.”​—Jawn.

  Chyum Laika tsun ai lam: “Masin pawt ai, n-yun bu ai, n hkru n hkra ai, shatan nhkan ai hte ga kinsha hte hpe, nanhte a n-gup na yeng kau mu.” (Kolose 3:8) Tinang hkum tinang ndai hku san u, ‘Ngai madat ai mahkawn ni gaw, kaga ni hpe n ju n dawng ai myit, kaga ni a hkamsha lam hpe n gawn n sawn galaw ai myit nga wa shangun ai kun?’

Madung lam gaw hpa kun? Mahkawn ni hpe atsawm lata na madat ra ai. Ramma Juliya gaw dai hku galaw wa ai. “Ngai na mahkawn ni hpe jep yu nna, n htap htuk ai ngu shadu ai mahkawn ni hpe n madat ai. Loi gaw n loi tim, ngai galaw ging ai bungli re” ngu shi tsun ai.

Num kasha Tera mung dai hku galaw wa ai. Shi ndai hku tsun ai: “Rediyo kaw na, grai madat pyaw na zawn re ai makawn ni hpe shapoi ai. Raitim, ga si ni hpe madat yu ai shaloi, kaga lai galai madat ra sai hpe chye dat ai. Dai hku galaw ai gaw, grai mu ai muk hpe n-gup mi sha naw lu sha ai wa, dai hpe kabai kau ra ai hte bung ai. Ngang hte seng nna mahkawn da ai mahkawn hpe nyet kau lu ai atsam ngai hta nga ai rai yang, n hkungran shi yang rau nga na matu gunglau hkrum ai shaloi, nyet kau lu ai atsam nga wa na re. Ngai madat ai mahkawn ni gaw, ngai hpe hkra machyi shangun lu ai majaw, dai hpe ahpa atang n kam galaw ai.”