Dawla wan hkying hku lu nga ai electronic game ni shapraw ai Amerikan mungdan hta . . .

1. Game ginsup ai ni a yawm htum asak kade daram rai na kun?

   1. 18 ning

   2. 30 ning

2. Game ginsup ai ni gaw num ni (sh) la ni rai na kun?

   1. La gaw tsa lam shadang 55%; Num gaw tsa lam shadang 45%

   2. La gaw tsa lam shadang 15%; Num gaw tsa lam shadang 85%

3. Dai hpung lahkawng hta game grau ginsup ai jahpan law htum gaw gara hpung rai na kun?

   1. Asak18 ning hte 18 ning lahta num ni

   2. Asak 17 ning lawu grit lasha ni

Ndai jahpan ni gaw, game hpe kadai ni ginsup nga ai hpe chye shangun ai. Electronic game ginsup ai gaw, anhte hpe kaja ai akyu (sh) n kaja ai akyu jaw ai kun? ngu ai hpe gaw n tsun dan da ai.

Electronic game ni hte seng nna gara lam hpe nang myit hkrum ai kun?

• “Electronic game ni gaw nta masha ni hte mung, manang ni hte mung, grau hku hkau shangun ai pyaw hpa game re.”​—Ai Ring.

• “Electronic game ni gaw myit hpe shalawt ya lu ai lam mung re.”​—An Net.

• “Electronic game ni gaw bai htang ai atsam jat shangun ai.”​—Hkristuhpa.

• “Electronic game ni gaw manghkang ni hpe hparan lu ai atsam jat shangun ai.”​—Emi.

• “Electronic game ni gaw bawnu hpe shaman ya ai lamang ni galaw chye hkra, myit yu sawn yu chye hkra karum ya ai.”​—An Htuni.

• “Game nkau mi gaw hkum hkrang hpe shamu shamawt shangun ai majaw hkum hkrang tsawm hkra karum ya ai.”​—Taw Mat.

• “Game nkau mi gaw shamu shamawt ra ai majaw hkum hkrang hpe shatsawm ya ai.”​—Jea.

Lahta na ga nkau mi (sh) yawng hpe nang myit hkrum ai kun? Video game ni gaw myit hte hkum hkrang hpe akyu jaw ai. Nkau game ni gaw majoi mi aten jahtum ai zawn raitim—Annet tsun wa ai zawn—“myit hpe shalawt ya lu ai lam” mung re ai majaw, kalang marang ginsup ai gaw n shut ai.

● “Yawng mayawng a matu du hkra ladaw nga nna, sumsing lamu npu e ra mara matu aten nga nga ai” ngu Chyum Laika hta tsun ai shaloi, ban sa lam mung lawm ai.​—Hpaji 3:​1-4.

Electronic game ginsup nna aten jahtum nga ai kun?

“Game ginsup yang bai jahkring na matu grai yak ai. ‘Loi sha ginsup sana re!’ ngu myit nga ninglen, hkying hkum 2 daram htum mat ai. Dai shaloi she aten dai daram ting majoi jahtum kau ai hpe dum mat ai!”​—Annet.

“Video game ni gaw aten ni hpe majoi mi byin mat shangun ai. Aten grai jaw nna poi 5 daram ginsup dang ai shaloi, tinang hkum tinang grai arawng la ai. Teng sha tsun ga nga yang, galaw awng dang ai lam hpa mung n nga ai.”—Serena.

Ahkyak ai lam: Gumhpraw jai shama kau yang bai lu tam ai. Raitim, tinang jahtum kau ai aten ni hpe chyawm gaw gara hku mung bai n lu sai. Aten gaw gumhpraw hta grau nna manu dan ai. Dai majaw aten hpe majoi mi hkum shama kau!

● Chyum Laika hta ndai hku tsun ai: “Shinggan de nga ai ni a man e hpaji byeng-ya hte hkawm nga nna, ahkying aten hpe lata mari la mu.”​—Kolose 4:5.

Electronic game ni gaw na a myit sumru ai lam ni hpe hkra machyi shangun ai kun?

“Si dam jaw ging ai nhkru nhkra amu ni hpe, video game ni hta gaw minit mi daram pyi n myit ai sha tawt lai chye ai.”​—Set.

“Game law malawng gaw, tinang a bandung de du hkra galaw na matu hpyen law law hpe gasat shamyit ra ai. Law malawng gaw, grai hkrit na zawn sat kau ra ai.”​—Annet.

“Kalang lang game ginsup let, tinang a manang wa hpe ‘si u!’ ‘nang si na sha myit da u!’ ngu nna tsun hkrup ai hpe, ngai she mau mat ai.”​—Nahtan.

Ahkyak ai lam: Karai Kasang n ju n dawng ai lam ni, nhkru nhkra ai lam ni, ngang hte seng nna akyang hten ai lam hte nhkru ai nat ni hte matut mahkai ai game ni hpe koi u.​—Galati 5:19-21; Ehpesu 5:10; 1 Yawhan 2:15, 16.

● Yehowa gaw “tara n lang ai wa hte kashun kashe tsaw ai wa hpe, Shi a myit masin n dawng nga mu ai” ngu nna Chyum Laika hta tsun da ai. (Shakawn 11:5) Tinang ginsup ai electronic game ni gaw, tinang gara zawn masha byin wa na hpe n madun ya ai raitim, tinang gara zawn masha rai nga sai hpe gaw madun ya ai.

Myit yu u: Laika buk langai (Getting to Calm) hta tsun ai gaw, “grai hkrit hpa lam ni lawm ai game hpe ginsup ai gaw, TV yu ai hta grau nna ma ni a arawn alai hpe hkra machyi shangun ai. Hpa majaw kun? Sai pya pya hte pawt nga ai game kaw lawm ai masha hpe yu nga ai daram sha n re. Ma ni nan dai game kaw na wa tai nga sai re. Jawng sara langai zawn sha, ndai game ni gaw nhkru n kaja lam ni hpe atsawm chye wa hkra sharin ya ai.”​—Esaia 2:4 hte shingdaw yu u.

Ramma law law gaw game ginsup ai hte seng nna rapra ai lam nga hkra sharin la ai. Ga shadawn lahkawng hpe yu ga.

“Ngai ‘Hkyinghkum 5 yup yang ram sai, level langai naw shadang la na’ ngu myit nna, yup tung du hkra game ginsup ai. Ya chyawm gaw game ginsup ai hte seng nna rapra ai ningmu nga na matu sharin la sai. Game ginsup ai hpe ra ai raitim, shi aten hte shi sha ginsup sai.”​—Josep.

“Ngai game ginsup ai hpe jahkring kau ai majaw, bungli ni grau galaw lu wa sai. Chyum Laika lam hkaw tsun ai bungli hta grau shang lawm lu wa ai. Nawku hpung hta kaga masha ni hpe lu karum ya wa ai. Ya ngai madum sumpyi langai hpe chye dum hkra lu sharin la sai. Shawng na masa hte gaw grai shai mat sai!”​—Debit.

● Kunghpan ai num, la ni gaw “sadi sahka ai” hte galaw chye ai. (1 Timohti 3:​2, 11) Ban sa ai lam hpe shanhte ra sharawng ai raitim, gara aten hta jahkring ra na hpe chye ma ai. Shanhte hkum shanhte mung hkang lu ai.​—Ehpesu 5:​10.

Ahkyak ai lam: Game ni hpe shi aten hte shi ginsup ai rai yang, kaja ai ban sa lam byin na re. Raitim, game ginsup ai aten hpe n hkang yang gaw, na prat a matu ahkyak ai lam hpe myit maju n jung mat ai (sh) aten majoi sha htum mat chye ai. Game hpe level yawng ngut ai du hkra shakut nna ginsup na matu myit maju jung na malai, prat hpe akyu jaw na bungli langai ngut hkra shakut nna galaw ai gaw grau kaja ai n rai?