TIMEƔRI 01

Acu n lfayda i gezmer a ɣ-d-yawi Wedlis Iqedsen?

SEL S

Akken ma nella, nesteqsay iman-nneɣ ɣef waṭas n leḥwayeǧ: ɣef tudert, ɣef lemḥayen, ɣef lmut, neɣ ɣef wayen i ɣ-yeţṛaǧun ɣer zdat. Uyerna neţḥebbiṛ irkelli. Neţḥebbiṛ ɣef wamek ara nessiweḍ a nessečč tawacult-nneɣ d wayen i glaqen a t-nexdem bac ad feṛḥen. Aṭas i gufan belli Adlis Iqedsen yeţţarra-d leǧwab ɣef yesteqsiyen imeqranen yerna yeţɛawan-iten di temɛict-nsen. I kečč (i kemm), d acu i tenniḍ? Tzemreḍ aţ-ţafeḍ lfayda deg Wedlis Iqedsen?

1. D acu-ten yesteqsiyen iɣef i d-iţǧawab Wedlis Iqedsen?

Adlis Iqedsen yeţţarra-d leǧwab ɣef yesteqsiyen-agi: Ansi i d-nekka nekni s yemdanen? Acuɣer i d-nusa ɣer ddunit? Acuɣer i ţsufrin wid ur nexdim acemma? S anda i neţṛuḥu m’ara nemmet? Medden meṛṛa bɣan ad ɛicen di lehna, acuɣer ihi i llant wannect-a n lgirrat? Aţ-ţenger ddunit yiwen wass? Yelha ma nesteqsay akka iman-nneɣ. D ayagi i xedmen imelyan n lɣaci yerna ufan leǧwab i ten-issefṛḥen deg Wedlis Iqedsen.

2. Amek i gezmer a k-iɛiwen Wedlis Iqedsen di temɛict-ik?

Adlis Iqedsen yeččuṛ d lewṣayat yelhan. Ɣef lemtel, yeţɛawan iɛeggalen n twacult ad afen lfeṛḥ. Yeqqar-aɣ-d daɣen d acu i glaq a nexdem bac ur netqelliq ara aṭas w’a naf lfeṛḥ di lxedma-nneɣ. Aţ-ţafeḍ di tektabt-agi ayen i d-yeqqar Wedlis Iqedsen ɣef leḥwayeǧ-agi akk-d tiyaḍ. Aţ-ţwaliḍ s yiman-ik belli ‘Tira meṛṛa [yeɛni ayen akk yellan deg Wedlis Iqedsen] zemrent a k-nefɛent’ (2 Timutawus 3:16).

Taktabt-agi a k-tɛiwen aţ-ţeɣreḍ Adlis Iqedsen, meɛna ur tezmir ara aţ-ţuɣal deg wemkan n Wedlis Iqedsen. Daymi i gelha aţ-ţeqqareḍ ifyar i gellan di mkul timeɣri w’aţ-ţwaliḍ ma ɛedlen d wayen i tḥeffḍeḍ.

A NNADI A NEFHEM AKTEṚ

A nwali amek i gɛawen Wedlis Iqedsen medden, ayen i glaqen a t-txedmeḍ bac a k-teɛǧeb leqraya n Wedlis Iqedsen, yerna acuɣer i teḥwaǧeḍ lemɛawna akken aţ-ţfehmeḍ ayen yellan deg-s.

3. Adlis Iqedsen yezmer a ɣ-d-issken abrid

Adlis Iqedsen am teftilt yeţceɛciɛen. Yis, nezmer a nẓer anwa ṛṛay i glaq a neṭṭef yerna nezmer a nefhem d acu i ɣ-yeţṛaǧun ɣer zdat.

Ɣret-ed Ahellil 119:105, mbeɛd hedṛet ɣef yesteqsiyen-agi:

D acu i geţxemmim win i gketben ahellil-agi ɣef Wedlis Iqedsen?
I kečč, d acu i teţxemmimeḍ ɣef Wedlis Iqedsen?

4. Adlis Iqedsen yeţǧawab-ed ɣef yesteqsiyen-nneɣ

Yiwet n tmeṭṭut tufa-d deg Wedlis Iqedsen leǧwab ɣef yesteqsiyen i ţ-iceɣben aṭas n iseggasen. Walit BIDYU-YAGI, mbeɛd hedṛet ɣef yesteqsiyen-agi:

BIDYU: Ur qeṭṭeɛ ara layas! (1:48)

D acu-ten yesteqsiyen i gceɣben tameṭṭut-agi?
Amek i ţ-iɛawen wayen i teɣra deg Wedlis Iqedsen?

Adlis Iqedsen yeţweṣṣi-yaɣ a neţqellib leǧwab ɣef yesteqsiyen-nneɣ. Ɣret-ed Matta 7:7, mbeɛd hedṛet ɣef westeqsi-yagi:

D acu-ten yesteqsiyen iɣef i tebɣiḍ aţ-ţafeḍ leǧwab deg Wedlis Iqedsen?

5. Tezmer a k-teɛǧeb leqraya n Wedlis Iqedsen

Xilla n medden i gḥemmlen ad ɣren Adlis Iqedsen yerna ţţafen deg-s lfayda. Walit BIDYU-YAGI, mbeɛd hedṛet ɣef yesteqsiyen-agi:

BIDYU: Leqraya n Wedlis Iqedsen (2:05)

Ḥemmlen ad ɣren yelmeẓyen i d-ihedṛen di bidyu-yagi?
Ayɣer ihi i ḥemmlen ad ɣren Adlis Iqedsen?

Ayen yesselmad Wedlis Iqedsen yeţṣebbir-aɣ yerna yeţţak-aɣ-d asirem. Ɣret-ed Iṛumaniyen 15:4, mbeɛd hedṛet ɣef westeqsi-yagi:

Tebɣiḍ aţ-ţeẓreḍ d acu i d-yeqqar Wedlis Iqedsen ɣef uṣebber akk-d usirem?

6. Yeshel akteṛ a nefhem Adlis Iqedsen ma yella win i ɣ-yeţɛawanen

Aṭas i gḥemmlen ad ɣren Adlis Iqedsen, meɛna ufan daɣen belli yelha m’ara heddṛen fell-as akk-d wiyaḍ. Ɣret-ed Lecɣal 8:26-31, mbeɛd hedṛet ɣef westeqsi-yagi:

Amek i nezmer a nefhem Adlis Iqedsen? (Walit ifyar 30 akk-d 31.)

Argaz-nni n tmurt n Kuc (Ityubya) iwala belli yeḥwaǧ win ara s-d-issefhmen ayen i geqqar. Ula d ass-agi, aṭas i gufan belli yelha m’ara heddṛen ɣef Wedlis Iqedsen akk-d wiyaḍ.

KRA QQAREN: “Win yeqqaren Adlis Iqedsen d aḍeggeɛ i geṭṭeggiɛ lweqt-is.”

I kečč, d acu i teţxemmimeḍ? Acuɣer?

AYEN I D-NELMED

Neţţaf deg Wedlis Iqedsen lewṣayat yelhan ara ɣ-iɛiwnen di temɛict-nneɣ, yeţţarra-d leǧwab ɣef yesteqsiyen imeqranen, yeţṣebbir-aɣ yerna yeţţak-aɣ-d asirem.