Rut segir: „Ég er með arfgengan kvilla sem veldur því að ég er stöðugt með mikla verki. Þess vegna nýt ég alls ekki sömu lífsgæða og áður.“ Eitt af því sem hún hafði hvað mestar áhyggjur af var að hún gat stundum ekki einbeitt sér að biblíulestri og því að sinna trú sinni. En orð Jesú í Matteusi 19:26 voru henni mikil hvatning: „Guði er ekkert um megn.“ Rut fann aðferðir sem hentuðu henni til náms. Stundum var hún með svo mikla verki að hún gat varla lesið. Hún fór því að hlusta á upplestur úr Biblíunni og biblíutengdum ritum. * Hún segir: „Ég veit ekki hvernig ég hefði haldið sambandinu við Guð sterku án þessara hjálpargagna.“

Þegar Rut verður döpur yfir að geta ekki gert eins mikið og áður sækir hún huggun í 2. Korintubréf 8:12: „Ef viljinn er góður þá er hver metinn eftir því sem hann á og ekki eftir því sem hann á ekki til.“ Það minnir hana á að Guð er ánægður með það sem hún gerir vegna þess að hún gerir sitt besta miðað við aðstæður.

Daníella, sem minnst var á áður, segir: „Eftir að 18 ára gömul dóttir mín lést var sársaukinn svo mikill að ég hélt að ég gæti ekki lifað áfram. Lífið hafði breyst til frambúðar.“ Sálmur 94:19 var henni mikil huggun en þar segir sálmaskáldið við Guð: „Þegar áhyggjur þjaka mig hressir huggun þín sál mína.“ Daníella segir: „Ég bað Jehóva að hjálpa mér að finna eitthvað sem gæti huggað mig.“

Hún fór að sinna mikilvægu sjálfboðastarfi af krafti. Seinna líkti hún sér við vaxliti. Rétt eins og hægt er að lita með vaxlitum þó að þeir brotni, gat hún hjálpað öðrum þó að hún væri niðurbrotin. Hún segir: „Það rann upp fyrir mér að þegar ég notaði meginreglur Biblíunnar til að hughreysta biblíunemendur mína var Jehóva ekki síður að hugga og hughreysta mig.“ Hún bjó sér til lista yfir biblíupersónur sem urðu fyrir mikilli sorg og segir að „þær voru undantekningalaust bænrækið fólk“. Henni lærðist líka að „maður finnur ekki svör í Biblíunni nema með því að opna hana“.

Af námi sínu í Biblíunni lærði Daníella þar að auki að horfa fram á veginn í stað þess að hugsa um það sem er liðið. Vonin, sem minnst er á í Postulasögunni 24:15, hughreysti hana en þar segir að „upp muni rísa bæði réttlátir og ranglátir“. Er Daníella sannfærð um að Jehóva muni reisa dóttur hennar upp til lífs á ný? Hún segir: „Ég sé dóttur mína fyrir mér í framtíðinni. Það má segja að Jehóva sé nú þegar búinn að setja næsta ‚stefnumót‘ okkar á dagatal sitt. Ég man svo vel eftir þegar ég sá hana fyrst, daginn sem hún fæddist, og ég sé hana jafn ljóslifandi fyrir mér í garðinum heima í framtíðinni.“