Ikabilangantayo nga umuna daytoy a makaliwliwa a kinapudno: Makitkita ti Dios ti panagrigrigat dagiti tattao ita, ket panggepna a pagpatinggaen dayta. (Salmo 72:13, 14) Iti Biblia a Saona, ikarkari ti Dios a ‘pagin-awaennanto’ dagiti agrigrigat. Kaano? ‘Inton agparang ni Apo Jesus nga aggapu sadi langit a kaduana dagiti mannakabalin nga anghelna. Dusaennanto dagiti di mangbigbig iti Dios ken dagiti di agtulnog iti naimbag a damag maipapan ken ni Apotayo a Jesus.’ (2 Tesalonica 1:7, 8, Ti Baro a Naimbag a Damag Biblia) Mapasamak ti panagparang ni Jesus iti masanguanan, iti aw-awagan ti Biblia a “gubat ti naindaklan nga aldaw ti Dios a Mannakabalin-amin,” wenno Armagedon.​—Apocalipsis 16:14, 16.

Iti dayta a masanguanan a gubat, saan a tattao ti usaren ti Dios a makigubat kadagiti managdakdakes, no di ket ti Anakna a ni Jesu-Kristo ken dagiti mannakabalin nga anghel. Dayta a nailangitan a puersa ti mamagpatingganto iti amin a panangirurumen.​—Isaias 11:4; Apocalipsis 19:11-16.

Agingga ita, saan a nagbaliw ti panangmatmat ti Dios iti gubat. Ibilangna latta ti gubat kas nainkalintegan a pamay-an tapno agpatingga ti panangirurumen ken kinadakes. Ngem kas ipakita ti intero a historia, ti Dios laeng ti addaan kalintegan a  mangikeddeng no kaano a mapasamak ti kasta a gubat ken no siasino ti makiraman. Kas nakitatayon, inkeddengen ti Dios a mapasamak iti masanguanan ti gubat a mamagpatingga iti kinadakes ken mangibales kadagiti maparparigatan, ket ti Anakna a ni Jesu-Kristo ti makigubat. Kayatna a sawen, saan a pabor ti Dios kadagiti gubat ita, uray no agparang a nasayaat ti panggepda.

Kas ilustrasion: Ipapantayo nga adda agap-apa nga agkabsat bayat nga awan ni tatangda. Ngem simmardengda biit ket tinawaganda ni tatangda. Kuna ti maysa a ti kabsatna ti nangirugi iti apa, ngem kuna met ti maysa a saan ngamin a nasayaat ti pannakatratona. Nagpakaasida ken ni tatangda, a mangnamnamada iti suportana. Kalpasan a nangngeg ni tatangda ti rason ti tunggal maysa, imbagana nga isardengdan ti agapa ket urayenda a makaawid tapno solbarenna ti problema. Nagurayda met biit ngem idi kuan, nagapada manen. Idi nakaawiden ni tatangda, dina nagustuan ti inaramidda isu a dinusana ida ta nagsukirda.

Ita, masansan nga agpakaasi iti Dios dagiti aggugubat a nasion. Ngem awan ti pabpaboran ti Dios kadagiti aggugubat ita. Imbes ketdi, nalawag ti kuna ti Biblia a Saona: “Dikay subadan ti dakes iti dakes iti asinoman,” ken, “Dikay ibalesan ti bagbagiyo.” (Roma 12:17, 19) Imbagana pay kadagiti tattao nga agan-anusda nga ‘aguray’ iti panagtignayna inton Armagedon. (Salmo 37:7) No saan a makauray dagiti nasion iti panagtignay ti Dios ket makigubatda, makapungtot ta ibilangna dayta a naranggas a tignay ken kinaawan panagraem. Ngarud, inton Armagedon, ipakitanto ti Dios ti pungtotna ket mamimpinsanto a solbarenna ti panagririri dagiti nasion babaen ti ‘panangpasardengna kadagiti gubat agingga iti ungto ti daga.’ (Salmo 46:9; Isaias 34:2) Wen, ti Armagedon ti gubat a mamagpatingga iti amin a gubat.

Ti maysa kadagiti bendision nga ited ti Pagarian ti Dios ket ti panagpatingga ti gubgubat. Dinakamat ni Jesus dayta a gobierno iti daytoy a popular a kararag: “Umay koma ti Pagariam. Maaramid koma ti pagayatam, kas sadi langit, kasta met iti daga.” (Mateo 6:10) Saan laeng a pagpatinggaen ti Pagarian ti Dios ti amin a gubat. Pukawennanto pay ti kinadakes a ramut ti gubat. * (Salmo 37:9, 10, 14, 15) Dayta ti makagapu a padpadaanan dagiti pasurot ni Jesus dagiti bendision nga ited ti Pagarian ti Dios.​—2 Pedro 3:13.

Ngem kasano pay kabayag nga urayentayo a pagpatinggaen ti Pagarian ti Dios ti amin a panagrigrigat, panangirurumen, ken kinadakes? Ipakita ti kaitungpalan dagiti padto iti Biblia nga agbibiagtayon “kadagiti maudi nga aldaw” daytoy dakes a lubong. (2 Timoteo 3:1-5) * Dandanin pagpatinggaen ti Pagarian ti Dios ti maudi nga al-aldaw babaen ti Armagedon.

Kas naibagan, madadael inton Armagedon dagiti saan nga “agtulnog iti naimbag a damag maipapan ken Apotayo a Jesus.” (2 Tesalonica 1:8) Ngem laglagipentayo a saan a maragsakan ti Dios iti ipapatay ti asinoman, uray dagiti managdakdakes. (Ezequiel 33:11) Gapu ta “saanna a tarigagayan a madadael ti asinoman” inton Armagedon, sigsiguraduenna ita a ti naimbag a damag maipapan iti Apotayo a ni Jesus ket maikasaba “iti intero a mapagnaedan a daga maipaay a pangsaksi kadagiti amin a nasion” sakbay nga umay ti panungpalan. (2 Pedro 3:8, 9; Mateo 24:14; 1 Timoteo 2:3, 4) Wen, babaen ti sangalubongan a panangasaba dagiti Saksi ni Jehova, adda gundaway dagiti tattao ita a mangam-ammo iti Dios, agtulnog iti naimbag a damag maipapan ken ni Jesus, ken agbiag iti panawen nga awanton ti gubat.