Ania ti Nagan ti Dios? Kuna a mismo ti Dios: “Siak ni Jehova. Dayta ti naganko.” (Isaias 42:8) Mabasa iti Biblia ti personal a nagan ti Dios iti agarup 7,000 a daras. Ngem iti adu a patarus ti Biblia, nasukatan dayta iti titulo, kas iti “Apo.” Kayat ti Dios nga agbalinka a gayyemna, isu nga aw-awisennaka nga ‘umawag iti naganna.’—Salmo 105:1.

Dagiti Titulo ni Jehova. Ni Jehova ti tuktukoyen ti Biblia kadagiti titulo kas iti “Dios,” “Mannakabalin-amin,” “Namarsua,” “Ama,” “Apo,” ken “Kangatuan.” Iti adu a naisurat a kararag iti Biblia, agpada a nayawag ken Jehova dagiti madaydayaw a titulo ken ti personal a naganna a Jehova.—Daniel 9:4.

 Maipapan iti Dios. Ti Dios ket saan a makita nga espiritu. (Juan 4:24) Ibaga ti Biblia nga “awan ti tao a nakakita iti Dios.” (Juan 1:18) Ipakaammo ti Biblia dagiti riknana. Dagiti tattao mabalin a mapagliday wenno ‘maparagsakda’ ti Dios.—Proverbio 11:20; Salmo 78:40, 41.

Dagiti Nakaskasdaaw a Kualidad ti Dios. Saan a mangidumduma ti Dios aniaman ti naggapuan a nasion wenno kasasaad ti maysa a tao. (Aramid 10:34, 35) “Naasi ken mannakipagrikna, nabannayat nga agpungtot ken dakkel ti napudno nga ayatna ken kanayon a tungpalenna ti saona.” (Exodo 34:6, 7) Ngem ad-adda a makaay-ayo ti uppat a kualidad ti Dios.

Pannakabalin. Gapu ta isu ket “Dios a Mannakabalin-amin,” awan limitasion ti pannakabalinna a mangitungpal iti aniaman nga ikarina.—Genesis 17:1.

Sirib. Awan ti kapada ti sirib ti Dios. Dayta ti kayat a sawen ti ibaga ti Biblia nga “isu laeng ti masirib.”—Roma 16:27.

Hustisia. Kanayon nga umiso ti aramiden ti Dios. “Perpekto” ti aramidna ken “kinahustisia ti amin a dalanna.”—Deuteronomio 32:4.

Ayat. Ibaga ti Biblia a ti “Dios ket ayat.” (1 Juan 4:8) Saan laeng nga ipakpakita ti Dios ti ayat—isu a mismo ti personipikasion ti ayat. Ti awan kapadana nga ayatna ti mangtigtignay iti amin nga aramidenna, ket pagsayaatantayo dayta iti adu a pamay-an.

Ti Pannakigayyem ti Dios Kadagiti Tattao. Ti Dios ti naayat nga Amatayo idiay langit. (Mateo 6:9) No maaddaantayo iti pammati kenkuana, agbalintayo a gayyemna. (Salmo 25:14) Kinapudnona, aw-awisennaka ti Dios nga umasideg kenkuana babaen ti kararag ken ‘ipalladawmo kenkuana ti amin a pakadanagam, ta ipatpategnaka.’—1 Pedro 5:7; Santiago 4:8.

Saan a Dios ni Jesus. Naidumduma ni Jesus—isu laeng ti direkta a pinarsua ti Dios. Dayta ti rason nga inawagan ti Biblia kas Anak ti Dios. (Juan 1:14) Idi naparsuanan ni Jesus, inusar ni Jehova ti inauna nga anakna kas “eksperto a trabahador” a mangparsua iti amin.—Proverbio 8:30, 31; Colosas 1:15, 16.

 Saan a pulos nga imbaga ni Jesu-Kristo nga isu ti Dios. Imbes ketdi, inlawlawagna: “Siak ti pannakabagi [ti Dios]” ken isu ti “nangibaon kaniak.” (Juan 7:29) Idi kasarsarita ni Jesus ti maysa kadagiti adalanna, inawaganna ni Jehova iti “Amak ken Amayo ken iti Diosko ken Diosyo.” (Juan 20:17) Idi natayen ni Jesus, pinagungar ni Jehova tapno agbiag idiay langit ken inikkanna iti dakkel nga autoridad iti makannawan nga imana.—Mateo 28:18; Aramid 2:32, 33.

Matulongannaka ni Jesu-Kristo nga Umasideg iti Dios

Immay ni Jesus ditoy daga tapno isuronatayo maipapan ken Amana. Imbaga ni Jehova maipapan ken Jesus: “Daytoy ti Anakko a dungdungnguek. Dumngegkayo kenkuana.” (Marcos 9:7) Awan ti sabali nga ad-adda a makaam-ammo iti Dios no di laeng ni Jesus. Imbaga ni Jesus: “Awan met ti makaam-ammo iti Ama no di ti Anak ken ti asinoman a kayat ti Anak a pangipakaammuan.”—Lucas 10:22.

Perpekto ti panangtulad ni Jesus kadagiti kualidad ti Dios. Natulad a naimbag ni Jesus dagiti kualidad ni Amana isu a maibagana: “Ti nakakita kaniak nakitana metten ti Ama.” (Juan 14:9) Nayasideg ni Jesus dagiti tattao iti Dios ta tinuladna ti ayat ti Amana babaen kadagiti sasao ken aramidna. Imbagana: “Siak ti dalan ken ti kinapudno ken ti biag. Awan ti makapan iti Ama no saan a magna kaniak.” (Juan 14:6) Kinunana pay: “Dagiti pudno nga agdaydayaw dayawenda ti Ama maitunos iti espiritu ken kinapudno, ta sapsapulen ti Ama dagiti kasta nga agdaydayaw kenkuana.” (Juan 4:23) Agasem! Birbiroken ni Jehova dagiti kas kenka a mayat a mangammo iti kinapudno maipapan kenkuana.