Ti daga ket inted ni Jehova kadagiti tattao. Isu dayta ti pagtaengantayo. Gapuna, ti umuna nga agassawa, da Adan ken Eva, ket saan a naparsua nga agnaed idiay langit ta dagiti anghel ti pinarsua ti Dios nga agnaed sadiay. (Job 38:4, 7) Pinarsua ti Dios ti umuna a tao ket pinagnaedna iti nakapimpintas a paraiso a naawagan iti hardin ti Eden. (Genesis 2:15-17) Ni Adan ken dagiti agbalin nga annakna ket impaayan ni Jehova iti gundaway nga agbiag nga agnanayon ditoy daga.​—Basaen ti Salmo 37:29; 115:16.

Idi damo, ti laeng hardin ti Eden ti paraiso. Naibilin iti umuna nga agassawa a punnuenda ti daga kadagiti annakda ken aywananda ti intero a daga ken pagbalinenda a paraiso. (Genesis 1:28) Saanto a pulos madadael ti daga. Agnanayon a pagtaengan dayta dagiti tattao.​—Basaen ti Salmo 104:5.

Buyaen ti video nga Apay a Pinarsua ti Dios ti Daga?

Nagsukir da Adan ken Eva iti Dios isu a pinaruar ida ni Jehova iti hardin. Napukaw ti Paraiso, ket awan ti tao a nakaisubli iti dayta. Kuna ti Biblia: “Naited ti daga kadagiti managdakdakes.”​—Job 9:24.​—Basaen ti Genesis 3:23, 24.

Binaybay-an kadin ni Jehova ti orihinal a panggepna para kadagiti tattao? Saan! Isu ket mannakabalin-amin. Saanto a mapaay. (Isaias 45:18) Isublinanto ti orihinal a kasasaad a pinanggepna para kadagiti tattao.​—Basaen ti Salmo 37:11, 34.

Maisublinto ti Paraiso ditoy daga bayat ti panagturay ni Jesus kas Ari a dinutokan ti Dios. Iti gubat a maawagan iti Armagedon, idauluanto ni Jesus dagiti anghel ti Dios ket dadaelenda amin a bumusbusor iti Dios. Kalpasanna, ni Jesus ipupoknanto ni Satanas iti 1,000 a tawen. Malasatanto ti ili ti Dios ti pannakadadael gapu ta iwanwan ken salaknibanto  ida ni Jesus. Tagiragsakendanto ti agnanayon a biag iti Paraiso a daga.​—Basaen ti Apocalipsis 20:1-3; 21:3, 4.

Kaanonto a pagpatinggaen ti Dios ti kinadakes ditoy daga? Nangted ni Jesus iti “pagilasinan” a mangipasimudaag nga asidegen ti panungpalan. Dagiti agdama a kasasaad iti lubong pagpeggadenna ti biag ti tao ket ipakita dagita nga agbibiagtayon iti ‘panungpalan ti sistema ti bambanag.’​—Basaen ti Mateo 24:3, 7-14, 21, 22.

Manipud langit, iturayanto ni Jesus ti daga iti 1,000 a tawen, ket pagpatinggaennanto amin a panagsagaba bayat ti panagturayna. (Isaias 9:6, 7; 11:9) Malaksid iti panagturayna kas Ari, agakemto pay ni Jesus kas Nangato a Padi ket punasenna ti basbasol dagidiay mangay-ayat iti Dios. Gapuna, babaen ken Jesus, pukawento ti Dios ti sakit, panaglakay, ken ipapatay.​—Basaen ti Isaias 25:8; 33:24.

Agbiagto iti Paraiso dagiti tattao nga agtultulnog iti Dios. (1 Juan 2:17) Imbaon ni Jesus dagiti pasurotna a birokenda dagiti naemma a tattao ket isuroda kadakuada no kasanoda a maay-ayo ti Dios. Minilion a tattao ita ti isagsagana ni Jehova nga agbiag iti Paraiso a daga iti masanguanan. (Sofonias 2:3) Kadagiti Kingdom Hall dagiti Saksi ni Jehova, masursuro dagiti tattao ti agbalin a nasaysayaat nga assawa ken nagannak. Agdaydayawda a sangsangkamaysa kas pamilia ken ad-adalenda no kasanoda a magunggonaan iti naimbag a damag.​—Basaen ti Mikias 4:1-4.