Aw-awisen ti Dios ti amin a kita ti tattao nga umasidegda kenkuana babaen ti kararag. (Salmo 65:2) Ngem saanna a denggen wenno awaten ti amin a kararag. Kas pagarigan, malapdan ti kararag ti maysa a lalaki a mangmalmaltrato iti asawana. (1 Pedro 3:7) Kasta met, idi intultuloy dagiti Israelita ti agaramid iti dakes, saan a dinengngeg ti Dios dagiti kararagda. Nalawag a maysa a pribilehio ti panagkararag. Nupay kasta, denggen ti Dios ti kararag dagidiay agbabbabawi, uray nadagsen ti basolda.​—Basaen ti Isaias 1:15; 55:7.

Buyaen ti video a Denggen Kadi ti Dios ti Amin a Kararag?

Ti panagkararag ket paset ti panagdaydayawtayo, isu a ni laeng Jehova a Namarsua kadatayo ti rumbeng a pagkararagantayo. (Mateo 4:10; 6:9) Kasta met, yantangay imperpektotayo, masapul nga agkararagtayo iti nagan ni Jesus agsipud ta natay maigapu kadagiti basoltayo. (Juan 14:6) Saan a kayat ni Jehova nga ulit-ulitentayo dagiti naikabesa wenno naisurat a kararag. Kayatna a naimpusuan ti kararagtayo.​—Basaen ti Mateo 6:7; Filipos 4:6, 7.

Mangngeg ti Namarsua kadatayo uray dagiti naulimek a kararag. (1 Samuel 1:12, 13) Aw-awisennatayo nga agkararag iti amin a gundaway, kas iti rugi ken ngudo ti aldawtayo, no mangantayo, ken no adda problematayo.​—Basaen ti Salmo 55:22; Mateo 15:36.

Saan a nalaka ti umasideg iti Dios ta agbibiagtayo iti tengnga dagiti tattao nga awanan pammati iti Dios ken manguy-uyaw iti karina a talna ditoy daga. (2 Timoteo 3:1, 4; 2 Pedro 3:3, 13) Kasapulantayo ngarud dagiti makapabileg a pannakilangen kadagiti kapammatiantayo, ken kasapulandatayo met.​—Basaen ti Hebreo 10:24, 25.

 Makatulong ti pannakilangentayo kadagiti tattao a mangay-ayat iti Dios tapno sumingedtayo kenkuana. Mangipaay dagiti gimong dagiti Saksi ni Jehova kadagiti nasayaat a gundaway tapno magunggonaantayo babaen ti pammati ti sabsabali.​—Basaen ti Roma 1:11, 12.

Makaasidegka ken Jehova no panunotem a naimbag dagiti nasursurom iti Saona. Utobem dagiti aramid, balakad, ken karina. Makatulong ti kararag ken panagutob tapno matarusantayo ti kinapateg ti ayat ken sirib ti Dios.​—Basaen ti Josue 1:8; Salmo 1:1-3.

Sumingedka laeng iti Dios no agtalekka kenkuana ken no adda pammatim kenkuana. Ngem ti pammati ket kas iti sibibiag a banag a masapul a mataraonan. Nasken nga agtultuloy a taraonam ti pammatim babaen ti panangpanunotmo kadagiti nakaibatayan dagiti patpatiem.​—Basaen ti Mateo 4:4; Hebreo 11:1, 6.

Ipatpateg ni Jehova dagidiay mangay-ayat kenkuana. Kabaelanna a salakniban ida iti aniaman a mangdadael iti pammatida ken iti namnamada a biag nga agnanayon. (Salmo 91:1, 2, 7-10) Pakdaarannatayo nga adaywantayo ti wagas ti panagbiag a mamagpeggad iti salun-at ken mangdadael iti kinaragsaktayo. Isursuro kadatayo ni Jehova ti kasayaatan a wagas ti panagbiag.​—Basaen ti Salmo 73:27, 28; Santiago 4:4, 8.