Ebanghelio ni Marcos 4:1-41
-
DAGITI ILUSTRASION MAIPAPAN ITI PAGARIAN (1-34)
-
Ti nagmula (1-9)
-
No apay a nagusar ni Jesus kadagiti ilustrasion (10-12)
-
Nailawlawag ti ilustrasion maipapan iti tao a nagmula (13-20)
-
Ti lampara ket saan a makaluban iti basket (21-23)
-
Ti rukod nga us-usarenyo (24, 25)
-
Maturog ti nagmula (26-29)
-
Ti bukel ti mustasa (30-32)
-
Panagusar kadagiti ilustrasion (33, 34)
-
-
Pagtalnaen ni Jesus ti bagyo (35-41)
4 Nangisuro manen iti igid ti baybay ket nagadu ti immaribungbong kenkuana. Isu a naglugan iti bangka ket nagtugaw sa immadayo bassit iti igid ti baybay nga ayan ti amin a tattao.+
2 Ket nagusar kadagiti ilustrasion+ iti panangisurona kadakuada iti adu a banag. Kinunana:+
3 “Agimdengkayo! Adtoy! Maysa a tao ti napan nagmula.+
4 Bayat nga agiwarwaris iti bin-i, nagdisso ti dadduma iti igid ti dalan, ket tinuktok dagiti billit.
5 Nagdisso met ti dadduma iti kabatuan a bassit laeng ti dagana ket alistoda a nagtubo ta narabaw ti daga.+
6 Ngem idi naginit, nalaylay ken nagangoda ta saanda pay a nakaramut.
7 Adda met dagiti nagdisso kadagiti siitan a mula ket linapdanda ti panagdakkel dagiti bin-i isu a saanda a nagbunga.+
8 Ngem nagdisso ti dadduma iti nasayaat a daga, ket nagtubo, dimmakkel, ken nagbungada iti mamin-30, 60, ken 100.”+
9 Innayon ni Jesus: “Asinoman nga adda lapayagna a dumngeg, dumngeg koma.”+
10 Idi agmaymaysan ni Jesus, inasitgan dagiti adda iti aglawlawna agraman ti Sangapulo ket Dua ket nagsaludsodda maipapan kadagiti ilustrasion.+
11 Kinunana kadakuada: “Naipakaammo kadakayo ti sagrado a palimed+ maipapan iti Pagarian ti Dios, ngem kadagiti dadduma, agtalinaed nga ilustrasion ti amin a banag,+
12 ta uray kumitkitada, saanda latta a makita, ken uray dumdumngegda, saanda latta a maawatan. Saanda a kayat ti agbalbaliw tapno mapakawanda.”+
13 Imbagana pay: “No diyo maawatan daytoy nga ilustrasion, kasanonto ngarud a maawatanyo ti dadduma pay nga ilustrasion?
14 “Ti nagmula imulmulana ti sao.+
15 Dagitoy ngarud dagidiay adda iti igid ti dalan a nakaimulaan ti sao; ngem apaman a nangngegda dayta, umay ni Satanas+ ket ikkatenna ti sao a naimula kadakuada.+
16 Kasta met, dagitoy dagidiay naimula iti kabatuan; apaman a nangngegda ti sao, naragsakanda a nangawat iti dayta.+
17 Ngem gapu ta saanda a nakaramut, saanda nga agbayag. No dumteng ti rigat wenno pannakaidadanes gapu iti sao, maitibkolda.
18 Adda met dagiti nagtubo iti nagbabaetan dagiti siitan a mula. Isuda dagiti nakangngeg iti sao,+
19 ngem gapu ta simrek iti pusoda dagiti pakaringgoran+ iti daytoy a sistema ti bambanag* ken ti kinabaknang a mangal-allilaw iti adu,+ ken ti nagduduma a tarigagay,+ nalapdan ti sao isu a saan a nagbunga dayta.
20 Kamaudiananna, dagiti nagtubo iti nasayaat a daga ket dagidiay agimdeng ken umawat iti sao ken agbunga iti mamin-30, 60, ken 100.”+
21 Imbagana pay: “Ti lampara ket saan a makaluban iti basket* wenno maikabil iti sirok ti katre. Saan aya a maikabil dayta iti pagiparabawan iti silaw?+
22 Ta awan ti sekreto a dinto maammuan; awan met ti banag a nailemmeng a dinto matakuatan.+
23 Asinoman nga adda lapayagna a dumngeg, dumngeg koma.”+
24 Kinunana pay: “Ipangagyo dagiti mangmangngegyo.+ Iti rukod a pagrukrukodyo, daytanto ti pakarukodanyo, wen, ad-adunto pay ti mainayon kadakayo.
25 Ta asinoman nga addaan, ad-adunto pay ti maited kenkuana,+ ngem ti asinoman nga awanan, maalanto uray ti adda kenkuana.”+
26 Isu nga intuloyna: “Ti Pagarian ti Dios ket kas iti panagimula ti maysa a tao kadagiti bin-i iti daga.
27 Maturog iti rabii ken bumangon iti bigat bayat nga agrusrusing ken dumakdakkel dagiti bin-i—no kasano a mapaspasamak dagita, dina ammo.
28 In-inut nga agbunga a bukbukodna iti nakaimulaanna. Umuna, rummuar ti bulong, sa agdawa, ket kamaudiananna, matangkenan ti dawa.
29 Ngem inton matangkenanen ti dawa, gapasen ti nagmula ta tiempon ti panagani.”
30 Kinunana pay: “Ania ti pangyarigantayo iti Pagarian ti Dios, wenno ania nga ilustrasion ti pangilawlawagtayo iti dayta?
31 Mayarig dayta iti bukel ti mustasa nga idi naimula, dayta ti kabassitan iti amin a bukel iti intero a daga.+
32 Ngem no naimulan, agtubo ken agbalin a dakdakkel ngem ti amin a sabali pay a nateng, ken umadu ti dadakkel a sangana a pagaponan dagiti billit.”
33 Babaen ti adu nga ilustrasion+ a kas kadagita, insurona kadakuada ti sao, sigun iti kabaelanda a tarusan.
34 Kinapudnona, kanayon nga agusar iti ilustrasion no isurona ida, ngem ilawlawagna ti amin a banag kadagiti adalanna no is-isuda laeng.+
35 Idi rumabiin iti dayta nga aldaw, kinunana kadakuada: “Bumallasiwtayo iti baybay.”+
36 Idi napagawiddan dagiti tattao, nagluganda iti bangka a naglugananna, sada bimmallasiw a kadua ti dadduma pay a bangka.+
37 Pagammuan ta nagangin iti nakapigpigsa ket sinabbuagan ti dadakkel a dalluyon ti bangka nga uray la mapmapnon iti danum.+
38 Ngem matmaturog ni Jesus a nakapungan iti kutit ti bangka isu a riniingda ket kinunada: “Mannursuro, dimo kadi makita a mataytayon?”
39 Isu a bimmangon ket pinagtalnana ti angin ken imbagana iti baybay: “Agsardengka! Agtalnaka!”+ Ket nagsardeng ti angin ken limminak.
40 Kinunana kadakuada: “Apay a kasta unay ti butengyo?* Awan pay kadi ti pammatiyo?”
41 Ngem mabutbutengda unay ken kinunada iti maysa ken maysa: “Asino a talaga daytoy? Agtulnog kenkuana uray ti angin ken baybay.”+
