Job 1:1-22
1 Adda idi maysa a lalaki iti daga ti Uz nga agnagan iti Job.*+ Nalinteg ken awan pagkuranganna;*+ agbuteng iti Dios ken liklikanna ti dakes.+
2 Pito ti anakna a lalaki ken tallo ti anakna a babai.
3 Adda tarakenna a 7,000 a karnero, 3,000 a kamelio, 1,000 a baka,* ken 500 nga asno.* Nakaad-adu met dagiti adipenna ket isu idi ti katan-okan iti amin a tao iti Daya.
4 Tunggal anakna a lalaki ket mangangay iti padaya iti balayna iti batangna nga aldaw.* Awisenda met ti tallo a kakabsatda a babbai tapno agkakaduada a mangan ken uminum.
5 Kada malpas ti padaya, paayaban ida ni Job tapno dalusanda ti bagida. Kalpasanna, bumangon a nasapa iti bigat ket agpuor iti daton+ para iti tunggal maysa kadakuada. Ta kinuna ni Job: “Amangan no nakabasol dagiti annakko ken inlunodda ti Dios iti pusoda.” Kasta ti kanayon nga ar-aramiden ni Job.+
6 Dimteng ti aldaw a simrek dagiti annak ti pudno a Dios*+ tapno sumangoda ken Jehova,+ ket simrek met ni Satanas+ iti tengngada.+
7 Insaludsod ni Jehova ken Satanas: “Naggapuam?” Insungbat ni Satanas ken Jehova: “Sinursorko ti daga ken nagpagnapagnaak sadiay.”+
8 Imbaga ni Jehova ken Satanas: “Napaliiwmo kadi ti* adipenko a ni Job? Awan kapadana iti daga. Nalinteg ken awan pagkuranganna,*+ agbuteng iti Dios ken saan nga agar-aramid iti dakes.”
9 Insungbat ni Satanas ken Jehova: “Agbuteng aya ni Job iti Dios nga awan gapgapuna?+
10 Saan aya a protprotektaram+ ken ti pamiliana ken ti amin nga adda kenkuana? Binendisionam dagiti aramid ti imana,+ ket immadu unay dagiti tarakenna iti daga.
11 Ngem tapno agbaliw ti kasasaad, unnatem ta imam ken pukawem ti amin nga adda kenkuana ket siguradonto nga iparupana kenka ti panangilunodna kenka.”
12 Kinuna ni Jehova ken Satanas: “Kitaem! Addan iti imam* ti amin nga adda kenkuana. Isuna laeng ta saanmo a dangdangran!” Isu a pimmanaw ni Satanas iti sango* ni Jehova.+
13 Idi mangmangan ti annakna a lallaki ken babbai ken umin-inumda iti arak iti balay ti inauna a kabsatda a lalaki,+
14 simmangpet ti mensahero ket imbagana ken Job: “Agar-arado dagiti baka ken agar-arab dagiti asno iti abayda
15 idi immatake dagiti Sabeo ket innalada ida, sada pinatay iti espada dagiti adipenmo. Sisiak ti nakalibas a mangibaga kenka.”
16 Bayat nga agsasao pay laeng, simmangpet ti sabali pay ket kinunana: “Nagtinnag manipud langit ti apuy ti Dios* ket pinuoranna dagiti karnero ken dagiti agpaspastor isu a natayda amin! Sisiak ti nakalibas a mangibaga kenka.”
17 Bayat nga agsasao pay laeng, simmangpet ti sabali pay ket kinunana: “Immay ti tallo a grupo dagiti Caldeo+ ket innalada dagiti kamelio sada pinatay iti espada dagiti adipenmo. Sisiak ti nakalibas a mangibaga kenka.”
18 Bayat nga agsasao pay laeng, simmangpet ti sabali pay ket kinunana: “Mangmangan idi ti annakmo a lallaki ken babbai ken umin-inumda iti arak iti balay ti inauna a kabsatda.
19 Pagammuan ta nagangin iti nakapigpigsa manipud iti let-ang isu a nagunggon ti uppat a suli ti balay. Narba ken napandagan dagiti annakmo ket natayda. Sisiak ti nakalibas a mangibaga kenka.”
20 Timmakder ni Job ket pinisangna ti badona ken kinalbona ti ulona; sa nagrukob agingga iti daga ken nagruknoy
21 ket kinunana:
“Lamolamoak* a rimmuar iti aanakan ni inak,Ket lamolamoakto met la nga agsubli.+
Inted ni Jehova,+ ken innala ni Jehova.
Agtultuloy koma a maidaydayaw ti nagan ni Jehova.”
22 Iti laksid amin dagitoy, saan a nagbasol ni Job wenno dina pinabasol ti Dios iti napasamak nga aniaman a di umiso.*
Footnotes
^ Wenno “Awan pakababalawanna ken adda integridadna.”
^ Mabalin a kaipapananna, “Puntiria ti Panangbusor.”
^ Lit., “500 a paris a baka.”
^ Lit., “kabaian nga asno.”
^ Wenno “iti balay ti tunggal maysa iti naikeddeng nga aldaw.”
^ Hebreo nga idiomatiko a sasao a tumukoy kadagiti anghel nga annak ti Dios.
^ Lit., “Insaadmo kadi ta pusom iti.”
^ Wenno “Awan pakababalawanna ken adda integridadna.”
^ Wenno “Kontroladom.”
^ Lit., “rupa.”
^ Wenno mabalin a, “kimat.”
^ Wenno “Awan badok.”
^ Wenno “dina impabiang iti Dios ti aniaman a di umiso.”
