Runding kami pasal pelajar bepelasarka prinsip ari Bup Kudus. Tiap iku Saksi, ulih ngaga pemutus nitihka peneka ati sida empu ti bepelasarka prinsip Bup Kudus. Aram meh kitai sama berandauka beberapa iti prinsip nya. a

•  Pelajar nya utai ti beguna

•  Runding ti betul pasal pelajar

•  Pelajar tinggi ulih ngachau pengarap sereta moral

•  Kati Saksi-Saksi Jehovah bisi kelas tauka sekula kena ngajar bala anak mit pasal sembiang?

 Pelajar meri “penemu-dalam enggau ba penalam runding” ngagai seseiku orang. (Jaku Dalam 2:10, 11; 3:21, 22) Kelimpah ari nya, Jesus mega madahka bala murid iya patut ngajar orang bukai. (Matthew 28:19, 20) Nya alai, kami nulung sereta meransang sida ke dalam eklisia kami bulih pelajar ti engkeman. Ngambika chunto, ngemansangka agi pengelandik chara macha, nulis sereta bejaku, lalu bulih penemu pasal pengarap enggau adat ke bukai. b—1 Korint 9:20-22; 1 Timoti 4:13.

 Perintah menua mega amat ngemeratka pelajar. Nya alai, sida dekaka semua nembiak bulih pelajar ba sekula rendah enggau sekula menengah. Kami mega nitihka undang-undang tu laban Bup Kudus bisi madahka: “Awakka semua orang nunduk ngagai perintah ti megai menua.” (Rome 13:1) Nambahka nya, kami mega meransang bala anak kami bagas belajar, lalu anang enda betatika pelajar. c Tu sejalai enggau Jaku Petara ti madah: ‘Kereja semua utai enggau pengabis ati kita, baka ke bekereja ke Petara, ukai ke mensia.’—Kolosi 3:23.

 Pelajar ulih nulung kami melanja diri sebilik. Nitihka ajar Bup Kudus, “barang sapa enda ngintu kaban belayan diri empu, kelebih agi sida sebilik, udah nulak pengarap, lalu jai agi ari orang ke enda arap.” (1 Timoti 5:8) Pelajar, ulih nulung kami nitihka pesan Petara, ngambi melanja kami sebilik. Baka ke dipadahka ba World Book Encyclopedia, batang kebuah pelajar nya, “ngambi mensia ulih nyadi orang ke menyana . . . lalu nulung ngemansangka ekonomi.” Orang ke bisi pelajar tauka sesebengkah pengelandik ulih nyukung ruang bilik iya enggau manah agi, enti dibandingka enggau orang ke nadai pelajar.—Jaku Dalam 22:29.

 Ketegal apai indai patut nyediaka bala anak sida napi utai ke deka nyadi dudi hari, pelajar ti asas siti ari chara kena nulung anak sida. (2 Korint 12:14) Taja pan ba sekeda menua, pelajar nya enda diberi enggau pechuma, lalu sekeda adat enda beberatka pelajar, tang kami meransang apai indai meri pelajar ti asas ngagai anak sida. d Kami mega meri lalau ti beguna ngagai apai indai, ngambi sida bisi penemu chara nulung anak ba pelajar. e

 Kami bejimat milih pelajar. Nitihka ajar Bup Kudus: “Orang ke beli deka arapka sebarang utai, tang orang ke pintar deka nyingkang enggau bejimat.” (Jaku Dalam 14:15) Kami nitihka prinsip tu, lalu bejimat beratika ni bagi pelajar ke dipilih (pelajar ke patut diambi pengudah abis sekula menengah). Pia mega, kami deka beratika ungkus pelajar nya. Chunto iya, sekula vokasional enda kelalu mar sereta enda makai awak kelalu panjai alai belajar.

 Utai ke dipelajar ba pengarap beguna agi ari utai ke dipelajar ba sekula. Enda baka utai ke dipelajar ba sekula, utai ke dipelajar ba pengarap ulih meri kitai penemu pasal Petara, lalu ulih nyadika jamin nyelamatka nyawa. (John 17:3) Utai ke dipelajar ba pengarap mega ngajar moral ti manah, ngambi seseiku orang ulih “nemu utai ti ngena, lurus sereta betul.” (Jaku Dalam 2:9) Rasul Paul kala nerima pelajar tinggi, ti ulih disempamaka baka universiti kemayaharitu. Tang iya tetap ngaku, penemu pasal Jesus Kristus nya jauh berega agi. (Pilipi 3:8; Surat Kereja Rasul 22:3) Sama mega, mayuh Saksi-Saksi Jehovah ke sekula tinggi ngaku, utai ke dipelajar ba pengarap nya jauh berega. f

 Bup Kudus ba Jaku Dalam madah: “Orang ke nemu berunding deka meda penusah datai, lalu belalai.” (Jaku Dalam 22:3) Ba penemu Saksi-Saksi Jehovah, utai ke ngelingi ba universiti tauka endur pelajar tinggi ulih ngachau ulah moral ti manah, sereta pengarap. Nya kebuah, mayuh Saksi Jehovah tauka anak sida milih enggai nyambung belajar ngagai endur ke baka tu. Sida ngasaika, pelajar tinggi meransang penemu ti salah baka:

•   Runding ti salah: Duit meri pengelantang sereta pengelikun

   Ba runding mayuh orang, enti bepelajar tinggi, tentu bulih gaji besai. Nya kebuah, mayuh ari tuju orang ke tama universiti ngembuan juluk ati deka nyadi kaya. Indah, sida ngumbai duit ulih meri pengelantang sereta pengelikun. Tang dalam Bup Kudus ngajar, penemu ke baka tu salah. (Pengajar 5:10) Nambahka nya, dalam Bup Kudus pan bisi madah: “Pengangkun ke duit nya pun semua macham penyai.” (1 Timoti 6:10) Nyadi, Saksi-Saksi Jehovah enggau naka ulih enda nejuka ‘pengaya ngalahka pesan Iya.’—Matthew 13:22.

•   Runding ti salah: Orang ke bepelajar tinggi ngembuan penuduk ti tinggi sereta dipebasaka orang

   Chunto iya, Nika Gilauri, ke kala nyadi perdana menteri Georgia, kala nulis: “Ba Georgia, mayuh orang ngumbai ijazah universiti ke dipegai sida, nyadika tanda penuduk sida. . . . [Runding orang kelia,] nembiak ke nadai ijazah ngemaluka ruang bilik diri.” g Penemu tu jauh bida ari ajar Bup Kudus ke ngelalau orang, enda begigaka nama ti tebilang sereta penuduk dalam dunya tu. Jesus kala nanya bala tuai pengarap ke beberatka nama ti tebilang, ‘Baka ni ku kita ulih arap, enti kita minta puji pangan diri, lalu enda minta puji ari Petara siku aja?’ (John 5:44) Pelajar tinggi meransang orang ngembuan ulah ti sumbung, lalu ulah tu enda dikerinduka Petara.—Jaku Dalam 6:16, 17; 1 Peter 5:5.

•   Runding ti salah: Tiap iku orang bisi hak nentuka utai ti salah enggau utai ti betul

   Saksi-Saksi Jehovah nitihka standard Petara nentuka utai ti salah enggau utai ti betul. (Isaiah 5:20) Tang nitihka siti artikel ke dikeluarka Journal of Alcohol and Drug Education, mayuh nembiak ba universiti ditekan orang ke serambau “ngaga pemutus ti ngelanggar standard sida empu, pasal utai ti salah enggau utai ti betul.” h Ari utai ke nyadi tu, nunjukka ayat Bup Kudus tu amat betul: “Orang ke jai ngerusak moral ti menyana.” (1 Korint 15:33) Ba universiti, ulah ke enda dikerinduka Petara baka mabuk, makai dadah, sereta ulah seks sebedau kawin dikereja mayuh orang, indah ulah nya diterima sida.—1 Korint 6:9, 10; 2 Korint 7:1.

•   Runding ti salah: Pelajar tinggi chara ti pemadu manah ngubah dunya

   Kami mega nemu, mayuh orang dekaka pelajar tinggi ukai mina ka bulih pengaya tauka nama ti tebilang tauka mega ngemuaska pengingin ti salah. Tang, sida deka ngubah pengidup diri sereta dunya. Kami muji pemanah ati sida, tang Saksi-Saksi Jehovah ngena chara bukai. Baka Jesus, kami pechaya semina Perintah Petara ulih mutarka semua penanggul ba dunya. (Matthew 6:9, 10) Taja pia, ukai reti iya kami diau jenuh aja seraya ke nganti perintah tu datai. Baka ke digaga Jesus kelia, kami meritaka Berita Manah pasal Perintah Petara ba serata dunya. Nengah pengawa tu, kami udah nulung beribu iku orang ninting taun, ngemanahka agi chara pengidup sida. i—Matthew 24:14.