Matthew 28:1-20
28 Pengudah Hari Sabat, kena Hari Minggu,* lebuh mata panas berengkah tumbuh, Maria Magdalin enggau Maria ke siku da agi mansang deka meda kubur Jesus.
2 Sebedau nya, tanah berenyang ti balat bisi nyadi, laban melikat Jehovah udah nurun ari serega. Iya datai lalu maringka batu ke dikena nutup kubur Jesus. Iya lalu duduk ba atas batu nya.
3 Gamal melikat nya terang baka kilat, lalu gari iya burak baka seleju.
4 Bala jejaga balat amat takut datai ke sida nyau getar-getar, lalu nyadi baka orang ke mati.
5 Tang ku melikat nya bejaku ngagai bala indu nya: “Anang takut. Aku nemu kita ngiga Jesus, ke udah diukum bunuh ba tiang.
6 Iya nadai ditu laban iya udah diidupka baru ari mati, munyi ti udah dipadahka iya. Datai kitu, lalu peda endur bangkai iya diengkahka.
7 Udah nya, jampat kita mupuk lalu padah ngagai bala murid iya, iya udah diidupka baru ari mati. Diatu, iya benung mansang ngagai Galili dulu ari kita. Ba din, kita deka betemu enggau iya. Kingatka pesan ke udah dipadahka aku tu.”
8 Sida beguai-guai mupuk ari kubur nya lalu belanda madahka pekara nya ngagai bala murid Jesus. Sida berasai takut, tang mega amat gaga ati.
9 Enda mukai-mukai, Jesus betemu enggau sida lalu meri jaku tabi. Sida mansang ngagai iya, megai kaki iya, lalu besugang ba mua iya.
10 Ku Jesus bejaku ngagai sida: “Anang takut! Mupuk lalu padahka utai tu ngagai bala menyadi* aku. Asuh sida mupuk ngagai Galili, lalu sida deka betemu enggau aku ba din.”
11 Lebuh bala indu nya benung ba rantau jalai, sekeda soldadu mansang ngagai nengeri, lalu madah ngagai bala tuai imam pasal semua utai ti udah nyadi.
12 Pengudah bala tuai imam begempuru sereta baum enggau bala tuai bansa orang Judah, sida meri mayuh duit pirak ngagai bala soldadu nya.
13 Ku sida: “Kita patut nyebut, ‘Maya kami tinduk malam hari, bala murid iya datai lalu ngenchuri bangkai iya.’
14 Lalu enti gabenor ninga pasal pekara tu, kita enda ibuh irau. Kami deka nerangka pekara tu ngagai iya.”
15 Nya alai, bala soldadu nya ngambi duit pirak nya, lalu ngereja utai ke diasuh sida. Cherita nya ditusui ngagai bala orang Judah ba mayuh endur, nyentuk ngagai seharitu.
16 Sebelas iku murid Jesus mupuk ngagai bukit ba Galili, baka ke diasuh Jesus.
17 Lebuh sida meda iya, sida lalu besugang. Tang sekeda ari sida agi kakang ati.
18 Jesus mansang ngagai sida lalu bejaku: “Semua kuasa ba serega enggau ba dunya udah diberi ngagai aku magang.
19 Nya alai, mupuk kita ngagai semua bansa, lalu ajar sida nyadi murid aku. Baptisa sida dalam nama Apai, Anak, enggau kuasa kudus Petara.
20 Ajar sida ngasika semua utai ke udah dipadah aku ngagai kita, lalu ingat, aku deka seruran enggau kita nyentuk ngagai pengujung dunya.”*
Nota Kaki
^ Jaku Asal, “hari keterubah dalam seminggu.” Ba orang Judah, Hari Minggu nya hari keterubah dalam seminggu.
^ Tauka “murid.”
^ Tauka “jeman; sistem dunya.” Peda Penerang Leka Jaku, “Sistem dunya.”
