Jesus nyelamatka orang ke arap lebuh iya nyerahka nyawa diri nyadi tebus. (Matthew 20:28) Nya kebuah, dalam Bup Kudus bisi madahka Jesus nya “penyelamat dunya.” (1 John 4:14) Dalam Bup Kudus mega bisi madahka: “Nadai nama bukai ba baruh langit sereta ba bala mensia ke udah dipilih Petara kena nyelamatka kitai.”—Surat Kereja Rasul 4:12.

 Jesus “ngasaika pemati ke penguntung tiap iku orang” ke bisi pengarap ngagai iya. (Hebrew 2:9; John 3:16) Pengudah Jesus mati, “Petara udah ngangkatka iya idup baru ari mati.” Udah nya, Jesus pan pulai baru ngagai serega lalu betubuh roh. (Surat Kereja Rasul 3:15) Maya ba serega, Jesus “tentu ulih nyelamatka orang ke ngenyemakka diri enggau Petara nengah iya, laban iya seruran idup lalu ulih bebendar minta ngagai Petara ngarika sida.”—Hebrew 7:25.

Nama kebuah kitai begunaka Jesus minta ngagai Petara ngarika kitai?

 Laban semua kitai bedosa. (Rome 3:23) Dosa nyeraraka kitai ari Petara, lalu dosa mega ngujungka pemati. (Rome 6:23) Tang Jesus nyadi “penulung” ngagai semua orang ke arapka tebus iya. (1 John 2:1) Jesus sanggup minta ngagai Petara ngarika mensia, ngambika Petara ningaka sampi sida, lalu ngampunka penyalah sida nengah tebus iya. (Matthew 1:21; Rome 8:34) Petara ninga peminta Jesus laban utai ke dipinta iya nitihka peneka Petara. Petara “ngirumka Anak Iya ke dunya . . . kena nyelamatka dunya nengah iya.”—John 3:17.

Kati pechayaka Jesus nya udah chukup ngambika ulih selamat?

 Enda. Semina pechayaka Jesus, agi enda chukup alai kitai selamat. (Surat Kereja Rasul 16:30, 31) Nitihka ajar Bup Kudus: “Baka tubuh ke mati enti nadai seput, pengarap mega mati enti nadai pengawa.” (James 2:26) Enti deka selamat, kitai patut ngereja:

•   Belajar pasal Jesus enggau Apai iya, Jehovah.—John 17:3.

•   Arapka sida.—John 12:44; 14:1.

•   Ayanka pengarap diri ari ngasika pesan sida. (Luke 6:46; 1 John 2:17) Jesus madahka, ukai semua orang ke ngangauka “Tuan” tentu deka selamat. “Tang semina orang ke ngereja peneka Apai [iya] ti ba serega” deka selamat.—Matthew 7:21.

•   Terus meh ngayanka pengarap kitai taja pan napi pemrinsa. Enggau terang Jesus madahka, “Orang ke tan datai ke ujung, deka diselamatka.”—Matthew 24:13.