Leka jaku “anti-kristus” ukai semina ke mensia, gerempung, tauka utai bukai. Bup Kudus madahka, ‘mayuh munsuh Kristus’, tauka anti-kristus. (1 John 2:18) “Anti-Kristus ke diambi ari leka jaku Gerika mai reti, “ngelaban Kristus”. Tu nerangka pasal orang ke ngereja:

•   Nulak Jesus nyadi Kristus (Messiah) tauka enda ngaku iya Anak Petara.—1 John 2:22.

•   Ngelaban Kristus ke dipilih Petara.—Masmur 2:1, 2; Luke 11:23.

•   Pepura nyadi Kristus.—Matthew 24:24.

•   Merinsa murid Kristus, laban Jesus ngumbai pengawa tu baka ke dikereja ngagai iya.—Kereja Rasul 9:5.

•   Ngaku diri orang Kristian tang ngereja utai ti jai sereta nipu.—Matthew 7:22, 23; 2 Korint 11:13.

 Nitihka Bup Kudus, anti-kristus tu nyengkaum mensia, gerempung, tauka raban ke udah ngereja utai baka ke udah diliska ba atas. (2 John 7) Anti-kristus endang udah bisi kenyau ari jeman bala rasul Jesus. Nyentukka seharitu, sida terus bebendar ngelaban Jesus. Tu endang udah ditulis dalam Bup Kudus.—1 John 4:3.

•   Sida madahka ajar ti salah pasal Jesus. (Matthew 24:9, 11) Chunto iya, orang ke ngajar pasal Triniti tauka ngumbai Jesus nya Petara ti Pemadu Bekuasa benung ngajar ajar ti salah. Jesus empu madahka, “Apai besai agi ari Aku.”—John 14:28.

•   Anti-kristus nulak ajar Jesus pasal Perintah Petara. Ngambika chunto, tuai pengarap madah, Kristus merintah nengah perintah mensia. Tang ajar tu enda sejalai enggau utai ke disebut Jesus ti madah, “Perintah Aku ukai ari dunya tu.”—John 18:36.

•   Sida ngaku Jesus nya Tuan, tang sida enda ngasika iya, nyengkaum pesan Jesus ngerembaika berita manah pasal Perintah Petara.—Matthew 28:19, 20; Luke 6:46; Kereja Rasul 10:42.