Bup Kudus ngajar kitai meri enggau ati ti deka sereta bisi kebuah ti manah. Nitihka ajar Bup Kudus, enti kitai meri, ukai semina orang ke nerima aja bulih penguntung, tang orang ke meri mega bulih penguntung. (Jaku Dalam 11:25; Luke 6:38) Jesus madahka, “Beberekat agi orang ke meri, ari orang ke nerima.”—Kereja Rasul 20:35.

•  Meri enggau chara ti baka ni ngagaka Petara?

•  Meri enggau chara ti baka ni enda ngagaka Petara?

•  Ayat Bup Kudus pasal meri

 Petara rindu enti kitai deka meri. Bup Kudus madahka, ‘Genap iku kita patut meri nitihka pemutus runding diri, ukai enggau ati ti lembau, tauka ari pejal, laban Petara rinduka orang ke meri enggau ati ti gaga.’—2 Korint 9:7.

 Meri enggau ati ti gaga nyengkaum sembah kitai ti ngagaka Petara. (James 1:27) Iya rindu meda orang ke deka nulung. Ba Petara, orang ke deka meri sempama baka ke meri ngagai Iya. (Jaku Dalam 19:17) Dalam Bup Kudus bisi nerangka, Petara empu deka malas pemanah orang nya.—Luke 14:12-14.

 Meri enggau tuju ti salah. Chunto:

•   Deka minta dipeda tauka dipuji orang bukai.—Matthew 6:2.

•   Deka minta dibalas.—Luke 14:12-14.

•   Ngambika bulih jaga ketegal pemanah ke diayanka.—Masmur 49:6, 7.

 Pengawa ti nyukung tauka ngemendarka utai ti dipegedika Petara. Chunto iya, kitai enda meri duit ngagai orang ke balat bejudi, makai dadah, tauka mabuk. (1 Korint 6:9, 10; 2 Korint 7:1) Kelimpah ari nya, kitai mega enda patut melanja orang ke ulih gawa tang sengaja enggai ngereja nya.—2 Tesalonika 3:10.

 Kelalu nulung orang bukai nyentukka diri sebilik enda dijaga. Bup Kudus ngasuh tuai bilik nyaga utai guna ruang bilik iya empu. (1 Timoti 5:8) Enda patut tuai bilik kelalu meri awak tauka melanja orang bukai tang enda betatika ruang bilik diri empu. Ba maya Jesus, bisi orang enda nyaga apai indai sida ti udah tuai lalu meri kebuah ketegal sida deka meri nya ngagai Petara. Jesus nangkan sida.—Mark 7:9-13.