Dua Korint 9:1-15
9 Kebendar iya, aku enda ibuh nulis ngagai kita pasal pengawa ke digaga kita ke nembiak Petara ti kudus.
2 Aku nemu, kita endang sanggup ngereja nya. Aku udah temegahka kita ba bala menyadi ba Masedonia. Aku madah ngagai sida pasal Akaya ke udah sedia setaun ti udah. Ketegal pengeransing kita, mayuh ari bala sida mega nyadi ransing.
3 Nya alai, aku nganjung bala menyadi nya ngambika utai ke dikemegahka kami pasal kita ukai jaku ngapa. Nyadi kita patut sedia nulung baka ke udah dipadah aku ngagai sida.
4 Kami andalka kita. Tang enti bala menyadi ari Masedonia ke datai enggau aku meda kita bedau sedia, endaka nya ngasuh kami malu? Kita empu pan deka malu.
5 Nya alai, aku berunding, aku patut meransang bala menyadi nya mupuk tumu agi ngagai kita, ngambika ulih ngumpul pemeri ke udah disemayaka kita. Enti pemeri nya udah sedia, nya deka nunjukka kita meri enggau gerah jari, ukai ari pejal.
6 Ba pekara tu, orang ke nanam mimit, deka ngetau mimit, lalu orang ke nanam mayuh, deka ngetau mayuh.
7 Awakka tiap iku orang ngereja utai baka ke udah ditentuka dalam ati iya, ukai enggau ati ti lembau tauka ari pejal, laban Petara rinduka orang ke meri enggau ati ti gaga.
8 Kelimpah ari nya, Petara ulih mandangka pemanah ati Iya ti besai enggau chukup mayuh ngagai kita, ngambika kita nadai kurang nama-nama, tang bisi chukup mayuh utai kena ngereja tiap iti pengawa ti manah.
9 (Baka ke udah ditulis ba Bup Kudus: “Iya seruran gerah jari. Iya meri sedekah ngagai orang ke seranta. Pengelurus iya deka meruan belama iya.”
10 Petara ke meri mayuh benih ke ditanam sereta mayuh roti ke diempa, deka meri kita benih ke ditanam kita, lalu Iya deka nambahka benih nya beberapa kali lipat. Ketegal pengelurus kita, Iya mega deka nambahka utai ke diketau kita.)
11 Petara merekatka kita enggau chukup mayuh, ngambika kita ulih ngayanka diri gerah jari ba semua pekara. Orang deka beterima kasih ngagai Petara ketegal pengerah jari kita ke diayanka nengah kami.
12 Nya ketegal pengawa kita ukai aja nyediaka utai ti chukup ke diguna nembiak Petara ti kudus, tang mega ngasuh mayuh orang beterima kasih ngagai Petara.
13 Pengawa nya nunjukka pemanah kita. Nya alai, sida ngemuliaka Petara laban kita ngasika Berita Manah pasal Kristus ke ditusui kita, sereta laban kita gerah jari ngagai sida enggau ngagai semua orang.
14 Sida amat rinduka kita lalu bebendar besampika kita, laban Petara udah ngayanka pemanah ati Iya ti besai amat ngagai kita.
15 Aram meh kitai beterima kasih ngagai Petara ke pemeri Iya ti chukup manah, ke enda ulih disemaka enggau nama-nama.
