Indu Jehova tja uta omaṱunḓu, eye wa twapo ovanene kutja ve ṱakamise ovanatje. (Ovakolose 3:20) Omerizirira woye otjomunene okuhonga omuatje woye okusuvera Jehova nokumuvatera kutja ma rire omundu womerizirira indu tje kuru. (2 Timoteus 1:5; 3:15) Ove wina mo sokurihonga kutja ovikeṋa mbi ri momutima womuatje woye omuzandu poo omukazona. Otjihorera tjoye omuini wina otjinanḓengu tjinene. Omuano omusembasemba mu mo yenene okuhonga Embo raJehova komuatje woye eendu ove omuini tji wa twa Embo ndi momutima woye rutenga.—Epsalme 40:8.

OMBEIBELA MAI TJA: “Omundu auhe nga hakahane okupuratena, nungwari nga wombe okuhungira.” (Jakobus 1:19) Tjita kutja ovanatje voye ve kare noupupurukwe wokuhungira kuna ove. Owo ve sokutjiwa kutja tji mave vanga okuhungira, ove u ri kamwaha okupuratena. Kondja okupaha oruveze oruwa pu mamu hungirire kutja owo ve kare noupupurukwe wokukuraera oviṋa avihe mbi mave ripura. (Jakobus 3:18) Indu ovanatje voye tji mave munu kutja ove u nombeze, owo kamaave hungire ouatjiri auhe kuna ove. Kara nomuretima ku novanatje voye nu aruhe ve raera kutja we ve suvera.—Mateus 3:17; 1 Ovakorinte 8:1.

OVIṊA MBI MO YENENE OKUTJITA:

• Kondja kutja aruhe u kare noruveze indu ovanatje voye tji mave hepa okuhungira kuna ove

• Serekarera ku novanatje voye aruhe, nungwari karondu tji pa kara ouzeu uriri

OMBEIBELA MAI TJA: “Omunazondunge aruhe rutenga u ripura ngunda e hiya tjita otjiṋa.” (Omiano 13:16) Povikando tjiva, mo hepa okuripurira oukoto koviṋa ovanatje voye mbi mave hungire okutjiwa kutja owo tjiri mave ripura tjike nokutja otjiṋa tji mave hungirire ko tje ve ṱunu vi. Omitanda potuingi vya suvera okuneneparisa ouzeu wawo poo okuhungira oviṋa mbi ve hina okuvanga tjiri. “Puratena nawa ngunda au hiya zira; tji u ha tjitire nao, mo varwa eyova.” (Omiano 18:13) O hakahana okupindika.—Omiano 19:11.

OVIṊA MBI MO YENENE OKUTJITA:

• Kondja kutja o ha wire omuatje woye momambo poo okupindika, kainatja kutja eye me ku raere tjike

• Kondja okuzemburuka kutja ove wa ri noumune uṋe indu tji wa ri nozombura ze nokutja ovikeṋa mbya ri ovinahepero kove oruveze ndwo

OMBEIBELA MAI TJA: “Muatje wandje, puratena komavyuriro waiho, nu o nakaura ko omahongero wanyoko!” (Omiano 1:8) Jehova wa toorora kutja ovanene ve kare nouvara kombanda yovanatje vawo. Honga ovanatje voye kutja ve ku tenge nu ve raise onḓuviro kove. (Ovaefese 6:1-3) Ovanatje ve yenena okumuna indu ovanene vawo tji ve hina ‘ouripura umwe.’ (1 Ovakorinte 1:10) Tji mu hina okuzuvasana, kondjeye kutja amu ha tjiti nao momurungu wovanatje, mena rokutja ihi matji tjiti kutja ave ha kara nondengero ku eṋe otjovanene vawo.

OVIṊA MBI MO YENENE OKUTJITA:

• Hungirireye ko nu mu zuvasane kutja ovanatje veṋu mamu ve vyura momiano viṋe

• Ndovazu ove nomukweṋu mu noumune mbwa panguka ohunga nokutja mamu sokuhonga vi ovanatje veṋu, kondja okuripurira koumune womukweṋu

OMBEIBELA MAI TJA: “Honga omuatje omuhingo mbu ma hupu na wo.” (Omiano 22:6) Okuhonga ovanatje voye nondoṋeno ku hepa ozongondjero ozengi. Mamu hepa okukara nondando yokuhonga ovanatje veṋu, nu ihi matji kamburire mo omavyuriro wina. (Epsalme 127:4; Omiano 29:17) Okuvyura ovanatje voye kaku hee kutja u sokuvevera uriri, nungwari ku heya kutja u sokuvevatera okuzuva kutja ongwaye tji wa twapo omirari vyorive. (Omiano 28:7) Wina ve honga okusuvera Embo raJehova nokuzuva omirari vyaro. (Epsalme 1:2) Otjiṋa hi matji ve vatere kutja ve kare nomeritjiviro omawa womomutima.—Ovaheberi 5:14.

OVIṊA MBI MO YENENE OKUTJITA:

• Kondja kutja ovanatje voye ve mune Mukuru otjOmundu wakatjiri mu mave yenene okukambura

• Ve vatera kutja ve rihonge okumuna oumba mbu etwa i ongaro ombi yomeritjindiro, tjimuna imbwi mbu kara morungovi notungovi twomahakaeneno, nokuunakaura. Ve honga kutja mave yenene vi okukara kokure novandu mbe ungurisa ovanatje korukatuko