Mwen fèt nan vil Tirane, ki se kapital peyi Albani, fanmi m te pòv. Papa m te yon moun onèt e l te konn travay anpil pou l pran swen fanmi an. Men, se apèn si n te konn jwenn ase pou n manje. Lè m te timoun, lefètke n te pòv, sa te konn fè m tris anpil. Souvan m pa t gen soulye pou m met nan pye m e pa t toujou gen ase manje pou m manje.

 Mwen te kòmanse vòlè depi lè m te piti. M te panse se ede mwen t ap ede fanmi m jwenn sa yo bezwen. Avèk letan, lapolis te kenbe m. Donk, an 1988, lè m te gen 14 an, papa m te voye m nan yon lekòl pou timoun ki dezòd. M te pase dezan nan lekòl sa a e m te aprann soudi. Lè m te kite lekòl la, m te vle mennen yon vi ki onèt. Men, m pa t ka jwenn travay. Nan moman an, te gen pwoblèm politik ann Albani e pifò moun pa t ka jwenn travay. Mwen te vin santi m dekouraje, se sa k fè m te kòmanse pase tan ak ansyen zanmi m yo e m te kòmanse vòlè ankò. Avèk letan, yo te arete ni mwen menm, ni zanmi m yo e yo te kondane nou pou n fè twazan prizon.

 Lè yo te lage m, m te kontinye fè krim. Systèm ekonomik la pa t bon ditou ann Albani, e peyi a te tèt anba. Nan moman tètchaje sa a, m te konn fè anpil lajan nan fè zak ki ilegal. Yon lè, lapolis te arete de nan moun m t al vòlè avè yo a. Mwen te kouri kite peyi a pou yo pa t mete m nan prizon pou plis tan fwa sa a. Nan moman an, mwen te marye ak Julinda e nou te gen yon tigason.

 Nou t al viv ann Angletè. Mwen te gen entansyon kòmanse yon nouvo vi ansanm ak madanm mwen ak pitit gason m nan, men li te difisil pou m chanje ansyen abitid mwen yo ki te byen anrasinen lakay mwen. Sa pa t pran tan pou m te rekòmanse fè zak kriminèl. Men, fwa sa a, m te kòmanse vann dwòg e m te konn ap jere anpil lajan.

 Ki jan Julinda te santi l lefètke m te konn ap vann dwòg? M ap kite l reponn: “Toutpandan mwen t ap grandi ann Albani, m te reve pou n pa pòv ankò. M te dakò fè nenpòt bagay pou n gen yon lavi miyò. Mwen te panse lajan t ap fè n viv pi byen, donk m te dakò san pousan ak nenpòt sa Artan te dwe fè pou l ka fè lajan, kit se twonpe moun, vòlè oswa vann dwòg.”

 Men, an 2002, lavi nou te chanje nèt, tout plan ak tout espwa nou te gen pou lavni te disparèt. Lapolis te kenbe m ak yon gwo kagezon dwòg nan men m e yo te mete m nan prizon ankò.

 Labib te kòmanse enfliyanse lavi m menm anvan m te rann mwen kont. Anvan sa, an 2000, Julinda te rankontre Temwen Jewova yo e yo te kòmanse etidye Labib avè l. Mwen pa t enterese nan pale sou Labib paske m te panse sa te raz. Men, Julinda te renmen sa anpil. Men sa l di: “Mwen soti nan yon fanmi ki bay relijyon anpil enpòtans, m te renmen Bib la e m te respekte l. M te toujou vle konnen sa l anseye, donk m te kontan etidye Labib ak Temwen yo. Anpil nan sa m t ap aprann nan Bib la te fè sans pou mwen. Sa m te aprann yo te ede m fè kèk chanjman nan lavi m. Men, m te toujou panse se lajan ki t ap fè n gen kè kontan. Se lè yo te arete Artan m te vin wè bagay yo yon lòt jan. Bridsoukou, m te vin rann mwen kont sa Bib la di sou lajan se verite. Nou te fè tout sa n kapab pou n vin rich, men lajan pa t fè n gen kè kontan. Se lè sa a mwen te vin konprann m bezwen suiv tout prensip Bondye bay yo.”

 An 2004, yo te lage m e sa pa t pran tan pou m te eseye retounen nan vann dwòg. Men, Julinda te vin wè bagay yo yon lòt jan e l te di yon bagay ki te fè m reflechi anpil. Li te di: “M pa vle lajan w ankò. M vle mari m la avè m e m vle papa pitit mwen yo la avèk yo.” Mwen te sezi, men l te gen rezon. M te pase plizyè ane lwen fanmi m. Epitou, m te reflechi sou jan m te soufri lefètke m t ap kouri dèyè lajan yon fason ki pa t onèt. Donk, mwen te deside chanje fason m t ap viv la e m te deside koupe kontak ak ansyen zanmi m yo.

 Sa k te gen pi gwo efè sou mwen se lè m te asiste yon reyinyon Temwen Jewova yo ak madanm mwen ansanm ak de pitit gason m yo. Sa te touche m anpil lè m te wè jan moun yo janti. Avèk letan, mwen te kòmanse etidye Labib.

 Grasa Labib, mwen te aprann “lanmou pou lajan se youn nan rasin tout kalite move bagay, e gen kèk moun, piske yo kiltive lanmou sa a [...] yo pèse kò yo toupatou avèk anpil soufrans”. (1 Timote 6:9, 10.) Mwen byen konnen verite pawòl ki nan vèsè sa a! Mwen te vrèman regrèt erè m te fè anvan yo, paske yo te lakòz soufrans ni pou mwen, ni pou fanmi m (Galat 6:7). Lè m te aprann jan Jewova ak pitit gason l lan, Jezi Kris, renmen nou, m te kòmanse chanje pèsonalite m. Mwen te kòmanse panse ak lòt moun plis olye m te panse ak tèt mwen e m te pase plis tan ak fanmi m.

 Mwen jwenn byenfè lefètke m suiv konsèy Bib la ki di: “Se pou fason n ap viv pa gen lanmou pou lajan ladan l. Kontante nou ak sa nou genyen.” ​(Ebre 13:5). Kounye a, lespri m anpè e konsyans mwen klè. Sa fè m gen yon kè kontan m pa t janm genyen anvan. Maryaj mwen vin pi solid e fanmi m vin gen yon relasyon ki pi sere.

 Anvan, m te konn panse si n te gen anpil lajan, nou t ap gen kè kontan. Men kounye a, m wè aklè jan krim ak lanmou pou lajan te fè m soufri anpil. Nou pa rich nan domèn materyèl, men m panse nou jwenn yon bagay ki pi enpòtan lontan nan lavi n, ki se yon relasyon sere ak Jewova Dye. Lè n sèvi l ansanm antanke fanmi, sa fè n gen vrè kè kontan an.