Kiyès ki antikris la?
Repons Bib la bay
Antikris la se pa jis yon moun oswa yon enstitisyon, paske Bib la di gen “anpil antikris”. (1 Jan 2:18.) Men, ekspresyon “antikris” la, ki soti nan yon mo grèk ki vle di “kont (oswa nan plas) Kris”, fè referans ak kèlkeswa moun ki fè bagay ki vin apre yo:
Nye Jezi se Kris la (Mesi a) oswa nye li se Pitit Bondye. — 1 Jan 2:22.
Opoze ak Kris, Sila a Bondye chwazi a. — Sòm 2:1, 2; Lik 11:23.
Fè kwè li se Kris la. — Matye 24:24.
Pèsekite disip Kris yo, piske Jezi konsidere tout sa yon moun fè yo se li menm yo fè l. — Travay 9:5.
Fè konnen li se kretyen toutpandan l ap vyole lalwa oswa l ap twonpe moun. — Matye 7:22, 23; 2 Korentyen 11:13.
Bib la pale nonsèlman de chak moun k ap fè mòd bagay sa yo kòm “antikris”, men tou li pale de gwoup moun k ap fè yo kòm “antikris”. (2 Jan 7.) Antikris la te parèt pou premye fwa nan epòk apot yo e l aktif depi lè a. Labib te gentan fè konn sa. — 1 Jan 4:3.
Fason pou n rekonèt antikris yo
Y ap gaye manti anrapò ak Jezi (Matye 24:9, 11). Pa egzanp, moun k ap anseye doktrin Trinite a oswa ki fè konnen Jezi se li menm ki Bondye Toupisan an, moun sa yo opoze ak ansèyman Jezi yo ki te di: “Papa a nan pi gwo pozisyon pase m.” — Jan 14:28.
Antikris yo rejte sa Jezi te di konsènan fason Wayòm Bondye a fonksyone. Pa egzanp, gen kèk chèf nan relijyon ki di Kris sèvi ak gouvènman lèzòm yo pou l aji. Alòske, se pa sa Jezi te anseye. Men sa l te di:. “Wayòm mwen an pa fè pati monn sa a.” — Jan 18:36.
Yo di Jezi se Seyè yo, men yo pa obeyi kòmandman l yo, sa ki gen ladan yo kòmandman pou yo preche bon nouvèl konsènan Wayòm nan. — Matye 28:19, 20; Lik 6:46; Travay 10:42.