Revareva ta Kolose Taudia Dekenai 4:1-18
4 Umui biagudia e, namona be mai kara maoromaoro ida bona maka tamona ai emui igui hesiai taudia umui kara henia, badina umui diba umui danu be mai emui Biaguna guba dekenai.+
2 Umui guriguri noho.+ Unai kara do umui laloaboio lasi, bona Dirava umui tanikiu henia.+
3 Ai totona danu do umui guriguri,+ unai amo Dirava ese dala ta do ia kehoa bena iena hereva do ai harorolaia bona Keriso ena hunia hereva helagana do ai gwauraia. Oibe, unai badina dainai lau be dibura ruma ai lau noho.+
4 Bona unai do lau gwauraia hedinarai goevagoeva, badina unai bamona lau karaia be maoro.
5 Namona be aonega dalana ai murimuri taudia umui kara henia noho, bona emui nega umui gaukaralaia namonamo.+
6 Namona be hanaihanai mai gado namo ida do umui hereva, damena umui atoa bamona,+ unai amo do umui diba edena bamona ta ta do umui haere henia.+
7 Egu lalokau tadikaka, Tukiko,+ ese lau dekenai idia vara gaudia ibounai be umui dekenai do ia gwauraia. Ia be Lohiabada ena abidadama hesiai tauna bona ita ida ia gaukara hebou tauna.
8 Umui dekenai ia lau siaia, unai amo do umui diba ai be edena bamona bona ia ese emui lalona do ia hagoadaia.
9 Ia be Onesimo danu lau siaia.+ Onesimo be egu lalokau tadikaka, guna ia be umui ida ia noho. Iniseniai idia vara gaudia ibounai be umui dekenai do idia gwauraia.
10 Lau ida dibura ruma ai ia noho tauna, Arisitako+ bona Banaba ena kasin Mareko,+ ese edia hanamoa hereva idia siaia (Mareko dainai umui abia hadibaia hereva be inai, bema ia be umui dekenai do ia mai, ia umui abia dae),+
11 bona Iesu, ena ladana ta be Iusto, ia danu ese ena hanamoa hereva ia siaia. Inai taudia be kopina utua taudia. Idia sibona be lau ida Dirava ena Basileia totona ai gaukara hebou, bona idia ese lau idia durua bona hagoadaia bada.
12 Guna umui ida ia noho tauna, Epafra,+ Keriso Iesu ena hesiai tauna, ese iena hanamoa hereva ia siaia. Ia be nega ibounai umui totona ia guriguri goadagoada. Unai amo lo taudia bamona do umui gini goada, bona Dirava ena ura ibounai do umui abidadama henia momokani.
13 Umui lau hamaoroa, Epafra be umui totona ia hekwarahi bada, bona Laodikea taudia bona Hieropoli taudia totona danu.
14 Momo ese idia lalokau henia doketa tauna Luka+ bona Dema ese umui dekenai edia hanamoa hereva idia siaia.+
15 Laodikea ai idia noho tadikaka, bona taihu Numupa bona ena ruma ai idia hebou kongrigeisen taudia dekenai egu hanamoa hereva umui henia.+
16 Bona inai revareva be emui huanai idia duahia murinai, dala umui karaia Laodikea kongrigeisen dekenai do idia duahia danu.+ Bona Laodikea dekenai lau siaia revareva danu do umui duahia.
17 Danu, Akipo umui hamaoroa,+ ia ese Lohiabada amo ia abia hesiai gaukara do ia karaia namonamo bona ia hagugurua.
18 Lau Paulo ese egu imana amo inai hanamoa hereva lau torea.+ Dibura ruma ai lau noho lalonai, lau do umui laloa noho.+ Namona be Dirava ena hebogahisi hereadaena be umui dekenai ia noho.
