Reana haida idia laloa duahia tauna be Heberu, Aramia, bona Grik gado ai idia torea herevadia ia lalopararalaia totona, hereva ta ta idia hahanaia be namo. To nega momo unai bamona idia karaia lasi. Mani badina haida ita itaia:

•   Gado ta ta edia grama, hereva, bona sentens atoa dalana be idauidau. Heberu gado ena profesa, S. R. Driver ia gwau, gado ta ta edia “grama bona edia hereva badadia idia idau sibona lasi, to . . . lalohadai ta hahedinaraia totona, sentens ai hereva idia atoa dalana be ia idau danu.” Gado ta ta edia laloparara dalana be idauidau. Profesa S. R. Driver ma ia gwau, “unai dainai gado ta ta ai sentens atoa dalana be tamona lasi.”

•   Heberu, Aramia, bona Grik gado edia hereva bona grama be inai nega ena gado ta ese ia hahedinaraia lasi. Unai dainai, hereva ta ta hahanaia karana ese sentens ena anina ia hahedinaraia namonamo lasi, eiava nega haida lalohadai kererena ia hedinarai diba.

•   Sentens idauidau lalonai hereva ta idia gaukaralaia neganai, ena anina ia idau diba.

Hahanaia tauna ese sentens haida lalonai ia gaukaralaia herevana be Heberu, Aramia, eiava Grik gado ida ia hegeregere diba, to namona be ia naria namonamo.

Hereva ta ta hahanaia karana amo idia vara lalohadai kereredia haida:

•    Baibel ese inai hereva “mahuta” ia gaukaralaia neganai, ia be ta ia mahuta eiava ia mase ia herevalaia. (Mataio 28:13; Kara 7:60) Bema sentens lalonai unai hereva ese mase ia herevalaia, Baibel hahanaia taudia ese inai hereva “mase ai ia mahuta” idia torea diba, unai amo hari inai negai Baibel ia duahia tauna be do ia daradara lasi.— 1 Korinto 7:39; 1 Tesalonika 4:13; 2 Petero 3: 4.

•   Efeso 4:14 ai aposetolo Paulo be Grik herevana ta ia gaukaralaia bona ena anina be “taunimanima edia dais idia gadaralaia.” Inai haheitalai herevana ese laki gadara lalonai ta ese dais amo ta ia koia karana ia herevalaia. Gado momo dekenai inai haheitalai herevana idia lalopararalaia lasi. To inai hereva “kara koikoi” ese anina korikori ia hahedinaraia.

•   Roma 12:11 ai, Grik herevana ta idia gaukaralaia, ena anina be “lauma be ia boela noho.” To English gado ai unai hereva ena anina korikori ia hedinarai lasi, unai dainai inai Baibel ai, idia hahanaia “Dirava ena lauma amo umui hururuhururu.”

•   Iesu ena Ororo Harorona ai, ia ese ia gaukaralaia herevana be nega momo idia hahanaia, “hekokoroku lasi momokani taudia be idia namo.” (Mataio 5:​3, Buka Helaga) To inai hereva “hekokoroku lasi momokani” ese Grik herevana ena anina korikori ia hahedinaraia lasi. Badina Iesu be hekokoroku lasi karana ia herevalaia lasi, to ia ura hadibaia gauna be inai: Ta ia moale totona, namona be Dirava ena hakaua herevadia ia badinaia, to sibona ena ura ia tahua lasi. (Luka 6:20) Unai dainai, inai hereva “Dirava dibaia totona idia hitolo taudia” eiava “idia laloparara Dirava idia dibaia be namo taudia” idia torea, bona unai ese Grik herevana ena anina ia hahedinaraia namonamo.—Mataio 5:3; The New Testament in Mod­ern English.

•   Baibel ena siri momo ai, Heberu hereva idia hahanaia “mama karana” be English hereva ena anina ida ia hegeregere, unai be, ta ia badu badina ena turana namona be ia ia badinaia lasi, eiava ta be ma haida edia kohu dainai ia mama. (Aonega Herevadia 6:34; Isaia 11:13) To, unai Heberu herevana be kara namo ia herevalaia danu. Hegeregere, Baibel lalonai unai hereva idia hahanaia neganai, inai bamona idia torea, Iehova ia “ura dikadika” ena hesiai taudia ia gimaia, eiava “ia ura ia sibona do [idia] tomadiho henia.” (Esodo 34:14; 2 King Taudia 19:31; Esekiela 5:13; Sekaraia 8: 2) Danu inai bamona idia  hahanaia diba, Dirava ena abidadama hesiai taudia be ia sibona bona ia tomadiho henia karana idia “ura henia bada,” eiava idia ‘ura lasi dirava ma ta idia tomadiho henia.’—Salamo 69:9; 119:139; Numera 25: 11.

•   Heberu herevana idia hahanaia imana ena anina be idauidau. Sentens atoa dalana hegeregerena, inai hereva “siahu,” “hariharibada karana” eiava “hakaua henunai” idia gaukaralaia. (Deuteronomi 32:27; 1 King Taudia 10:13; 2 Sivarai 17:15) Oibe, En­glish New World Translation of the Holy Scriptures Baibel ai, inai hereva be nega 40 mai kahana ai dala idauidau ai idia hahanaia.

Unai dainai, Baibel hahanaia gaukarana lalonai, Heberu eiava Grik herevana ta ia hedinarai gabudia ibounai dekenai hereva tamona idia gaukaralaia lasi. Hahanaia tauna be hereva ta ta ia laloa namonamo be namo, unai amo hereva maorona ia abia hidi diba Heberu eiava Grik herevana ena lalohadai ia hahedinaraia totona. Bona danu, sentens ia hahanaia neganai, namona be gado ena grama ia badinaia, unai amo do ia auka lasi duahia totona.

To danu, hahanaia tauna do ia naria namonamo, namo lasi hereva idauidau ia gaukaralaia bona sentens ena lalohadai ia haidaua. Bema hahanaia tauna be sibona ena laloparara hegeregerena Baibel ia hahanaia, unai ese sentens ena lalohadai ia haidaua diba danu. Edena dala ai? Reana nega haida hahanaia tauna ese Baibel ena hereva ia hahanaia kerere, sibona ena lalohadai ia atoa, eiava lalohadai badana ia kokia diba. Unai dainai ta be sibona ena lalohadai amo Baibel ia hahanaia neganai, duahia dalana ia hanamoa diba, to unai ese duahia tauna ia koua diba Baibel ena anina korikorina ia lalopararalaia totona.

Ta ese ia abia dae hahediba herevadia ese ena hahanaia gaukarana ia biagua diba. Hegeregere, Mataio 7:13 ia gwau: “Mase ia lao henia dalana be bada.” Hahanaia taudia haida be reana idia abia dae hahediba herevadia dainai, idia ese inai hereva “hel” idia atoa, to Grik herevana ena anina korikorina be “hadikaia.”

Namona be Baibel hahanaia tauna ia laloatao danu, guna Baibel idia torea taudia be biru taudia, mamoe naria taudia, bona haoda taudia edia hereva dalana ai Baibel idia torea. (Nehemia 8:​8, 12; Kara 4:13) Unai dainai, Baibel hahanaia namonamo karana ese kudou-maoro  taudia ia durua Baibel idia lalopararalaia totona, herevana edia noho dalana be idauidau. Namona be taunimanima ese idia gaukaralaia momo bona lalopararalaia herevadia idia atoa, to hereva gunadia idia atoa lasi.

Ena be Baibel hahanaia taudia momo be maoro lasi, to Dirava ena ladana, Iehova, be Baibel momo amo idia kokia, herevana Baibel ena maniuskrip gunadia dekenai unai ladana ia noho. (Apendiks A4 itaia.) Hahanaia taudia momo ese unai ladana ena gabu ai dagi ladana hegeregere “Lohiabada” idia atoa, bona haida ese Dirava ena ladana idia hunia. Hegeregere, Iesu ena guriguri Ioane 17:26 dekenai, Baibel haida idia gwau: “Lau ese oi be idia dekenai lau gwauraia hedinarai vadaeni,” bona Ioane 17:6 ai idia gwau, “lau dekenai oi henia taudia dekenai oi lau hahedinaraia.” To, Iesu ena guriguri hahanaia dalana maorona be inai: “Lau ese emu ladana be idia dekenai lau gwauraia hedinarai vadaeni,” bona “lau dekenai oi henia taudia dekenai oiemu ladana lau hadibaia.”

English New World Translation Baibel ena hamatamaia herevana ia gwau: “Baibel ai hahanaia neganai sibona emai lalohadai ai atoa lasi. Emai ura badana be hereva ta ta ai hahanaia, bema English ena laulau herevadia ese Baibel ena lalohadai idia hahedinaraia goevagoeva.” Unai dainai, New World Bible Translation Committee ia hekwarahi bada ia abia hidi herevadia ese Heberu, Aramia, bona Grik gado herevadia edia anina korikori idia hahedinaraia totona, bona Baibel ena lalohadai idia hahedinaraia goevagoeva lasi herevadia idia gaukaralaia lasi. Unai amo, ia auka lasi duahia tauna ese Baibel ia duahia totona, bona do ia abia dae momokani Dirava ena hereva be idia hahanaia maoromaoro.—1 Tesalonika 2:13.