Yexus hais tias: “Ib haivneeg yuav tawmtsam ib haivneeg; ib lub tebchaws yuav sawv tua ib lub tebchaws, yuav muaj av qeeg loj heev, yuav muaj kev tshaib kev nqhis, thiab yuav muaj mob thoob plaws txhua qhov huv tibsi.” (Lukas 21:10, 11) Tej xwm txheej no qhia tias “Vajtswv lub Tebchaws [tseem fwv] twb los ze lawm.” Puas muaj pov thawj qhia tias tej no twb tshwm sim thoob lub ntiajteb lawm? Cia peb tham txog tej pov thawj ntawd.

1. KEV TSOV KEV ROG

Nyob rau xyoo 1914, muaj ib ntsuj rog loj heev uas tsis tau pom dua li. Cov neeg uas tshawb keeb kwm hais tias xyoo 1914 ntuj fa teb lam vim Ntsuj Rog Thoob Qab Ntuj Zaum 1 pib rau xyoo ntawd. Nyob rau ntsuj rog ntawd, cov tibneeg siv tsheb tua rog, dav hlau tso hoob pob, phom luaj zaj, tshuaj lom, thiab lwm yam los tua neeg tuag coob heev. Nyob rau Ntsuj Rog Thoob Qab Ntuj Zaum 2, lawv ho siv tej hoob pob athaumi (atomic) loj heev. Txij xyoo 1914 los, tsuas pom muaj kev tsov kev rog ib qho tas ib qho tuaj ua rau tsheej plhom leej tuag.

2. AV QEEG

Phau ntawv Britannica Academic hais tias txhua xyoo, yeej muaj av qeeg loj txog li 100 zaug, uas “ua rau tej vaj tse pob tas.” Tsis tas li ntawd, United States Geological Survey hais tias “keeb kwm qhia tias txij xyoo 1900 los, ib xyoos twg av yuav qeeg txog li 16 zaus.” Ib txhia tibneeg kuj hais tias zoo li muaj av qeeg ntau zog lawm twb yog tibneeg paub kuaj av qeeg lawm xwb. Txawm li ntawd los, tej av qeeg loj hauv ntiajteb no yeej ua rau tibneeg raug mob thiab tuag coob heev.

 3. KEV TSHAIB KEV NQHIS

Ntau zaus, tibneeg raug kev tshaib kev nqhis thoob ntiajteb vim kev tsov kev rog, kev tsis ncaj ncees, tsis muaj nyiaj, tej qoob loo tuaj tsis zoo, lossis tibneeg npaj tsis txhij rau tej xwm txheej phem. Lub koom haum World Food Programme tshaj tawm tias xyoo 2018 “hauv ntiajteb, 821 plhom leej tsis muaj txaus noj txaus haus. Hos ntawm cov ntawd, 124 plhom leej tsis muaj dabtsi noj li.” Vim li no, tej menyuam thiaj tuag tshaib txog tshaj li 3 plhom leej txhua xyoo. Nyob rau xyoo 2011, tag nrho cov menyuam thoob plaws ntiajteb tuag yuav luag ib nrab vim txojkev tshaib kev nqhis.

4. KEV MOB KEV NKEEG

Lub koom haum World Health Organization hais tias: “Tau li 100 xyoo dhau los no, tibneeg raug ntau yam kab mob kev nkeeg loj heev. Xws li tus kab mob cholera, plague thiab yellow fever. Kuj muaj tej yam kab mob uas tibneeg tsis tau raug dua li. Xws li SARS, pandemic influenza, MERS, Ebola, thiab Zika. Tus kab mob COVID-19 uas mob thoob qhov txhia chaw yog tus kab mob tshiab niaj hnub nimno. Txawm tias tej neeg tshawb txujci thiab tej kws kho mob txawj npaum li cas los, lawv kho tsis tau txhua yam kab mob kev nkeeg.

5. TES HAUJLWM TSHAJ TAWM THOOB NTIAJTEB

Yexus kuj hais tias yuav muaj ib yam ntxiv uas yuav tshwm sim. Nws hais tias: “Thaum muaj neeg mus qhia Txojmoo Zoo uas hais txog Ntuj Ceebtsheej [lub tseem fwv] mus thoob qab ntuj thiab ua timkhawv rau txhua haivneeg paub lawm, ces thaum ntawd twb yuav txog lub sijhawm kawg.” (Mathais 24:14) Txawm tias muaj kev ntxhov siab thoob plaws lub ntiajteb no los, muaj tshaj li 8 plhom leej ntawm txhua haiv neeg tabtom tshaj tawm txoj xov zoo txog Vajtswv lub tseem fwv. Lawv tshaj tawm rau 240 lub tebchaws thiab hais tshaj li 1,000 yam lus. Yeej tsis tau muaj dua li no ib zaug li.

Tej xwm txheej uas Yexus tau hais twb tshwm sim rau niaj hnub no lawm. Vim li cas tseem ceeb rau peb muab tej no coj los xav? Rau qhov Yexus qhia tias: “Thaum nej pom tej  ntawd, nej yuav paub hais tias, Vajtswv lub Tebchaws [tseem fwv] twb los ze lawm.”​—Lukas 21:31.

Thaum peb muab tej xwm txheej Yexus hais piv rau tej yam uas tau sau tseg hauv phau Vajlugkub, peb pom tias Vajtswv twb tsa lub tseem fwv saum ntuj ceeb tsheej rau xyoo 1914 lawm. a Lub sijhawm ntawd, nws tsa nws tus Tub Yexus Khetos ua Vajntxwv. (Phau Ntawv Nkauj 2:2, 4, 6-9) Tsis ntev tom ntej no, Vajtswv lub tseem fwv yuav kav lub ntiajteb, rhuav tshem tibneeg tej tseem fwv, thiab muab lub ntiajteb no kho ua ib lub vaj kaj siab rau tibneeg nyob mus ib txhis.

Tshuav tsis ntev, twb yuav muaj raws li cov lus uas Yexus qhia kom nws cov thwjtim thov Vajtswv tias: “Thov cia koj lub tebchaws [tseem fwv] los. Thov cia muaj raws li koj lub siab nyiam rau hauv ntiajteb ib yam li muaj saum ntuj ceeb tsheej.” (Mathais 6:10, TT ) Yog tias Vajtswv lub tseem fwv twb pib kav txij xyoo 1914 los lawm, lub tseem fwv ntawd tau ua dabtsi xwb? Thiab yuav muaj dabtsi ntxiv thaum Vajtswv lub tseem fwv kav txhua tus hauv ntiajteb?