Mathais Sau 6:1-34
6 “Ceev faj tsis txhob lam coj ncaj rau luag qhuas xwb. Yog nej ua li ntawd ces nej Leej Txiv saum ntuj yuav tsis foom koob hmoov rau nej.
2 Yog li ntawd, thaum koj pub rau cov txom nyem, txhob muab khav rau tus ub tus no. Txhob ua li cov neeg siab nkhaus* uas ua txuj pub rau luag hauv tej tsev pe hawm thiab tom tej kev kom neeg qhuas. Kuv hais ncaj qha rau nej tias, lawv tsuas tau tej lus qhuas ntawd nkaus xwb.*
3 Tiam sis thaum koj pub rau cov txom nyem, tsis txhob cia koj sab tes laug paub tej uas koj sab tes xis muab.
4 Cia li muab twj ywm rau cov txom nyem. Koj Leej Txiv yeej pom txhua yam.* Nws mam pauj rov rau koj.
5 “Thaum nej thov Vajtswv, tsis txhob ua li cov neeg siab nkhaus uas sawv ntsug thov Vajtswv hauv tej tsev pe hawm thiab ntawm tej kev tshuam kom tib neeg pom thiab qhuas. Kuv hais ncaj qha rau nej tias, lawv tsuas tau tej lus qhuas ntawd nkaus xwb.*
6 Tiam sis thaum koj thov, cia li mus hauv txaj* thiab kaw rooj txag es mam li thov koj Leej Txiv uas nyob saum ntuj.* Koj Leej Txiv uas pom txhua yam mam li foom koob hmoov rau koj.
7 Thaum koj thov Vajtswv, tsis txhob hais mus hais los tib co qub lus zoo li cov neeg tsis paub Vajtswv* hais. Lawv xav tias lawv thov ntev thov ntau ces Vajtswv yuav hnov lawv tej lus thov.
8 Tsis txhob thov Vajtswv li lawv, rau qhov koj Leej Txiv yeej paub tej uas koj cheem tsum ua ntej koj thov nws.
9 “Nej yuav tsum thov Vajtswv li no,
“‘Peb Leej Txiv tus uas nyob saum ntuj ceeb tsheej, thov kom sawv daws hwm koj lub npe.
10 Thov koj lub Nceeg Vaj* los kav. Thov kom txhua yam hauv ntiaj teb muaj tiav raws li koj lub siab nyiam ib yam li saum ntuj.
11 Thov koj pub kom peb muaj txaus noj* rau hnub no,
12 thiab thov koj zam peb lub txim* ib yam li peb tau zam lwm tus lub.
13 Thov tsis txhob cia peb qaug rau tej kev sim siab tiam sis thov cawm peb dim ntawm Xatas* txhais tes.’
14 “Yog nej zam tej uas lwm tus ua txhaum rau nej ces nej Leej Txiv saum ntuj yuav zam rau nej thiab.
15 Tiam sis yog nej tsis zam tej uas lwm tus ua txhaum rau nej ces nej Leej Txiv yuav tsis zam nej ib yam nkaus.
16 “Thaum nej yoo mov, tsis txhob* ua ntsej muag mluas mlob li cov neeg siab nkhaus ua. Lawv txhob txwm tsis tu cev kom luag pom thiab qhuas tias lawv yoo mov. Kuv hais ncaj qha rau nej tias, lawv tsuas tau tej lus qhuas ntawd nkaus xwb.*
17 Tiam sis thaum koj yoo mov, cia li muab tshuaj tsw qab pleev taub hau thiab ntxuav muag,
18 luag thiaj tsis paub tias koj yoo mov. Cia koj Leej Txiv uas nyob saum ntuj* tib leeg paub xwb. Yog koj ua li ntawd ces koj Leej Txiv uas pom txhua yam* yuav foom koob hmoov rau koj.
19 “Tseg tsis txhob khaws nyiaj txiag thiab tej yam muaj nqis rau hauv ntiaj teb no, vim muaj kab muaj xeb noj thiab muaj tub sab nyiag.
20 Tiam sis cia li khaws yam uas muaj nqis rau saum ntuj ceeb tsheej thiaj tsis muaj kab muaj xeb noj thiab tsis muaj tub sab nyiag.
21 Nco ntsoov tias yog koj saib yam twg muaj nqis ces koj lub siab yuav nyob rau yam ntawd.
22 “Lub qhov muag yog lub teeb rau lub cev. Yog koj lub qhov muag ntsia ntsoov rau ib yam xwb* ces koj lub cev yuav ci kaj nrig.
23 Tiam sis yog koj lub qhov muag phem* ces koj lub cev yuav tsaus nti. Yog koj lub qhov muag tseem ua rau koj lub cev tsaus nti thiab ces koj yeej nyob dub nciab xwb!
24 “Tsis muaj leej twg yuav ua qhev tau rau ob tug los pav. Yog nws ua li ntawd, nws yuav nyiam ib tug ntxub ib tug los sis nws yuav muab siab npuab ib tug saib tsis taus ib tug. Nej yuav ua qhev rau Vajtswv thiab nyiaj txiag yeej tsis tau!
25 “Vim li no, kuv thiaj qhia nej tias, cia li tseg tsis txhob txhawj tias nej yuav muab dab tsi los noj los hnav. Txoj sia tseem ceeb dua tej ntawd los tsis yog?
26 Tsa muag ntsia tej noog uas ya saum nruab ntug. Tej noog twb tsis txawj cog tsis txawj sau qoob los cia hauv txhab. Txawm li ntawd los, nej Leej Txiv saum ntuj tseem pub tej noog tau noj. Nej yeej muaj nqis tshaj tej noog ntawd los tsis yog?
27 Nej cov uas niaj hnub txhawj, puas yuav tsav tau nej txoj sia nyob ib hnub* ntxiv?
28 Ua cas nej yuav niaj hnub txhawj tias yuav muab dab tsi los hnav? Saib tej paj hmab paj ntoos tawg li cas. Tej ntawd tsis txawj khwv tsis txawj ntos ntaub
29 tiam sis kuv qhia rau nej tias Vaj Ntxwv Xalaumoos tej tsoos zoo nkauj kawg li, los twb tsis muaj ib ce zoo nkauj cuag li lub nyuag paj ntawd.
30 Xav seb tej paj hmab paj ntoos uas tawg tshiab tshiab hnub no, tag kis twb ntsws tas yuav muab txiav pov hauv cub tawg, los Vajtswv tseem tsim tej paj ntawd zoo nkauj ua luaj. Yog li, Vajtswv yeej yuav pub kom nej muaj hnav thiab. Ua cas nej tseem tsis tso siab?
31 Yog li ntawd txhob txhawj tias, ‘Peb yuav muab dab tsi los noj los hnav?’
32 Cov neeg tsis paub Vajtswv* niaj hnub txhawj thiab khwv kom lawv tau noj tau hnav. Nej Leej Txiv saum ntuj yeej paub tias nej cheem tsum tej no lawm.
33 “Kav tsij txhawb Vajtswv txoj kev kav* thiab coj raws li nws tej kev cai ncaj ncees ua ntej tso ces Vajtswv mam li muab tej uas nej cheem tsum tsav ntxiv rau nej.
34 Yog li ntawd, txhob txhawj txog tag kis, rau qhov tag kis tseem yuav muaj lwm yam kev nyuaj siab. Hnub no twb muaj kev txhawj txaus lawm.
Cov taw ntawv
^ Los sis “cov neeg ncauj lus zoo siab phem.”
^ Lus Kilis yog “Lawv twb tau lawv tej nqi zog txaus lawm.”
^ Los sis “Leej Txiv uas peb qhov muag tsis pom, nws yeej pom koj.”
^ Lus Kilis yog “lawv tej nqi zog tsuas yog li ntawd xwb.”
^ Lus Kilis yog “ib cha tsev.”
^ Los sis “Leej Txiv uas peb qhov muag tsis pom.”
^ Lus Kilis yog “lwm haiv neeg.”
^ Mus saib Cov Lus Txhais.
^ Lus Kilis yog “pub kom peb muaj mov ci txaus noj.”
^ Lus Kilis yog “zam peb tej nqi.”
^ Lus Kilis yog “tus Lim Hiam.”
^ Los sis “tseg tsis txhob.”
^ Lus Kilis yog “lawv tej nqi zog tsuas yog li ntawd xwb.”
^ Los sis “Leej Txiv uas peb qhov muag tsis pom.”
^ Los sis “Leej Txiv uas peb qhov muag tsis pom, nws yeej pom koj.”
^ Lus Kilis yog “koj lub qhov muag yooj yim.”
^ Los sis “siab hlob.”
^ Lus Kilis yog “ib tshim.” Ib tshim ntev li 17.5 nti.
^ Lus Kilis yog “Lwm haiv neeg.”
^ Lus Kilis yog “lub Nceeg Vaj.” Mus saib Cov Lus Txhais.
