Muaj coob tus txhawj xeeb txog lub ntiaj teb. Lawv ntseeg tias tib neeg tab tom ua rau tej tsiaj txhu thiab lub ntiaj teb no puas tsuaj mus. Ib txhia cov tshawb fawb txog lub ntiaj teb hais tias tsis tau muaj ib zaug uas tib neeg yuav ua rau ntau hom tsiaj txhu thiab tej paj ntoos tu noob sai npaum li tam sim no.

 Ua li, koj xav li cas? Puas yog tib neeg yuav ua rau lub ntiaj teb puas tsuaj mus? Los sis tib neeg yeej txuag tau lub ntiaj teb?

 Cov neeg tshawb fawb ntseeg tias tib neeg yeej kho tau lub ntiaj teb thiab txuag tau tej tsiaj txhu thiab paj ntoos. Tiam sis cov neeg tshawb txuj ci qee leej hais tias yuav kom ua tau li ntawd yuav tau hloov ntau yam tib txhij xws li:

•   Yuav tau hloov kev tu av, tu hav zoov, tu tej pas iav thiab dej hiav txwv kom zoo dua qub.

•   Hloov kev ua liaj ua teb thiab siv dej siv cua los sis lwm yam lub zog los ua hluav taws xob.

•   Hloov kev yug tsiaj thiab cog zaub noj. Tib neeg yuav tau xyaum noj zaub noj txiv dua li noj nqaij noj ntses thiab tsis noj seem noj so kom tsis txhob kim zaub kim mov.

•   Sawv daws yuav tsum pom tias nyiaj txiag thiab tej qhov txhia chaw tsis ua rau tib neeg muaj kev zoo siab thiab tau lub neej zoo.

 Koj xav li cas? Tej nom tswv, tub lag tub luam thiab luag lwm tus puas koom tes los tu lub ntiaj teb no? Los sis koj xav tias yeej tsis muaj li ntawd ib zaug li vim lawv ib txhia ua siab hlob, xam pom lawv tus kheej thiab tsuas xav txog lub neej tam sim no nkaus xwb, twb tsis xav txog yav tom hauv ntej li?​—2 Timautes 3:1-5.

 Nyob hauv phau Vajlugkub qhia tias lub ntiaj teb yuav tsis raug puas tsuaj thiab tseem qhia tias vim li cas tib neeg thiaj tiv thaiv tsis tau lub ntiaj teb txawm lawv yuav sib zog npaum li cas. Phau Vajlugkub hais ntxiv tias yuav tsum muaj ib yam tshiab thiaj tiv thaiv tau, thiab kuj qhia tias qhov no yuav muaj tshwm sim li cas.

 Txawm tib neeg sib zog npaum li cas los lawv tiv thaiv tsis tau lub ntiaj teb. Vajtswv Yehauvas a tsim lub ntiaj teb. Nws muab lub ntiaj teb rau tib neeg ua tus saib xyuas. (Chivkeeb 1:28; 2:15) Yuav kom tib neeg ua tau tes hauj lwm no, lawv yuav tsum ua raws li Vajtswv hais. (Pajlug 20:24) Tiam sis lawv tsis mloog Yehauvas lus. Lawv xav txiav txim siab thiab ua raws li lawv lub siab nyiam xwb. (Tej Lus Qhia 7:29) Tseeb tiag, tib neeg xwb yeej tsis muaj peev xwm tu tau lub ntiaj teb no. Txawm lawv twb ua tau qee yam lawm los lawv yeej tiv thaiv tsis tau kom lub ntiaj teb no txhob puas tsuaj.​—Pajlug 21:30; Yelemis 10:23.

 Yuav tsum muaj ib yam tshiab thiaj tiv thaiv tau lub ntiaj teb. Vajtswv yuav tsis cia tib neeg rhuav tau lub ntiaj teb no. (Tshwmsim 11:18) Vim tej nom tswv thiab noob neej tiv thaiv tsis tau lub ntiaj teb, Vajtswv thiaj yuav tsa ib yam tshiab los hloov lawv chaw. (Tshwmsim 21:1) Yog li, Yehauvas thiaj hais tias: “Nim no kuv yuav tsim ib puas tsav yam tshiab.”​—Tshwmsim 21:5.

 Tej yam tshiab ntawd yuav tshwm sim li cas? Vajtswv txoj kev kav yuav hloov tib neeg txoj. Nws tus tub Yexus Khetos yuav kav saum ntuj tuaj thoob plaws ntiaj teb.​—Daniyees 2:44; Mathais 6:10.

 Thaum Yexus kav nws yuav cob qhia kom tib neeg paub coj raws li Vajtswv tej kev cai. Thaum tib neeg los paub tus Vajtswv tsim ntuj tsim teb thiab ua raws li nws tej lus cob qhia lawv yuav tau nyob kaj siab lug nrog tej tsiaj txhu thiab ib puas tsav yam hauv lub ntiaj teb no. (Yaxayas 11:9) Phau Vajlugkub hais tias Vajtswv txoj kev kav yuav pab kom tib neeg tau ib lub neej zoo tshaj plaws thiab tsis ua rau lub ntiaj teb no puas tsuaj, zoo yam li nram no:

•   Txhua tus yuav muaj txaus noj txaus haus.—Phau Ntawv Nkauj 72:16.

•   Txhim kho lub ntiaj teb dua tshiab.​—Yaxayas 35:1, 2, 6, 7.

•   Tib neeg thiab tej tsiaj txhu yuav nyob tau sib haum xeeb.​—Yaxayas 11:6-8; Hauxeyas 2:18.

•   Yuav tsis muaj tej xwm txheej phem li lawm.​—Malakaus 4:37-41.

 Koj yeej tso siab tau tias Vajtswv txoj kev kav ua tau txhua yam no. Mus saib ntxiv zaj “Thaum Twg Vajtswv Lub Tseem Fwm Mam Li Kav Lub Ntiajteb?”