“Sang bata pa ’ko, ginasakit ako kag ginapakalain sang akon utod nga lalaki kada adlaw. Sang nakasal na ako, amo man ini ang ginahimo sang akon ugangan nga babayi sa akon. Para sa akon mga ugangan, daw ulipon lang nila ako. Gani, napamensaran ko nga maghikog.”​—Madhu, a India.

 “Ang pagpamintas sa mga babayi lapnag gid sa bilog nga kalibutan,” siling sang World Health Organization. Ginabulubanta nga halos isa sa tatlo ka babayi ang nakaeksperiensia sang pisikal ukon seksuwal nga pagpamintas.

 Kon natabo ini sa imo, posible magbatyag ka nga indi ka safe, kay mahimo mamensar ka nga bisan diin ka man magkadto, may magapakalain sa imo ukon may magaabuso sa imo sa pisikal ukon seksuwal. Bangod sina nga pagpamintas kag pagpang-abuso sa mga babayi, basi pamatyag mo nagapensar ang kalabanan nga tawo nga ‘Indi importante ang mga babayi.’ Pero importante gid bala sa Dios ang mga babayi?

 Teksto: ‘Gintuga sila sang Dios nga lalaki kag babayi.’—Genesis 1:27.

 Kahulugan: Gintuga sang Dios ang lalaki kag babayi. Para sa Iya dapat pareho sila nga respetuhon. Dugang pa, ginapaabot niya sa isa ka bana nga ‘higugmaon ang iya asawa kaangay sang paghigugma niya sang iya kaugalingon,’ nga wala nagakontrol sa iya, paagi sa masakit nga hambal ukon pagpamintas. (Efeso 5:33; Colosas 3:19) Maathag gid nga importante sa Dios ang seguridad sang mga babayi.

 “Sang bata pa ’ko, ginmolestia ako sang akon mga paryente. Sang 17 anyos ako, ginpahog ako sang akon boss nga pahalinon niya ako sa trabaho kon indi ako makig-sex sa iya. Sang nagdaku na ako, wala gid ako ginrespeto sang akon bana, gini- kanan, kag mga kaingod. Pero sang ulihi, nakatuon ako parte kay Jehova, b ang Manunuga. Ginarespeto gid niya ang mga babayi. Gani, nagpasalig ini sa akon nga palangga kag importante gid ako sa iya.”​—Maria, Argentina.

 Teksto: “May abyan nga mas suod pa sangsa isa ka utod.”​—Hulubaton 18:24.

 Kahulugan: Suportahan ka sang isa ka matuod nga abyan. Kon posible, isugid ang imo ginabatyag sa isa nga ginasaligan mo.

 “Sa sulod sang 20 ka tuig, wala ako sang may ginsugiran nga ginmolestia ako. Gani nagdaku ako nga indi malipayon, nagakabalaka, kag na-depress. Pero sang ginsugid ko na ang akon naeksperiensiahan sa isa nga handa gid mamati, naumpawan gid ako.”​—Elif, Türkiye.

 Teksto: ‘Itugyan ninyo sa Dios ang tanan ninyo nga kabalaka, kay nagaulikid sia sa inyo.’—1 Pedro 5:7.

 Kahulugan: Kon nagapangamuyo ka, nagapamati gid ang Dios. (Salmo 55:22; 65:2) Bangod nagaulikid sia sa imo, mabuligan ka niya nga mabatyagan nga importante ka.

 “Sang nakilala ko si Jehova, nabuligan ako sini nga maka-recover sa kasakit nga nabatyagan ko. Subong, masugid ko na sa Dios ang tanan nga nabatyagan ko paagi sa pangamuyo. Daw pareho sia sa isa ka abyan nga nakaintiende gid sa akon nabatyagan.”​—Ana, Belize.

 Teksto: ‘Hatagan ni Jehova sing hustisya ang mga wala sing amay kag nalisdan, agod indi na sila mahadlok sa mamalatyon nga tawo sa duta.’​—Salmo 10:​17, 18.

 Kahulugan: Sa indi madugay, dulaon na sang Dios ang tanan nga inhustisya lakip ang pagpamintas kag pagpang-abuso sa mga babayi.

 “Isa gid ka paumpaw para sa akon nga mabal-an nga malapit na lang dulaon ni Jehova ang pagpang-abuso sa mga babayi kag sa mga bata nga babayi. Nakahatag ini sa akon sang kalinong sa hunahuna.”​—Roberta, Mexico.

 Para mahibaluan mo kon paano ang Biblia nagahatag sang paglaum, kon ngaa masaligan mo ang mga promisa sini, kag kon paano nagahatag sing bulig ang mga Saksi ni Jehova paagi sa Biblia subong, mangabay nga kadtuan ka. Wala ini sing bayad.

 I-download ang puede ma-print nga pormat sini nga artikulo.