sabhopdeshak 9:1-18
9 jab mainne in baaton par socha to main is nateeje par pahuncha ki nek insan aur buddhiman insan aur un donon ke kaam, sachche parmeshvar ke haath mein hain.+ insan bekhabar hai ki usse pehale logon mein kitna pyar aur kitni nafrat hua karti thi.
2 sab logon ka ek hi anjam hota hai,+ fir chahe woh nek hon ya dusht,+ achhe aur pavitra hon ya apavitra, balidan chadhanevale hon ya balidan na chadhanevale. achhe insan aur paapi insan donon ki ek hi dasha hoti hai. bina soche-samjhe shapath khaanevale ka aur soch-samajhkar shapath khaanevale ka bhi vahi haal hota hai.
3 duniya mein* honevali yah baat bahot dukh deti hai ki sab insanon ka ek hi anjam hota hai,+ isliye unke dil mein burai bhari rehti hai. zindagi-bhar unke dil mein paagalpan chhaaya rehta hai aur fir woh mar jaate hain.*
4 jab tak ek insan zinda hai, tab tak uske liye ummeed hai kyonki ek zinda kutta mare huye sher se achha hai.+
5 jo zinda hain woh jaante hain ki woh mareinge,+ lekin mare huye kuch nahin jaante.+ aur na hi unhein aage koi inam* milta hai kyonki unhein aur yaad nahin kiya jaata.+
6 unka pyar, unki nafrat, unki jalan mit chuki hai aur duniya mein* jo kuch kiya jaata hai usmein ab unka koi haath nahin.+
7 jaa! magan hokar apna khaana khaa aur khushi-khushi daakh-madira pi+ kyonki sachcha parmeshvar tere kaamon se khush hai.+
8 tere kapde hamesha safed rahein* aur apne sir par tel malna mat bhool.+
9 apni pyari patni ke saath apni chhoti-si* zindagi ka maza le.+ haan, jo chhoti-si* zindagi parmeshvar ne tujhe di hai usmein aisa hi kar kyonki jeevan mein tera yahi hissa hai aur sooraj ke neeche teri kadi mehnat ka yahi inam hai.+
10 tu jo bhi kare use ji-jaan se kar kyonki kabraa* mein jahaan tu jaanevala hai vahaan na koi kaam hai, na soch-vichar, na gyaan, na hi buddhi.+
11 mainne duniya mein* yah bhi dekha hai ki na to sabse tez daudnevala daud mein hamesha jeetta hai, na veer yoddha ladai mein hamesha jeetta hai,+ na buddhiman ke paas hamesha khaane ko hota hai, na akaalmand ke paas hamesha daulat hoti hai+ aur na hi gyaani hamesha kaamyab hota hai.+ kyonki museebat ki ghadi kisi par bhi aa sakti hai aur haadsa kisi ke saath bhi ho sakta hai.
12 koi insan nahin jaanta ki uska samay kab aayega.+ jaise machhli achanak jaal mein jaa fansti hai aur parinda fande mein, vaise hi insan par achanak vipatti* ka samay aa padta hai aur woh usmein fans jaata hai.
13 mainne sooraj ke neeche buddhi ke baare mein ek aur baat gaur ki aur usne mujh par gehri chhaap chhodi. mainne dekha:
14 ek chhota-saa shehar tha jismein bahot kam aadmi rehte the. ek taakatvar raja us shehar ke khilaf aaya aur usne chaaron taraf se uski gherabandi ki.
15 shehar mein ek gareeb magar buddhiman aadmi tha aur usne apni buddhi se poore shehar ko bacha liya. magar us gareeb ko sab bhool gaye.+
16 tab mainne apne aapse kaha, ‘buddhi taakat se kahin achhi hai,+ fir bhi ek gareeb ki buddhi ko tuchh samjha jaata hai aur koi uski baat nahin maanta.’+
17 moorkhon par raaj karnevale ki cheekh sunnae se achha hai, buddhiman ki sunnaa jo apni baat shaanti se kehta hai.
18 buddhi, yuddh ke hathiyaron se achhi hai. lekin achhe kaamon ko bigaadne ke liye ek hi gunahgar kaafi hota hai.+
kai footnote
^ shaa., “sooraj ke neeche.”
^ shaa., “aur iske baad woh mare huon mein jaa milte hain.”
^ ya “mazdoori.”
^ shaa., “sooraj ke neeche.”
^ yaani ujle kapde, jo maatam ki nahin balki khushi ki nishani the.
^ ya “vyarth.”
^ ya “vyarth.”
^ shaa., “sooraj ke neeche.”
^ ya “museebat.”
