ʻO ke Akua ʻoiaʻiʻo ka mea nāna i hana i nā mea a pau. ʻAʻole i hana ʻia ʻo ia, a ʻaʻole ʻo ia e make. (Halelū 90:2) ʻO ke Akua ke kumu o ka nū hou maikaʻi i loko o ka Paipala. (1 Timoteo 1:11) Ua hana ʻo ia iā kākou, no laila, pono kākou e hoʻomana iā ia wale nō.​—E heluhelu iā Hōʻike ʻana 4:11.

ʻAʻole i ʻike nā kānaka i ke Akua, no ka mea, he ʻuhane ʻo ia. ʻO ia ka mea kiʻekiʻe loa ma luna o nā mea a pau e ola nei ma ka honua. (Ioane 1:18; 4:24) Akā naʻe, hiki iā kākou ke ʻike i nā ʻano o ke Akua ma ka ʻike ʻana i nā mea āna i hana ai. Hiki iā kākou ke ʻike i kona aloha ke ʻike kākou i nā pua like ʻole a me nā hua ʻai like ʻole. Hiki ke ʻike i kona mana i ka nui o ke ao holoʻokoʻa.​—E heluhelu iā Roma 1:20.

Akā naʻe, hiki iā kākou ke ʻike i nā ʻano o ke Akua ma ka heluhelu ʻana i ka Paipala. I mea hoʻohālikelike, ʻōlelo ia i ka makemake o ke Akua, a me ka mea makemake ʻole ʻia, ke ʻano e hana ai ʻo ia i ka poʻe, a me kāna hana ʻana i nā ʻano pōʻaiapili like ʻole.​—E heluhelu iā Halelū 103:​7-10.

Ua ʻōlelo ʻo Iesū, “E ko mākou Makua i loko o ka lani, e hoʻāno ʻia kou inoa.” (Mataio 6:9) Hoʻohana ka poʻe i nā kūlana like ʻole he nui o ke Akua, akā, hoʻokahi wale nō inoa ko ke Akua. ʻOkoʻa ka puana o kona inoa i nā ʻōlelo like ʻole, akā, ma ka ʻōlelo Hawaiʻi, ʻōlelo ʻia, Iēhova.​—E heluhelu iā Halelū 83:18.

Ua holoi ʻia ka inoa o ke Akua mai ka Paipala a hoʻohana ʻia nā kūlana, ʻo ka Haku a me ke Akua. Akā, i ke kākau ʻana i ka Paipala, aia kona inoa ʻoiaʻiʻo i 7,000 mau wahi. Ua hōʻike ʻo Iesū i ka inoa o ke Akua i kona aʻo ʻana i ka poʻe e pili ana i ke Akua.​—E heluhelu iā Ioane 17:26.

E nānā i ka wikiō He inoa ko ke Akua?

Pehea, ma muli wale nō o ka nui o ka pilikia a me ka hewa, ʻaʻole paha aloha ʻo Iēhova iā kākou? ʻŌlelo kekahi poʻe, ua hōʻeha ʻo ia iā kākou i mea e hoʻāʻo ai iā kākou. Akā, ʻaʻole pololei kēia.​—E heluhelu iā Iakobo 1:13.

Ua hāʻawi mai ke Akua i nā kānaka i ka hiki ke koho. Mahalo paha kākou i ka hiki ke koho e lawelawe i ke Akua? (Iosua 24:15) ʻAe, akā, koho ka poʻe he nui e hana ʻino i kekahi, no laila, nui ka ʻehaʻeha i kēia lā. Ua kaumaha ʻo Iēhova i kona ʻike ʻana i kēia mau mea.​—E heluhelu iā Kinohi 6:​5, 6.

Aloha ʻo Iēhova ke Akua iā kākou. Makemake ʻo ia iā kākou e hauʻoli i ko kākou ola ʻana. E hoʻopau koke ana ʻo ia i ka ʻehaʻeha a me nā mea e hoʻopilikia aku. Akā, i kēia manawa, aia kekahi kumu no kona ʻae ʻana i ka ʻehaʻeha. I ka haʻawina 8, e aʻo ana kākou i ke kumu o kona ʻae ʻana.​—E heluhelu iā 2 Petero 2:9; 3:​7, 13.

Kono ʻo Iēhova iā kākou e hoʻokokoke iā ia ma ka walaʻau ʻana me ia i ka pule. Makemake ʻo ia e ʻike iā kākou pākahi. (Halelū 65:2; 145:18) Makemake ʻo ia e huikala iā kākou. ʻIke ʻo ia i kā kākou hana ʻana nona, ʻoiai hāʻule kākou i kekahi manawa. No laila, he poʻe hemolele ʻole kākou, akā hiki nō iā kākou ke hoʻokokoke i ke Akua a loaʻa ka pilina maikaʻi me ia.​—E heluhelu iā Halelū 103:​12-14; Iakobo 4:8.

Na Iēhova i hana iā kākou, no laila, pono kākou e aloha nui iā ia ma mua o nā kānaka ʻē ʻaʻe. (Mareko 12:30) Hōʻike ʻoe i kou aloha i ke Akua i kāu aʻo ʻana e pili ana iā ia, a me ka hana ʻana i kona makemake. I kāu hana ʻana i kēia, e hoʻokokoke ana nō hoʻi ʻoe iā ia.​—E heluhelu iā 1 Timoteo 2:4; 1 Ioane 5:3.