Jesu kuuma n den nagini yeni o yedi: “U Tienu Diema Laabaaliŋamo na n da baa kpa pundi ŋanduna kuli nni, ki tua siedi i nibuoli kuli po. Lani yaa pendi mi juodima baa cua”. (Matie 24:⁠14) Ama laa laabaaliŋamo den baa pundi ŋanduna kuli nni lede? Li tie tin baa ŋoadi Jesu n ŋan yaa bontogidikaaŋanli wan den ye ki tinga nni.​—⁠Luki 8:⁠1.

Ti kpaandi diegu-​diegu. Jesu den waani o ŋoadikaaba n baa kpaani u laabaaliŋamo diegu-​diegu maanma. (Matie 10:⁠11-​13; Jesu Tondiba Tuona 5:⁠42; 20:⁠20) Cicili kilisiti niba den pia bani biba yaa kpaanma kaanu. (Matie 10:5, 6; Korenti Yaaba Tilieli 10:⁠13) Dinli-​dinla ti moko gobidi ti kpaanma tuonli yene: Nitaanli kuli pia o kpaanma kaanu. Li todi-​ti ke ti ŋua Jesu n teni yaa balimaama: “yaa wangi bi niba o Laabaaliŋamo ki yaa tiendi siedi”.—⁠Jesu Tondiba Tuona 10:⁠42.

Ti kpaandi i kaani kuli bi niba n ye naani. Jesu tie tipo bontogidikaaŋamo kelima o den kpaani o niligu n den ye naani, nani mi ñincianma kunu bi a caana po. (Marki 4:⁠1; Jan 4:​5-​15) Ti moko caa bi niba n ye naani ki togidi-​ba biibili maama, baa li yaa tie u sanu nni, i daaga nni, bi gaar nni. O yogunu tianma ti yen maadi leni-​ba leni kankalafo. Li yaa tuo ti go maadi leni ti yieninlieba, ti tuonsoanlieba, ti cogibilieba, bi ti diegu niba U Tienu maama. Lani kuli todi ke ŋanduna nni niba boncianla cengi “o faabima laabaalo”.​—⁠Pisomi 96:⁠2.

Ŋme ke yi bua kpaani U Tienu Diema laabaaliŋamo, ki todi-​o wan bandi lani n baa fidi pa-​o yaala saala po. Yin daa kubi laa laabaaliŋamo yinba bebe yaapo, todi-​mani nitoa n bandi.

• Li tie tiladi ban kpaani ole laabaaliŋamo ŋanduna kuli nni?

• Lede ke Jeova Siedinba ŋua Jesu n den kpaandi u laabaaliŋamo yeni maanma?