Dile e yin yiyizan do to Biblu mẹ, hogbe lọ gbigbọnọ-yinyin gán zẹẹmẹdo ojlo vẹkuvẹku nado hẹn homẹ Jiwheyẹwhe tọn hùn bosọ nọ lẹnnupọn to aliho he mẹ e nọ lẹnnupọn te. Gbẹtọ gbigbọnọ de nọ dovivẹnu nado nọgbẹ̀ sọgbe hẹ nubiọtomẹsi Jiwheyẹwhe tọn lẹ podọ nado hodo anademẹ gbigbọ wiwe Etọn tọn. a—Lomunu lẹ 8:5; Efesunu lẹ 5:1.

 Biblu nọ saba do vogbingbọn he to gbẹtọ gbigbọnọ po gbẹtọ agbasanọ po ṣẹnṣẹn hia nado bayi zẹẹmẹ gbigbọnọ-yinyin tọn. Di apajlẹ, gbọnvona gbẹtọ gbigbọnọ de, “gbẹtọ agbasanọ ma nọ kẹalọyi nuhe yin gbigbọ Jiwheyẹwhe tọn tọn lẹ,” kavi nuplọnmẹ Jiwheyẹwhe tọn lẹ. (1 Kọlintinu lẹ 2:14-16) To vogbingbọn mẹ na gbẹtọ gbigbọnọ, gbẹtọ agbasanọ nọ fọ́n “awuwhàn po avùn po” dote kakati nado nọ tlúalọ bo dín jijọho. (1 Kọlintinu lẹ 3:1-3) Podọ mẹhe nọ dọho mẹhẹngble tọn bo nọ klan họntọn alọmayiemẹ lẹ yin yiylọdọ “gbẹtọ kanlinjọmẹ lẹ he ma tindo gbigbọnọ-yinyin.”—Juda 19; Howhinwhẹn lẹ 16:28. b

To hosọ ehe mẹ

•  Fie wẹ gbigbọnọ-yinyin nọ wá sọn?

•  Naegbọn e do yin nujọnu nado yin gbẹtọ gbigbọnọ?

•  Nawẹ n’sọgan wleawuna gbigbọnọ-yinyin gbọn?

•  Be n’dona yin sinsẹ̀nnọ whẹpo do yin gbẹtọ gbigbọnọ wẹ ya?

•  Linlẹn agọ̀ lẹ gando gbigbọnọ-yinyin go

•  Wefọ Biblu tọn he dọho gando gbigbọnọ-yinyin go lẹ

 Mí tindo nugopipe lọ nado yin gbẹtọ gbigbọnọ na mí yin didá to apajlẹ Jiwheyẹwhe tọn mẹ wutu. (Jenẹsisi 1:27) Enẹwutu, e ma yin nupaṣamẹnu de dọ suhugan gbẹtọ lẹ tọn nọ yọ́n pinpẹn nuhe yè ma sọgan mọ kavi doalọ e go lẹ tọn bosọ nọ tindo ojlo na yé.

 To jọwamọ-liho, mí tindo nugopipe lọ nado do jẹhẹnu Jehovah c Jiwheyẹwhe tọn nkọ lẹ taidi jijọho, lẹblanu po mẹnukuntamahopọn po hia. (Jakọbu 3:17) Podọ, Jiwheyẹwhe nọ na gbigbọ wiwe etọn mẹhe nọ dovivẹnu nado setonuna gbedide etọn lẹ.—Owalọ lẹ 5:32.

 Gbigbọnọ-yinyin nọ zọ́n bọ yè nọ tindo “ogbẹ̀ po jijọho po.” (Lomunu lẹ 8:6) Nunina Jiwheyẹwhe tọn ehelẹ họakuẹ hugan nudevo depope.

•   Ogbẹ̀: Jiwheyẹwhe dopà nado na ogbẹ̀ madopodo gbẹtọ gbigbọnọ lẹ.—Johanu 17:3; Galatianu lẹ 6:8.

•   Jijọho: Jijọho ehe nọ zọ́n bọ mí nọ do haṣinṣan dagbe hẹ Jiwheyẹwhe. Mẹhe nọ ze ayiha do nuhudo agbasa tọn yetọn lẹ kẹdẹ ji yin kẹntọ Jiwheyẹwhe tọn lẹ. (Lomunu lẹ 8:7) Gbọnvona enẹ, Jiwheyẹwhe nọ suahọ mẹhe nọ dovivẹnu nado wleawuna gbigbọnọ-yinyin lẹ gbọn “jijọho Jiwheyẹwhe tọn he yiaga hugan nukunnumọjẹnumẹ lẹpo” nina yé dali. (Filipinu lẹ 4:6, 7) Jijọho ahun mẹ tọn ehe nọ gọalọna yé nado do ayajẹ to gbẹ̀mẹ.—Matiu 5:3.

•   Plọn gbedide Jiwheyẹwhe tọn lẹ bosọ nọ setonuna yé. A sọgan wà ehe gbọn Biblu hihia dali, yèdọ owe de he bẹ linlẹn Jiwheyẹwhe tọn lẹ hẹn bo yin kinkan gbọn sunnu he “yin anadena gbọn gbigbọ wiwe dali” lẹ gblamẹ. (2 Pita 1:21) Nuhe a plọn lẹ na gọalọna we nado sẹ̀n Jiwheyẹwhe “to gbigbọ mẹ podọ to nugbo mẹ,” podọ gbigbọ wiwe na nọ deanana we bọ a nasọ nọ wà ojlo Jiwheyẹwhe tọn.—Johanu 4:24.

•   Nọ biọ alọgọ Jiwheyẹwhe tọn to odẹ̀ mẹ. (Luku 11:13) Jiwheyẹwhe na gọalọna we nado do jẹhẹnu he yè do nọ yọ́n gbẹtọ gbigbọnọ de lẹ hia. (Galatianu lẹ 5:22, 23) E nasọ na we nuyọnẹn nado pehẹ nuhahun gbẹ̀mẹ tọn lẹ.—Jakọbu 1:5.

•   Nọ dogbẹ́ hẹ gbẹtọ gbigbọnọ lẹ. Yé na gọalọna we nado hẹn gbigbọnọ-yinyin towe lodo. (Lomunu lẹ 1:11, 12) To vogbingbọn mẹ, gbẹdido hẹ mẹhe linlẹn yetọn jẹagọdo Jiwheyẹwhe tọn lẹ sọgan dekanpona gbigbọnọ-yinyin towe.—Jakọbu 4:4.

 Eyin mẹde tlẹ to sinsẹ̀n de mẹ, enẹ ma dohia dọ e na yin gbẹtọ gbigbọnọ. Biblu dọ dọ: “Eyin mẹdepope lẹn to ede mẹ dọ emi yin sinsẹ̀nnọ ṣigba bo ma nọ deanana odẹ́ etọn ganji, ahun edetiti tọn klọ wẹ e te, podọ ovọ́ wẹ sinsẹ̀n-bibasi etọn.”—Jakọbu 1:26, nudọnamẹ odò tọn.

 Etomọṣo, Biblu dohia dọ gbẹtọ gbigbọnọ lẹ nọ sẹ̀n Jiwheyẹwhe to aliho he e kẹalọyi mẹ. Yé yọnẹn dọ “gbigbọ dopo” gee wẹ tin—enẹ wẹ gbigbọ wiwe Jiwheyẹwhe tọn. Gbigbọ enẹ nọ whàn yé nado sẹ̀n Jiwheyẹwhe taidi “agbasa dopo,” enẹ wẹ pipli he yin titobasina de, ehe nọ hẹn “dopo-yinyin gbigbọ tọn go to gẹdẹ pọninọ jijọho tọn mẹ.”—Efesunu lẹ 4:1-4.

 Linlẹn agọ̀: Nudida lẹpo wẹ yin gbigbọnọ.

 Nugbo lọ: Nuhe Jiwheyẹwhe dá lẹpo wẹ nọ hẹn gbégbò wá na ẹn. (Salmu 145:10; Lomunu lẹ 1:20) Etomọṣo, nudida he tindo nuyọnẹn lẹ kẹdẹ wẹ sọgan wleawuna gbigbọnọ-yinyin. Enẹwutu, kanlin lẹ ma sọgan jihọntọn hẹ Jiwheyẹwhe na yé ma nọ lẹnnupọn wutu. Nuhe sin hudo yé do lẹ wẹ nọ deanana nuyiwa yetọn lẹ. (2 Pita 2:12) Abajọ, Biblu dohia dọ gbigbọnọ-yinyin gbọnvọna linlẹn po walọ kanlinjọmẹ tọn lẹ po.—Jakọbu 3:15; Juda 19.