Jiwheyẹwhe ko de Klistiani nugbonọ sọha delẹ he na yin hinhẹngọwa ogbẹ̀ do olọn mẹ to okú yetọn godo. (1 Pita 1:3, 4) To whenue yé ko yin dide godo, yé dona gbẹ́ zindonukọn nado to yise yetọn dohia bosọ tẹdo walọyizan Klistiani tọn lẹ go, na yé nikaa wá gboawupo bọ ahọsumẹ olọn mẹ tọn yetọn na gbọ yé go.—Efesunu lẹ 5:5; Filipinu lẹ 3:12-14.

Etẹwẹ mẹhe jei olọn mẹ lẹ na wà to dọ́n?

 Yé na wazọ́n dopọ hẹ Jesu taidi ahọlu lẹ podọ yẹwhenọ lẹ na owhe 1 000. (Osọhia 5:9, 10; 20:6) Yewlẹ wẹ nọtena “olọn yọyọ lẹ,” kavi gandudu olọn mẹ tọn lọ he na deanana “aigba yọyọ” lọ, enẹ wẹ gbẹtọvi he na togbẹ̀ to aigba ji lẹ. Mẹhe na dugán to olọn mẹ lọ lẹ na gọalọna gbẹtọvi lẹ nado duvivi ogbẹ̀ tọn to ninọmẹ dodo tọn lẹ mẹ, kẹdẹdile Jiwheyẹwhe jlo do to dowhenu.—Isaia 65:17; 2 Pita 3:13.

Omẹ nẹmu wẹ na yin finfọnsọnku do olọn mẹ?

 Biblu dohia dọ gbẹtọ 144 000 wẹ na yin finfọnsọnku nado nọgbẹ̀ to olọn mẹ. (Osọhia 7:4) To numimọ etọn he yin kinkandai to Osọhia 14:1-3 mẹ, apọsteli Johanu mọ “Lẹngbọvu lọ ṣite to Osó Ziọni ji, gbẹtọ 144 000 . . . sọ tin po e po.” To numimọ ehe mẹ, “Lẹngbọvu lọ” nọtena Jesu he ko fọnsọnku lọ. (Johanu 1:29; 1 Pita 1:19) “Osó Ziọni” yin yiyizan nado dohia dọ Jesu po gbẹtọ 144 000 he na dugán hẹ ẹ to olọn mẹ lẹ po tin to otẹn gigonọ daho de mẹ.—Salmu lẹ 2:6; Heblu lẹ 12:22.

 Mẹhe yin “mẹyiylọ [podọ] mẹdide” he na dugán hẹ Klisti to Ahọluduta lọ mẹ lẹ yin alọdlẹndo di “lẹngbọpa pẹvi” de. (Osọhia 17:14; Luku 12:32) Ehe dohia dọ omẹ vude poun wẹ yé na yin sọn mẹhe lẹngbọpa Jesu tọn blebu bẹhẹn lẹpo mẹ.—Johanu 10:16.

Linlẹn agọ̀ delẹ he mẹlẹ nọ do gando mẹhe jei olọn mẹ lẹ go

 Linlẹn agọ̀: Sọha 144 000 he go owe Osọhia tọn donù ma yin sọha tangan de. Sọha yẹhiadonu tọn kavi nuyijlẹdonugo de poun wẹ.

 Nugbo lọ: Nugbo wẹ dọ owe Osọhia tọn bẹ sọha yẹhiadonu tọn susu hẹn, amọ́ e sọ donù sọha tangan delẹ go. Di apajlẹ, e dọho gando “oyín 12 apọsteli 12 Lẹngbọvu lọ tọn lẹ tọn” go. (Osọhia 21:14) Pọ́n kunnudenu delẹ he dohia dọ sọha 144 000 lọ ma dona yin pinpọnhlan di yẹhiadonu kavi nuyijlẹdonugo de poun.

 Osọhia 7:4 dlẹnalọdo “sọha mẹhe yè yí hiadonu do dohiagona [kavi mẹhe yin alọkẹyi nado nọgbẹ̀ to olọn mẹ] lẹ tọn, yèdọ 144 000.” Wefọ he bọdego lẹ sọ donù pipli awetọ he gbọnvo de go: enẹ wẹ “gbẹtọ susugege de, he mẹdepope ma penugo nado hia.” Jiwheyẹwhe na whlẹn mẹhe “gbẹtọ susugege” lọ bẹhẹn lẹ lọsu gán. (Osọhia 7: 9, 10) Todin, eyin sọha 144 000 lọ yin yiyizan di yẹhiadonu nado do pipli de he yè ma yọ́n omẹ sọha tangan he e bẹhẹn hia dai wẹ, be vogbingbọn depope masọ tin to pipli awe ehelẹ ṣẹnṣẹn ba niyẹn. a

 Humọ, Biblu dọ gando gbẹtọ 144 000 lẹ go dọ yé “yin hihọ̀ sọn gbẹtọvi lẹ mẹ taidi sinsẹ́n tintan lẹ.” (Osọhia 14:4) Hodidọ lọ “sinsẹ́n tintan lẹ” nọ dlẹnalọdo omẹ sọha kleun de he yin dide di afọzedaitọ lẹ. Zẹẹmẹ ehe sọgbe na mẹhe na duahọlu hẹ Klisti to olọn mẹ bo na deanana gbẹtọvi madosọha he na wá nọgbẹ̀ to aigba ji lẹ.—Osọhia 5:10.