Gànhiho tintan he nọ bọdo viyẹyẹ de sin jiji go nọ yin ojlẹ diọdo daho de tọn na ẹn. Etẹwutu? Na onọ̀ he sẹpọ viyẹyẹ yetọn ganji to ojlẹ enẹ mẹ lẹ nọ yinuwado whinwhẹ́n ovi yetọn tọn ji. *

Etẹwẹ nọ sisẹ́ onọ̀ de nado do owanyi sisosiso hia viyẹyẹ etọn? Weyọnẹntọ Jeannette Crenshaw basi zẹẹmẹ to owe de (The Journal of Perinatal Education) mẹ dọ to jọwamọ-liho “owanyi onọ̀ de tọn na ovi he e ṣẹṣẹ ji nọ sinyẹn deji dile e to alọdo e go, bo to pinpọn ẹn bosọ to anọ́ na ẹn.” Owanyi mọnkọtọn sọ “nọ gọalọna onọ̀ de nado na ayidonugo viyẹyẹ etọn” bo nọ zọ́n bọ e nọ sẹpọ viyẹyẹ etọn ganji. Naegbọn enẹ do jẹna ayidego?

Jehovah Jiwheyẹwhe * he yin Mẹdatọ owanyinọ mítọn wẹ hẹn owanyi mọnkọtọn yọnbasi to onọ̀ po viyẹyẹ etọn po ṣẹnṣẹn. Ahọlu Davidi pà Jiwheyẹwhe, na e hẹn ẹn “jẹgbonu sọn adọ̀mẹ” bo hẹn ẹn tindo hihọ́ to akọ́n onọ̀ etọn tọn nù. E hodẹ̀ dọmọ: “Sọn jiji whenu gbọ́n wẹ yẹn ko yin zizedo alọmẹ na we; sọn adọ̀ onọ̀ ṣie tọn mẹ gbọ́n wẹ hiẹ ko yin Jiwheyẹwhe ṣie.”—Salmu lẹ 22:9, 10.

LẸNNUPỌN: Eyin Jiwheyẹwhe hẹn owanyi he siso mọnkọ yọnbasi to onọ̀ de po ovi etọn po ṣẹnṣẹn, bọ onọ̀ lọ nọ na ayidonugo ovi etọn bo nọ na ẹn nue sin hudo e tindo lẹ, be onú dopodopo mí mẹhe yin “ovi Jiwheyẹwhe tọn” lẹ tọn ma na duahunmẹna ẹn wẹ ya?—Owalọ lẹ 17:29.

Jesu Klisti he yọ́n Mẹdatọ lọ ganji hú mẹdevo depope plọnmẹ dọmọ: “Oblẹnọ awe wẹ nọ yin sisà yin abọgan-kuẹ pẹvi dopo, kavi e ma yin mọ wẹ? Ṣogan, depope to yé mẹ ma na flẹ jẹ kọmẹ bọ Otọ́ mìtọn ma na yọnẹn. Ṣigba, etlẹ yin oda he to ota na mì lẹpo wẹ ko yin hihia. Enẹwutu, mì dibu blo; mìwlẹ họakuẹ hú oblẹnọ susu.”—Matiu 10:29-31.

Susu mítọn ma nọ na ayidonugo ohẹ̀ flinflin lẹ, kavi tlẹ doayi e go eyin depope to yé mẹ flẹ jẹ kọmẹ. Amọ́, Otọ́ mítọn olọn mẹ tọn nọ doayi dopodopo yetọn go! Podọ ohẹ̀ lẹ, mahopọnna lehe yé sù sọ, ma nọ họakuẹ to nukun etọn mẹ sọ gbẹtọ dopo. Enẹwutu, nuplọnmẹ lọ họnwun: “Mì dibu blo,” Jiwheyẹwhe nọ doayi dopodopo mítọn go. E tlẹ tindo ojlo to dopodopo mítọn mẹ!

 Owe-wiwe lẹ na mí jide dọ

• “Nukun Jehovah tọn tin to filẹpo, bo nọ to mẹylankan po mẹdagbe po pọ́n.”—HOWHINWHẸN LẸ 15:3.

• “Nukun Jehovah tọn tin to dodonọ lẹ ji, otó etọn sọ nọ hùn hlan awhágbe yetọn na alọgọ.”—SALMU LẸ 34:15.

• “Yẹn na nọ jaya taun, na owanyi nugbo towe wutu, na hiẹ ko mọ yajiji ṣie; hiẹ yọ́n ayimajai ahun ṣie mẹ tọn.”—SALMU LẸ 31:7.

Nawẹ e na yinuwado mí ji sọ, eyin mí yọnẹn dọ Jiwheyẹwhe tindo ojlo nujọnu tọn to mí mẹ bo nọ yí owanyi do penukundo mí go? E na yinuwado mí ji taun, sọgbe hẹ nuhe Hannah, * he wá sọn Angleterre, dọ:

“Whlasusu wẹ n’nọ mọdọ Jehovah ma yiwanna mi bo ma nọ sè odẹ̀ ṣie lẹ. N’nọ lẹndọ na n’ma do yise sọmọ wutu wẹ. N’nọ mọdọ yè to yasana mi bọ mẹde ma nọ pọ́n dè e, na n’ma yin nujọnu wutu. N’lẹndọ Jiwheyẹwhe ma to ṣie dọ.”

Amọ́, Hannah masọ tindo ayihaawe gando ayidonugo po owanyi Jehovah tọn po go ba. Etẹwẹ diọlinlẹnna ẹn? “Vudevude wẹ e diọ,” wẹ e dọ. “N’flin hodidọ sinai do Biblu ji de he yin nina to owhe susu die gando avọ́sinsan ofligọ Jesu tọn go, ehe yinuwado ji e taun bo gọalọna mi nado vọ́ jidedo owanyi Jehovah tọn go. Enẹgodo, eyin odẹ̀ ṣie lẹ mọ gblọndo, dasin nọ wayi do mi, na n’wá mọdọ Jehovah yiwanna mi nugbonugbo. Humọ, gbọn Biblu pinplọn po opli Klistiani tọn lẹ yìyì po dali, n’ko plọn nususu gando Jehovah go, gọna mẹhe nkọ e yin, po nukun he e nọ yí do pọ́n mí po. Todin, e họnwun na mi dọ Jehovah nọ gọalọna dopodopo mítọn bo yiwanna mí bosọ tindo ojlo nado penukundo dopodopo mítọn go.”

Nue Hannah dọ ehe namẹ tuli taun. Amọ́, nawẹ a gán kudeji dọ Jiwheyẹwhe nọ mọnukunnujẹ linlẹn towe lẹ mẹ bo nọ flin yé gbọn? Hosọ he bọdego na dọhodo kanbiọ ehe ji.